章節 | 全民台語聖經漢羅經文 | 註釋 |
6:1 | 邪惡ê人類人口tī地chiūⁿná加添,mā生chabó͘ kiáⁿ ê時, | |
6:2 | 上帝ê kiáⁿ看tio̍h人ê chabó͘ kiáⁿ súi,就照in所ài,娶in做bó͘。 | |
6:3 | 上主講:「人既然屬tī肉體,我ê聖神無beh永遠tiàm tī in;m̄ koh,in ê日子teh beh到一百二十年。」 | |
6:4 | Tī hit時kah以後,有大漢人tòa tī地面上,in 是上主ê kiáⁿ kah人ê chabó͘ kiáⁿ同房所生ê kiáⁿ;in是古早ê英雄kah有名聲ê人。 | |
6:5 | 上主看tio̍h人tī地chiūⁿ,罪惡真大,心內所想ê念頭ta̍k日lóng是pháiⁿ ê。 | |
6:6 | 上主後悔祂造人tī世間,心內憂悶。 | |
6:7 | 上主講:「我beh tùi地面上剿滅我所創造ê人,kā人kah走獸、蟲thōa、飛鳥,lóng剿滅;因為我造in了後有後悔。 | |
6:8 | 只有挪亞tī上主ê面前得tio̍h恩典。 | |
6:9 | 挪亞ê故事挪亞ê世系記tī下底:挪亞是義人,tī hit世代ê中間是完全ê人;挪亞kah上帝做伙行。 | |
6:10 | 挪亞生三个kiáⁿ,to̍h是閃、含、雅弗。 | |
6:11 | 世界tī上主ê面前敗壞,世界充滿強暴。 | |
6:12 | 上帝看世界lóng teh敗壞,因為見若有肉體ê in tī世界ê行為lóng是敗壞。 | |
6:13 | 上帝對挪亞講:「見若有肉體ê,我看in ê末日已經到,因為in ê強暴充滿tī世界。你看,我beh kā in kah地做一下毀滅。 | |
6:14 | 你tio̍h用松柏柴做大船,船內tio̍h隔房間,內外用打馬膠油kā它糊。 | |
6:15 | 大船ê造法是ánne:長三百肘,闊五十肘,高三十肘。 | |
6:16 | 船tio̍h做窗á,高一肘;門tio̍h hē tī船邊,船tio̍h做三層,分上中下。 | |
6:17 | 你看!我beh hō͘大水氾濫tī地chiūⁿ,來毀滅天下見若有活氣ê肉體,見若tī地chiūⁿê lóngē死。 | |
6:18 | 總是,我beh kah你立我ê約;你kah你ê kiáⁿ,你ê bó͘,你ê新婦,lóng tio̍h入大船。 | |
6:19 | 見若有活氣ê肉體,ta̍k種一對,一隻公ê,一隻母ê,你tio̍h帶in入大船,kah你做伙保全活命。 | |
6:20 | 飛鳥各照牠ê類,chengseⁿ各照牠ê類,地chiūⁿê蟲thōa各照牠ê類,ta̍k種一對beh到你hia,來保全in ê活命。 | |
6:21 | 你tio̍h the̍h ta̍k種ê食物積聚teh,thang做你kah in ê食物。」 | |
6:22 | 挪亞就ánne行,照上主所有ê命令去行。 |