列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 以利沙幫贊Sàn-chhiah寡婦
有一个寡婦，是先知ê學生ê bó͘，叫以利沙來，講：「你ê奴僕—我ê丈夫已經死，你ê奴僕平時敬畏上帝，是你所知ê。Taⁿ債主來beh掠我兩 个kiáⁿ去做奴隸。」
4:2 以利沙問她講：「我ē tàng kā你做啥物？你kā我講；你厝內有啥物？」寡婦講：「你ê女婢厝內chhun一瓶油，以外lóng無半項。」
4:3 以利沙講：「你去，tī外面tùi你hiahê厝邊借器具，to̍h是空ê器具，借jú chē jú好。
4:4 Tio̍h入去厝內，kā門關起來，你kah你ê kiáⁿ tiàm內面，thîn油tī所有ê器具，thîn滿ê tio̍h另外hē。」
4:5 寡婦to̍h離開以利沙，tńg去厝裡，kā門關起來，她kah她ê kiáⁿ tiàm內面；kiáⁿ帶器具來hō͘她，她就thîn油。
4:6 Hiahê器具lóng滿，她kā她ê kiáⁿ講：「Koh the̍h器具來hō͘我。」Kiáⁿ講：「無koh有器具à。」to̍h停止thîn油。
4:7 寡婦去kā上帝ê奴僕講，以利沙講：「你去賣油來還債，所chhun落來ê，你kah你ê kiáⁿ thang度生活。」
4:8 書念ê Cha-bó͘人接待以利沙
有一日，以利沙行到書念，tī hia有一个好額ê chabó͘人，強強留伊tiàm hia食。後來，以利沙ta̍k pái tùi hia經過，to̍h入去食。
4:9 Cha-bó͘人對她ê丈夫講：「你看，hitê tiāⁿ-tiāⁿ tùi咱chia經過ê，我看伊是上帝ê聖ê奴僕。
4:10 求你允准，咱thang tī牆頂起一間細間房，tī hia kā伊安置眠床、桌、椅kah燈台，hō͘伊來咱chia，thang入去歇睏。」
4:11 有一日，以利沙來到hia，to̍h入去hit間房歇睏。
4:12 以利沙kā伊ê奴僕基哈西講：「你去叫chitê書念ê chabó͘人來。」伊to̍h去叫她來，chabó͘人khiā tī伊ê面前。
4:13 以利沙kā伊ê奴僕講：「你thang kā她講，你看，你為阮費真chē心思，taⁿ tio̍h kā你做啥物？你ài我替你kā王á是軍長講啥物？」Cha-bó͘人應講：「我tòa tī我ê人民ê中間。」
4:14 以利沙講：「Án-ne tio̍h為她án怎做neh？」基哈西講：「她無kiáⁿ，她ê丈夫mā老à。」
4:15 以利沙koh講：「叫她來。」to̍h去叫她來。chabó͘人to̍h khiā tī門口。
4:16 伊講：「明年到chit時，你ē抱一个kiáⁿ。」她講：「無lah，上帝ê奴僕，我ê主ah，m̄ thang騙你ê女婢。」
4:17 chabó͘人果然懷孕，到明年hit時生一个kiáⁿ，照以利沙所講ê。
4:18 Gín-á大漢，有一日出去到伊ê老父，到收割ê人hia。
4:19 伊kā老父講：「我ê頭殼，我ê頭殼！」伊ê老父kā奴僕講：「Kā伊抱去伊ê老母hia。」
4:20 伊kā gín-á抱到伊ê老母hia，gín-á坐tī老母ê腳頭u，到中晝就死。
4:21 老母上去樓頂，kā伊ê kiáⁿ hē tī上帝ê奴僕ê眠床，關門了後to̍h出來，
4:22 叫她ê丈夫講：「請差一个奴僕牽一隻驢來我chia，我beh走去上帝ê奴僕hia，chiah tńg來。」
4:23 丈夫講：「今á日m̄是月ê初一，mā m̄是安息，你án怎beh去伊hia？」Cha-bó͘人講：「平安。」
4:24 就準備驢á，kā奴僕講：「你趕驢進前去，我若無kā你講，to̍h m̄ thang khah慢。」
4:25 Cha-bó͘人to̍h去迦密山，去上帝ê奴僕hia。上帝ê奴僕遠遠看tio̍h她，kā她ê奴僕基哈西講：「你看，書念ê chabó͘人來ā，
4:26 你緊去kā她迎接，問她講：「你有平安無？你ê丈夫平安無？Gín-á平安無？」Cha-bó͘人講：「平安。」
4:27 chabó͘人來到hitê山，到上帝ê奴僕hia，就攬伊ê腳。基哈西進前來beh kā她chhia開，上帝ê奴僕講：「Chhut-chāi她，因為她心內痛苦，上主對我掩蓋，無kā我講。」
4:28 chabó͘人講：「我kám bat對我ê主求kiáⁿ？我kám無講，m̄ thang騙我？」
4:29 以利沙kā基哈西講：「你縖腰，手gia̍h我ê 柺，進前去；若tú tio̍h人，m̄ thang kā in請安，人若kā你請安，mā m̄ thang應伊；tio̍h kā我ê柺á hē tī gín-á ê面。」
4:30 Gín-á ê老母講：「我kí永遠活ê上主kah你ê活命來講，我一定m̄離開你。」以利沙to̍h起來，tòe她去。
4:31 基哈西向頭前去，用柺á hē tī gín-á ê面，總是，無聲說，mā m̄知人。基哈西倒tńg來tú tio̍h她，kā她講：「Gín-á無醒。」
4:32 以利沙來到位，入去厝內，看tio̍h gín-á已經死，hē tī伊ê眠床。
4:33 伊入去，就關門，只有in兩 个tī內面，伊to̍h對上主祈禱。
4:34 伊to̍h去仆tī gín-á ê身軀，嘴對嘴，目chiu 對目chiu ，手對手，kui身àⁿ tī gín-á ê身軀，gín-á ê肉就漸漸燒lō起來。
4:35 伊落來，tī厝內行來行去一pái，koh上去，kui身àⁿ tī gín-á；gín-á phah-ka-chhiùⁿ七pái，目chiu 就thí開。
4:36 以利沙叫基哈西講：「去叫hitê書念ê chabó͘人來。」伊to̍h去叫她，她入來伊hia。以利沙講：「抱你ê gín-á起來。」
4:37 chabó͘人to̍h入來，àⁿ tī伊ê腳前，仆tī土腳，抱她ê kiáⁿ出去。
4:38 兩 个神跡
以利沙koh來到吉甲，hit時國內飢荒，先知ê學生坐tī伊ê面前，伊吩咐奴僕，講：「你kā大鼎hē tī火裡，kā先知ê學生煮菜湯。」
4:39 有一个人去田裡挽菜，tú tio̍h一欉野藤，就挽它ê瓜滿帕tńg來，切切leh就lok落去煮菜湯ê鼎，因為in m̄ bat he 是啥物物。
4:40 Piàⁿ出來hō͘ in食；食菜湯ê時，in lóng大聲hoah：「上帝ê奴僕，鼎內有致到死ê毒，in lóng bē食得。」
4:41 以利沙講：「The̍h淡薄á麵粉來。」to̍h kā麵粉sám tī鼎裡，講：「Piàⁿ出來hō͘ in食！」鼎內to̍h無毒。
4:42 有一个人tùi Ba-al-sia-li-siah來，帶起頭熟ê麥所做ê餅kah大麥餅二十個，koh有新ê穗貯tī袋裡，送hō͘上帝ê奴僕。伊to̍h講：「Kā chiahê hō͘人民食。」
4:43 伊ê差用講：「怎樣，我kám thang kā chiahê排tī一百人ê面前？」以利沙應講：「做你hō͘人民食，因為上主ánne講：In會食，食了iáu有chhun。」
4:44 伊to̍h排tī in ê面前，in食了mā有chhun，照上主所講ê。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。