撒母耳記下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 拿單傳上主ê話Hō͘大衛
(代上17：1-15)
當王tiàm tī厝內，上主mā已經hō͘伊脫離四箍圍ê對敵，得tio̍h安靜ê時，
7:2 王kā拿單先知講：「你看，我tiàm tī柏香柴ê厝內，總是，上主ê櫃tiàm tī帳簾內。」
7:3 拿單對王講：「見若你ê心所想ê lóng thang去做，因為上主kah你同在。」
7:4 Hit暝，上主ê話臨到拿單講：
7:5 「你去kā我ê奴僕—大衛講，上主ánne講：『你kám ē起厝hō͘我tòa？
7:6 Tùi我chhōa以色列人出埃及ê日到今á日，我m̄ bat tiàm tī厝裡，tiāⁿ-tiāⁿ tī布棚kah會幕行。
7:7 見若我kah以色列人所行到ê所在，kám bat對以色列一支族ê士師，to̍h是我命令照顧我ê子民—以色列人ê，講：Lín ná ē無kā我起柏香柴ê厝？』
7:8 「Taⁿ你tio̍h kā我ê奴僕—大衛講，萬軍ê上主ánne講：『我tùi羊椆中，你teh飼ê羊群中，揀你來做我ê子民—以色列人ê君王。
7:9 你無論去tó位，我tiāⁿ-tiāⁿ kah你同在，tī你ê面前剪除你所有ê對敵。我一定hō͘你得tio̍h大名，親像世上hiahê偉人ê大名。
7:10 我beh為tio̍h我ê子民—以色列人定tio̍h一个所在，kā in栽培，hō͘ in tòa tī kakī ê所在，無koh遷徙，兇惡ê匪類無koh親像早前kā in攪擾，
7:11 mā無親像tùi我命令士師管理我ê子民—以色列人ê日，我ē hō͘你脫離所有ê對敵，得tio̍h安靜，而且上主kā你講，上主ē kā你建立你ê家。
7:12 到你ê日子已經滿，你kah你ê祖先做伙睏ê時，我ē設立你所出ê kiáⁿ孫來續接你，我mā ē堅固in ê國。
7:13 伊ē為我ê名起殿，我ē堅固伊ê國位，一直到永遠。
7:14 我beh做伊ê父，伊ē做我ê kiáⁿ；伊若犯罪，我ē用人ê 柺kah世間人ê鞭，kā伊責督。
7:15 總是，我ê慈愛無beh離開伊，親像我hō͘它離開掃羅，to̍h是我所棄sak tī你ê面前ê。
7:16 你ê家kah你ê國ē永遠建立tī你ê面前，你ê國位mā ē堅固到永遠。』」
7:17 拿單就照chiahê話，照這一切ê啟示，ánne kā大衛講。
7:18 大衛感恩ê祈禱
(代上17：16-27)
大衛王to̍h入去，坐tī上主ê面前，講：「至koân上主ah，我是啥人，我ê家算做啥物，祢竟然chhōa我到chitê地位？
7:19 至koân上主ah，這祢iáu看做是小khóa，祢koh講起祢ê奴僕ê家ē到tī久長。至koân上主ah，這是人間ê例。
7:20 大衛iáu有啥物thang對祢講？至koân上主ah，祢知祢ê奴僕。
7:21 為tio̍h祢ê話，koh照祢ê心，祢行這一切ê大事，hō͘祢ê奴僕知。
7:22 上主—上帝ah，祢是至大，照阮ê耳孔所聽tio̍h ê，無一个ē tàng比得祢，祢以外無有上帝。
7:23 地chiūⁿ有啥物國親像祢ê子民—以色列人？to̍h是上帝去kā in救贖，歸tī kakī 做子民，hō͘伊有名聲，koh tī祢ê子民ê面前，to̍h是祢tùi埃及kah列邦，以及in hiahê神明所救贖出來ê，為tio̍h lín行大事，為tio̍h你ê地做thang驚ê tāichì？
7:24 祢bat為kakī 建立祢ê子民—以色列永遠做祢ê子民；上主ah，祢mā做in ê上帝。
7:25 「上主—上帝ah，taⁿ祢所講起祢ê奴僕kah祢ê奴僕ê家，願祢永遠kā伊堅固，照祢所講ê來行。
7:26 願人永遠尊祢ê名做大，講：『萬軍ê上主是管理以色列ê上帝。』而且祢ê奴僕—大衛ê家ē tī祢ê面前堅固。
7:27 萬軍ê上主，以色列ê上帝ah，因為祢啟示祢ê奴僕，講：『我ē kā你建立家。』所以，祢ê奴僕好膽用chitê祈禱來對祢祈禱。
7:28 「Taⁿ至koân上主ah，只有祢是上帝，祢ê話是真實；祢mā用chitê福氣應允祢ê奴僕。
7:29 Taⁿ求祢賜福祢ê奴僕ê家，hō͘它永遠tī祢ê面前。至koân上主ah，因為祢有講起，願祢ê奴僕ê家tùi祢ê賜福來得tio̍h福氣，直到永遠！」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。