約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
15:1 耶穌是真ê葡萄樹
「我是真ê葡萄樹，我ê天父是栽葡萄ê人。
15:2 連tī我ê枝無結果子ê，祂to̍h kā它剪除；有結果子ê枝，祂to̍h kā它修剪，hō͘它結koh khah chē果子。
15:3 Taⁿ因為lín接受我所kā lín講ê道理，lín已經hō͘祂修整好勢à。
15:4 Lín tio̍h kah我結聯，我mā kah lín結聯。Tú親像枝無連tī葡萄樹，kakī bē結果子，lín若無kah我結聯，mā是ē ánne。
15:5 「我to̍h是葡萄樹，lín to̍h是枝；tiàm tī我內面ê，我mā tiàm tī伊ê內面，to̍h ē結果子真chē；因為若kah我相離，lín to̍hbe7 tàng做啥物。
15:6 人若無kah我結聯，ē親像樹枝hō͘人hiat去外面，soah乾去，人ē kā in拾做堆，hiat落火去燒。
15:7 Lín若kah我結聯，我ê話tī lín內面，lín若ài啥物，求就ē kā lín成全。
15:8 Lín若結真chē果子，真正做我ê門徒，我ê天父ē因為ánne得tio̍h榮光。」
15:9 彼此相疼
「親像天父有疼我，我mā有疼lín，lín tio̍h tiàm tī我ê疼內面。
15:10 Lín若遵守我ê誡命，lín to̍h ētiàm tī我ê疼內面；親像我有遵守我ê天父ê誡命，tiàm tī祂ê疼內面。
15:11 「我kā lín講chiahê tāichì，是beh hō͘ lín內面有我ê歡喜 ，ánne lín ê歡喜to̍h ē滿滿。
15:12 親像我有疼lín，lín tio̍h相疼；這是我ê命令。
15:13 人為tio̍h朋友犧牲性命，無koh有比這khah大ê疼。
15:14 Lín若遵守我ê命令，lín to̍h是我ê朋友。
15:15 我無koh叫lín做奴僕，因為奴僕m̄知主人teh做啥物。Taⁿ我已經kā lín叫做朋友，因為我tùi天父所聽tio̍h ê，lóng有kā lín講à。
15:16 M̄是lín揀選我，是我揀選lín，mā任命lín，hō͘ lín去結果子，koh hō͘ lín ê果子久長保存。Án-ne，hō͘ lín ē tàng奉我ê名來對天父求，祂lóngē kā lín成全。
15:17 這是我hō͘ lín ê命令：Lín tio̍h相疼。」
15:18 世間ê怨恨
「世間若怨恨lín，lín tio̍h知伊怨恨lín以前to̍h tāi先怨恨我。
15:19 Lín若屬chit世間，世間to̍h ē看lín做kakī ê人來疼lín；獨獨因為lín無屬chit世間，我已經kā lín tùi世間揀選出來，所以，世間ē怨恨lín。
15:20 Lín tio̍h記tiâu我kā lín講ê話：奴僕bē比主人khah大。人若迫害我，mā ē迫害lín；in若遵守我ê話，mā ē遵守lín ê話。
15:21 M̄ koh，因為lín是我ê門徒，in to̍hē ánne對待lín，因為in m̄ bat差派我來ê hit位。
15:22 我若m̄ bat來kā in講，in to̍h無罪；taⁿ in無法度為kakī ê罪來辯解。
15:23 怨恨我ê人mā ē怨恨我ê天父。
15:24 我tī in中間若無做別人m̄ bat做ê tāichì，in to̍h無罪，m̄ koh，taⁿ in有看tio̍h我所做ê工作，iáu koh teh怨恨我kah天父。
15:25 這是beh應驗in ê律法所記載ê話：In無緣無故怨恨我。(註：詩35：19；69：4)
15:26 「hit位保惠師，to̍h是真理ê聖神，ē tùi天父hia來lín chia。我tùi天父hia差聖神來lín chia，是beh為我做見證。
15:27 Lín mā tio̍h為我做見證，因為lín tùi起頭to̍h kah我做伙。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。