民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
9:1 第二个Pôaⁿ過節
出埃及了後第二年ê正月，上主tī西奈曠野，命令摩西講：
9:2 「以色列人應該tī定tio̍h ê日期守Pôaⁿ過節，
9:3 tī本月十四黃昏ê時，lín tio̍h tī所定tio̍h ê日來守，照祂一切ê律例kah一切ê法度來守。」
9:4 就ánne，摩西吩咐以色列人守Pôaⁿ過節。
9:5 正月十四黃昏ê時，in to̍hti7西奈ê曠野，守Pôaⁿ過節；見若上主所命令摩西ê，以色列人lóng照ánne行。
9:6 有幾nā个人hō͘人ê身屍bak tio̍h soah無清氣，bē tàng tī hit日守Pôaⁿ過節。當hit日，in來到摩西kah亞倫ê面前。
9:7 Hiahê人kā in講：「阮因為hō͘人ê身屍bak tio̍h soah無清氣，án怎阻擋阮bē tàng tī以色列中，tī所定tio̍h ê日期獻禮物hō͘上主？」
9:8 摩西kā in講：「Lín khiā-teh thèng候，我beh聽上主án怎kā lín吩咐。」
9:9 上主吩咐摩西講：
9:10 「你tio̍h吩咐以色列人講：Á是lín á是lín ê kiáⁿ孫ê中間，若有人hō͘身屍bak tio̍h soah無清氣，á是遠遠tī路裡，猶原tio̍h守上主ê Pôaⁿ過節。
9:11 In tio̍h tī二月十四黃昏ê時來守，chham無酵餅kah苦菜來食。
9:12 M̄-thang留一點á到隔工早起，羊á ê骨一支都m̄ thang phah斷。In tio̍h照Pôaⁿ過節chiahê律例來守。
9:13 總是，人若清氣mā m̄是tī路中，若kakī 推辭m̄守Pôaⁿ過節，tio̍h tùi伊ê人民中間kā hitê人剪除，因為伊tī所定tio̍h ê日無獻禮物hō͘上主，hitê人tio̍h擔當伊kakī ê罪。
9:14 「若有出外人寄腳tī lín中間，ài守上主ê Pôaⁿ過節，伊tio̍h照Pôaⁿ過節ê律例kah法度來行；出外人kah本地人tio̍h照仝一个律例來行。」
9:15 雲彩
( 出40：34-38)
起會幕hit日，有雲遮（cha̍h）tio̍h會幕，to̍h是證據ê布棚；tùi ê-hng到早起，有親像火ê款式蓋tī會幕。
9:16 tiāⁿ-tiāⁿ 是ánne，雲遮teh，暗時親像火ê款式。
9:17 雲tùi布棚收tńg去，以色列人to̍h出發；雲停ê所在，以色列人to̍h紮營tī hia。
9:18 以色列人照上主ê命令出發，mā照上主ê命令紮營；雲停tī會幕頂ê時，in to̍h猶原紮營tī hia。
9:19 雲tī會幕頂停真chē日，以色列人to̍h守上主所交帶ê，無出發。
9:20 有時雲tī會幕頂幾nā日，in照上主ê命令猶原紮營tī hia，mā照上主ê命令出發。
9:21 有時tùi ê-hng到早起雲遮teh，早起時雲收tńg去，in to̍h出發；無論日時暗時，雲收tńg去，in to̍h出發。
9:22 雲停tī會幕，無論是兩日á是一月日á是一年，以色列人猶原紮營tī hia，無出發；總是，雲收tńg去，in to̍h出發。
9:23 In遵thàn上主ê命令紮營，mā遵thàn上主ê命令出發；in守上主所交帶ê，lóng照上主託摩西所命令ê。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。