約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 取石做記念
人民全部過約旦河
了後，上主to̍h吩咐約書亞，講：
4:2 「Tio̍h tùi人民中揀選十二個人，每支族一个人，
4:3 命令in講：『Lín tùi hia，tùi約旦河中，祭司ê腳tiāⁿ-tiāⁿ khiā ê所在，取十二塊石頭，帶來kah lín做伙過去，hē tī lín今暝beh歇睏ê所在。』」
4:4 約書亞就照伊tùi以色列人中所準備ê hit十二個人，每支族一个人，lóng叫in來。
4:5 約書亞to̍h kā in講：「Lín過去tī上主—lín ê上帝約櫃ê頭前，到約旦河中，照以色列人支族ê數額，ta̍k人取一塊石頭giâ tī肩胛頭。
4:6 Lín thang用chitê tī lín中間做證據。日後lín ê kiáⁿ孫若問lín講：『Chiahê石頭，對lín來講有啥物意義？』
4:7 Lin2to̍h thang對in講：『是因為以前約旦河ê水，tī上主ê約櫃前截斷；約櫃過約旦河ê時，約旦河ê水截斷。Chiahê石頭beh成做以色列人永遠ê記念。』」
4:8 以色列人照約書亞所命令ê來行，照以色列人支族ê數額，tùi約旦河中取十二塊石頭，lóng照上主對約書亞所講ê。In就帶hiahê石頭過去，到in歇睏ê所在，就hē tī hia。
4:9 約書亞另外用十二塊石頭khiā tī約旦河中，to̍h是tī扛約櫃ê祭司腳khiā ·leh ê所在；到今á日，hiahê石iáu koh tī hia。
4:10 扛約櫃ê祭司khiā tī約旦河中，thèng候上主命令約書亞對人民講ê tāichì做了後，是照摩西所命令約書亞一切ê話，人民就趕緊過去。
4:11 所有ê人民全部過去，上主ê約櫃kah祭司to̍h tī人民ê面前過去。
4:12 流便人、迦得人、瑪拿西半支族ê人，lóng照摩西所對in講ê，帶軍器tī以色列人ê頭前過去。
4:13 差不多有四萬人lóng準備交戰，tī上主ê面前過去，到耶利哥城ê平原，準備好勢teh beh交戰。
4:14 當hit日，上主hō͘約書亞tī以色列人民ê目chiu 前做大。Τī伊一生ê日子，人民敬畏伊，親像早前敬畏摩西。
4:15 上主吩咐約書亞講：
4:16 「你tio̍h命令扛法櫃ê祭司，tùi約旦河起來。」
4:17 約書亞to̍h命令祭司講：「Lín tùi約旦河起來。」
4:18 扛上主約櫃ê祭司tùi約旦河起來，祭司ê腳掌tútú踏tio̍h乾地ê時，約旦河ê水就流到原位，照原來漲滿雙pêng ê岸。
4:19 正月初十，人民tùi約旦河起來，就紮營tī吉甲，tī耶利哥城東pêng ê境界。
4:20 In tùi約旦河所取hit十二塊石頭，約書亞to̍h kā in chhāi tī 吉甲，
4:21 然後對以色列人講：「日後lín ê kiáⁿ孫若問in ê老父講：
4:22 『Chiahê石頭有啥物意義？』Hit時，lín tio̍h報lín ê kiáⁿ知，講：『以色列人bat行乾地，過chitê約旦河；
4:23 因為上主—lín ê上帝tī lín ê頭前hō͘約旦河ê水乾去，thèng候lín過來，親像上主—lín ê上帝以前tī紅海所做ê，to̍h是hō͘水tī咱ê頭前乾去，thèng候咱過來。
4:24 Án-ne beh hō͘地chiūⁿê萬民lóng知上主ê手有大能力，mā beh hō͘ lín永遠敬畏上主—lín ê上帝。』」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。