以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1 當烏西亞、約坦、亞哈斯、希西家做偤大王ê時,阿摩司ê kiáⁿ以賽亞所得tio̍h關係偤大kah耶路撒冷ê默示。
2 上帝譴責祂ê子民
天ah,tio̍h聽!地ah,tio̍h àⁿ耳孔!因為上主有講:「我bat養飼kiáⁿ兒,培養in大漢,in竟然悖逆我。
3 牛bat牠ê主人,驢á bat牠ê主人ê槽,總是,以色列m̄ bat,我ê人民bē曉想。」
4 害ah!犯罪ê國、罪惡ê人民、行pháiⁿ ê種類kah敗壞ê kiáⁿ兒!In離開上主,看輕以色列ê聖ê,kah祂生疏,oa̍t tńg身離開去。
5 Lín tiāⁿ-tiāⁿ 悖逆,kám是ài koh受phah?Lín ê滿頭殼已經痛疼,滿心已經衰弱。
6 Tùi lín ê腳底到頭殼頂,無kah一塊好皮肉—lóng是孔嘴、烏青腫kah新傷痕;lóng bē收嘴,包bē密,mā無用油滋潤。
7 Lín ê地已經拋荒,lín ê城受火燒毀;lín ê田園tī lín ê面前hō͘外邦人侵吞;已經拋荒,親像hō͘外邦人所敗壞ê。
8 只有留錫安城,親像葡萄園ê草寮,瓜á田ê草寮,受圍困ê城。
9 若m̄是萬軍ê上主kā咱留淡薄chhun落來ê人民,咱早to̍h親像所多瑪,親像蛾摩拉ánne受消滅。
10 Lín chiahê所多瑪ê官長,tio̍h聽上主ê話;lín蛾摩拉ê人民,tio̍h àⁿ耳孔來聽咱ê上主ê教示。
11 上主講:「Lín獻hiah chē祭物hō͘我有啥物利益?公綿羊ê燒祭kah肥ê chengseⁿ ê油,我已經有夠額。牛káng ê血、羊á ê血kah山羊káng ê血,我mā lóng無kah意。
12 Lín來朝見我,啥人對lín討chitê,來thún踏我ê院?
13 M̄-thang koh獻空空ê禮物!芳料是我所討厭ê;每月ê初一、安息日kah召集ê聚會,lóng是teh行pháiⁿ;lín koh守嚴肅會,我實在忍bē tiâu。
14 Lín ta̍k月ê初一kah節期,我ê心怨恨,看它做重擔,hō͘我擔bē起。
15 Lín gia̍h起手來,我beh掩目chiu m̄看lín;lín有真chē祈禱,我mā m̄聽;lín ê手充滿thâi人ê血。
16 Lín tio̍h kā kakī 洗清氣,tùi我ê目chiu 前除去lín所行ê pháiⁿ,停止lín ê做pháiⁿ!
17 學習行好,chhōe公平,拯救受壓制ê人,替孤兒申冤,為寡婦辯護。」
18 上主講:「Lín來,咱來做伙辯論!Lín ê罪雖然親像朱紅,它ē變做白kah親像雪;雖然紅親像胭脂,ē變做白kah親像羊毛。
19 Lín若甘心遵thàn,to̍h ē得tio̍h地chiūⁿê好物thang食;
20 lín若m̄遵thàn,顛倒悖逆,to̍h ē受刀劍吞滅。因為我是上主,我親嘴ánne講。」
21 邪惡ê城
害ah!忠信ê城變做娼妓,早前充滿公平,公義tiàm hit內面,現今是兇手teh tòa。
22 你ê銀變做渣滓;你ê酒透水。
23 你ê官長犯法,kah賊tàu陣,ta̍k个ài beh接受人ê烏紗,siàu想謝禮;in無為tio̍h孤兒申冤,寡婦ê案件bē tàng到tī伊ê面前。
24 因為ánne,主—萬軍ê上主,以色列ê大能ê講:「Ho͘h!我beh除去我ê仇敵,hō͘ kakī khah會平安,我beh對我ê對敵報仇!
25 我beh koh下手tī你ê身上,鍛鍊你所有ê渣滓,除清你ê雜質。
26 我beh koh設立你ê審判官,親像源起頭ê時,koh設立你ê謀士,親像早前。然後,你ēhông叫做公義ê城,忠信ê城。」
27 錫安ē因為公平得tio̍h救贖;hiahê倒tńg來ê人ē因為公義得tio̍h救贖。
28 悖逆kah犯罪ê人ē做一下敗壞;放sak上主ê人一定受消滅。
29 Hiahê人ē因為lín所歡喜ê橡樹來漏氣,línē因為所揀ê園來見笑。
30 因為línē親像葉乾去ê橡樹,ē親像無水ê園。
31 有權勢ê人ē親像麻屑,伊ê所做親像火星;in lóng做一下to̍h,無人thang kā它phah hoa。
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。