約翰一書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
5:1 贏過世間
相信耶穌是基督ê人，lóng是上帝ê kiáⁿ兒；疼父母ê，mā ē疼in所生ê kiáⁿ兒。
5:2 咱若疼上帝koh遵守祂ê誡命，ánne咱to̍h知咱有teh疼上帝ê kiáⁿ兒。
5:3 遵守上帝ê誡命，to̍h是疼上帝；祂ê誡命m̄是oh遵守ê。
5:4 因為上帝ê kiáⁿ兒lóng ē tàng贏過世間；咱ê信仰hō͘咱贏過世間。
5:5 贏過世間ê是啥人？Kám m̄是hiahê相信耶穌是上帝ê Kiáⁿ ê人？
5:6 見證耶穌基督
Chitê耶穌基督是tùi水kah血來ê；m̄是kantaⁿ用水，是用水kah血。
5:7 聖神親自見證chitê事實，因為聖神to̍h是真理。
5:8 有三个teh做見證，to̍h是聖神、水kah血，chit三个見證lóng有一致。
5:9 人ê見證咱都teh接受，上帝ê見證當然koh khah有效力，因為chitê是上帝為tio̍h祂ê Kiáⁿ所做ê見證。
5:10 信上帝ê Kiáⁿ ê人，tī心內有chitê見證；m̄信上帝ê奴僕，to̍h是掠做上帝teh講白賊，因為伊m̄信上帝為tio̍h祂ê Kiáⁿ所做ê見證。
5:11 Chitê見證to̍h是：上帝已經有賞賜永遠ê活命hō͘咱，chitê活命是tùi祂ê Kiáⁿ來ê。
5:12 有kah上帝ê Kiáⁿ結聯ê人to̍h有chitê活命；無kah上帝ê Kiáⁿ結聯ê人to̍h無chitê活命。
5:13 永遠ê活命
我寫chiahê tāichì，是beh hō͘ lín知影，信上帝ê Kiáⁿ ê人有永遠ê活命。
5:14 咱tī上帝ê面前勇敢無驚惶，因為咱確信，若照祂ê旨意，無論求啥物，祂lóngē聽咱ê祈求。
5:15 既然咱確信祂ē聽咱ê祈求，咱就ánne知影，咱對祂祈求ê已經得tio̍h。
5:16 人若看tio̍h兄弟á是姊妹犯tio̍h bē致到死ê罪，tio̍h ǹg上帝祈求，上帝會賞賜伊活命；人所犯ê若是ē致到死ê罪，我無講tio̍h為chit款罪人祈禱。
5:17 所有不義ê行為lóng是犯罪，m̄ koh，mā有免致到死ê罪。
5:18 警誡
咱知上帝ê kiáⁿ兒bē繼續犯罪，因為有上帝ê Kiáⁿ teh kā伊保守，hitê魔鬼kha̍p伊bē tio̍h。
5:19 咱知咱是屬上帝，m̄ koh，全世間lóng受hitê魔鬼管轄。
5:20 咱mā知上帝ê Kiáⁿ已經臨到，祂koh hō͘咱曉悟，來認bat hit位真實ê上帝。咱kah真實ê上帝結聯，因為咱kah祂ê Kiáⁿ耶穌基督mā有結聯。Chit位是真實ê上帝，mā是永遠ê活命。
5:21 細kiáⁿ，lín tio̍h謹慎，閃避偶像。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。