申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
5:1 十條誡
（出20：1-17）
摩西叫以色列人民來，對in講：「以色列人，lín tio̍h聽我今á日所傳hō͘ lín聽ê律例kah法度，hō͘ lín thang學習，koh執守來行。
5:2 上主—咱ê上帝tī何烈kah咱立約。
5:3 上主無kah咱ê祖先立chitê約，是kah咱chiahê，to̍h是kah咱今á日所有活tī chia ê人立ê。
5:4 上主tī山頂，tùi火中面對面kah lín講話。
5:5 (Hit時，我khiā tī上主kah lín ê中間，beh kā上主ê話傳hō͘ lín，因為lín為tio̍h hitê火來驚，無上山。)
5:6 「上主講：『我是上主—你ê上帝，bat chhōa你tùi埃及地，tùi做奴隸ê家出來ê。
5:7 「『我以外你m̄ thang有別个神明。
5:8 「『M̄-thang為kakī 雕刻偶像，無論天頂、地下kah地下水內所有ê物，lóng m̄ thang妝in ê像。
5:9 M̄-thang kā in跪拜，mā m̄ thang kā in服事，因為我—上主—你ê上帝，絕對m̄容允用別个神明kah我匹配。怨恨我ê人，我歸咎伊ê罪，tùi父到kiáⁿ，到三四代。
5:10 疼我koh遵守我誡命ê人，我ē施恩hō͘伊，一直到千代。
5:11 「『M̄-thang lāmsám稱上主—你ê上帝ê名，因為lāmsám稱祂ê名ê人，上主一定無掠伊做無罪。
5:12 「『Tio̍h守安息日，掠它做聖，照上主—你ê上帝所命令你ê。
5:13 六日內tio̍h勞苦做你一切ê工。
5:14 獨獨第七日，to̍h是ǹg上主—你ê上帝來守ê安息，chit日，你kah你ê kiáⁿ兒、奴僕、女婢、牛、驢、chengseⁿ，以及tòa tī你中間ê出外人，一切ê工lóng m̄ thang做，hō͘你ê奴僕kah女婢thang親像你來安息。
5:15 你mā tio̍h ē記得你以前tī埃及地做奴僕，上主—你ê上帝用大權能ê手，伸出來ê手骨，chhōa你tùi hia出來，因為ánne，上主—你ê上帝命令你tio̍h守安息日。
5:16 「『Tio̍h孝敬你ê老父，你ê老母，照上主—你ê上帝所命令你ê，hō͘你tī上主—你ê上帝所賞賜hō͘你ê所在，日子久長，來享受福氣。
5:17 「『M̄-thangthâi死人。
5:18 「『Mā m̄ thang行姦淫。
5:19 「『Mā m̄ thang偷the̍h。
5:20 「『Mā m̄ thang做假ê見證，來陷害你ê厝邊。
5:21 「『Mā m̄ thang貪你ê厝邊ê bó͘，mā m̄ thang貪你ê厝邊ê厝kah伊ê田園，伊ê奴僕、伊ê女婢、伊ê牛、伊ê驢á kah你ê厝邊一切所有ê。
5:22 「Chiahê話是上主tī山頂，tùi火中、雲中、烏暗中，大聲吩咐lín全會眾ê，mā無koh加添。祂mā kā in寫tī兩塊石碑，交帶我。」
5:23 人民Phi̍h-phi̍h-chhoah
(出20：18-21)
「Hit時，火焰燒tī山裡，lín聽tio̍h hitê tùi烏暗中出來ê聲，lín支族所有ê首領kah長老lóng來見我。
5:24 Lín講：『你看，上主—咱ê上帝顯明祂ê榮光kah祂ê至大hō͘阮看，阮koh聽tio̍h祂ê聲音tùi火中出來。今á日，阮mā知影上主kah人講話，人iáu會活。
5:25 Taⁿ阮m̄免tio̍h死kám m̄是？因為chitê大火ē kā阮燒滅，阮若koh聽tio̍h上主—咱ê上帝ê聲，to̍h ē死。
5:26 因為見若有肉體ê，啥人親像阮聽tio̍h永遠活命ê上帝tùi火中講話ê聲，iáu koh ē活leh？
5:27 你tio̍h進前去，聽上主—咱ê上帝所beh講一切ê話，kā上主所對你講一切ê話，你tio̍h對阮講，阮beh聽mā beh ánne行。』
5:28 「Lín對我講話，上主聽tio̍h lín講話ê聲，上主對我講：『我有聽tio̍h chiahê人民講話ê聲，to̍h是in所對你講ê；in所講ê話lóng好。
5:29 願in存chit款ê心來敬畏我，tiāⁿ-tiāⁿ 守我所有ê誡命，thang hō͘ in kah in ê kiáⁿ孫永遠得tio̍h福氣。
5:30 你去kā in講：Lín做lín tńg去lín ê布棚！
5:31 若是你，你tio̍h khiā tī我chia，我beh kā你所tio̍h教示in ê一切誡命、律例、法度，kā你講，hō͘ in tī我所賞賜hō͘ in做產業ê地ánne來行。』
5:32 「所以，lín tio̍h照上主—lín ê上帝所命令lín ê，tio̍h執守來照ánne行，m̄ thang偏左，mā m̄ tio̍h偏右。
5:33 上主—lín ê上帝所命令lín ê路，lín lóng tio̍h照ánne行，hō͘ lín活leh，得tio̍h福氣，mā hō͘ lín tī lín所beh承接ê地ê日子，得tio̍h久長。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。