民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
23:1 巴蘭對巴勒講：「你tī chia kā我起七座壇，kā我準備七隻牛káng，七隻羊káng。」
23:2 巴勒照巴蘭ê話來行；巴勒kah巴蘭tī ta̍k座ê壇，獻一隻牛káng，一隻羊káng。
23:3 巴蘭對巴勒講：「你khiā tī你燒祭ê邊á，我暫且進前去，kiámchhái上主來tú tio̍h我；祂指示我啥物，我ē kā你講。」巴蘭to̍h去無草木ê山。
23:4 上帝tú tio̍h巴蘭，巴蘭對祂講：「我已經準備七座壇，tī ta̍k座壇獻一隻牛káng，一隻羊káng。」
23:5 上主用話交帶巴蘭，koh kā伊講：「你tńg去巴勒hia，tio̍h ánne kā伊講。」
23:6 伊to̍htng2去巴勒hia，看tio̍h伊kah摩押ê首領lóng khiā tī伊燒祭ê邊á。
23:7 巴蘭就提起伊ê歌，講：巴勒chhōa我tùi亞南來，摩押王chhōa我出東pêng ê山，講：來！kā我咒詛雅各； 來！咒罵以色列。
23:8 上帝無咒詛ê，我ná ē咒詛？上主無咒罵ê，我ná ē咒罵？
23:9 因為我tùi chiahê山巖看，koh tùi山尾溜觀看，你看，chiahê人民beh kakī tòa。無列tī chiahê國ê中間。
23:10 啥人ē tàng算雅各ê土沙？啥人ē tàng算以色列ê四分之一？我願親像義人ê死來死，mā親像伊ê結局來結局。
23:11 巴勒對巴蘭講：「你對我做ê是啥物？我叫你來咒詛我ê對敵，你看，你lóng是kā in祝福。
23:12 巴蘭應講：「上主所交帶我ê話，我kám免tio̍h謹慎來講？」
23:13 巴蘭第二pái ê預言
巴勒對伊講：「求你kah我去別位，tī hia thang看tio̍h in，你只有會看tio̍h in ê一角頭，bē tàng 所有看tio̍h；tī hia tio̍h 為我kā in咒詛。」
23:14 Tùi hit時，巴勒to̍h chhōa巴蘭到Só-hui ê山野，上毗斯迦ê山頭，起七座壇，ta̍k座壇獻一隻牛káng，一隻羊káng。
23:15 巴蘭對巴勒講：「你tòa chia，khiā tī你燒祭ê邊á，thèng候我去hia見上主。」
23:16 上主tú tio̍h巴蘭，用話交帶伊，koh講：「你tńg去巴勒hia，tio̍h ánne講。」
23:17 伊to̍htng2去巴勒hia，看tio̍h伊khiā tī燒祭ê邊á，摩押ê首領mā kah伊tī hia。巴勒問伊講：「上主kám有講啥物話？」
23:18 巴蘭就提起伊ê歌，講：巴勒，起來聽；西撥 ê kiáⁿ，你àⁿ耳孔來聽我。
23:19 上帝m̄是親像人，ē講白賊， mā m̄是人ê kiáⁿ，會後悔；祂已經講：kám無行？祂講出，kám無應驗？
23:20 你看，我奉命祝福，祂所應允ê福氣，我bē kā它péng倒tńg。
23:21 祂無看tio̍h雅各有過失，tī以色列無看tio̍h有奸惡， 上主—伊ê上帝kah伊同在；tī in中間有oló王ê聲。
23:22 上帝chhōa in出埃及；in親像有野牛ê力。
23:23 雅各中絕對無法術，以色列中mā無占卜；到時論起雅各kah以色列beh講：上帝行hiahni̍h大ê tāichì！
23:24 你看，chiahê人民起來親像母ê獅， 挺身親像公ê獅； iáu未食所la̍k tio̍h ê物，iáu未lim受咬死ê ê血， 決斷無倒teh。
23:25 巴勒對巴蘭講：「你lóng m̄ thang kā in咒詛，mā m̄ thang kā in祝福。」
23:26 巴蘭應巴勒講：「我kám無kā你講，見若上主所講ê，我beh遵thàn？」
23:27 巴蘭第三pái ê預言
巴勒對巴蘭講：「來！我chhōa你去別所在，kiámchhái上主歡喜你tī hia為我kā in咒詛。」
23:28 巴勒to̍h chhōa 巴蘭到hitê看落去，會看tio̍h曠野ê毗珥 ê山頂。
23:29 巴蘭對巴勒講：「你tī chia kā我起七座壇，koh tī chia kā我準備七隻牛káng，七隻羊káng。」
23:30 巴勒就照巴蘭ê話去行，tī ta̍k座壇獻一隻牛káng，一隻羊káng。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。