約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權) 客語 現代客語 福州話 粵語和合本 希臘文(WH-NT) 下載檔案 關於語音聖經
11:1 拉撒路ê死亡
有一个病人,名叫做拉撒路,伊tòa tī伯大尼,to̍h是馬利亞kah她ê阿姊馬大ê庄頭。
11:2 Chitê馬利亞to̍h是bat用芳油抹主ê腳,koh用她ê頭毛kā它拭ê hitê;她ê小弟拉撒路teh破病。
11:3 In兩姊妹to̍h差人去chhōe耶穌,講:「主ah,祢所疼ê人teh破病。」
11:4 耶穌聽tioh8to̍h講:「Chitê病bē致到死,這是為tio̍h beh顯明上帝ê榮光,hō͘上帝ê Kiáⁿ tùi chitê tāichì得tio̍h榮光。」
11:5 耶穌真疼馬大kah她ê小妹,以及拉撒路。
11:6 耶穌聽tio̍h拉撒路破病,繼續tī hit所在koh tòa兩日。
11:7 後來,to̍h kā門徒講:「咱koh來去偤太。」
11:8 門徒kā祂講:「老師,近來偤太人ài beh用石頭kā祢tìm,祢kám beh koh去hia?」
11:9 耶穌應講:「日時kám m̄是有十二點鐘?人若日時行路to̍h bē跋倒,因為有看見chit世間ê光。
11:10 總是,人若暗時行路,to̍h ē跋倒,因為無光thang照路。」
11:11 耶穌講chiahê話了後,koh kā in講:「咱ê朋友拉撒路teh睏,我beh來去kā伊叫醒。」
11:12 門徒講:「主ah,伊若是teh睏,to̍h ē好起來。」
11:13 耶穌是講拉撒路已經死去,m̄ koh,in掠準是講伊真正teh睏。
11:14 所以,耶穌明白kā in講:「拉撒路死去à。
11:15 我mā為tio̍h lín歡喜,因為我無tī hia是beh hō͘ lín信我;taⁿ咱來去伊hia。」
11:16 叫做雙生á ê多馬kā門徒同伴講:「咱mā來去,thang kah祂做伙死。」
11:17 耶穌是Koh活kah活命
耶穌去到位ê時,拉撒路已經埋葬tī墓裡四日ā。
11:18 伯大尼離耶路撒冷約三公里。
11:19 有真chē偤太人因為拉撒路死去,來安慰馬大kah馬利亞。
11:20 馬大聽tio̍h耶穌來,to̍h出去迎接,馬利亞猶原坐tī厝內。
11:21 馬大對耶穌講:「主ah,祢若tī chia,阮小弟to̍h bē死。
11:22 Taⁿ我mā知,祢對上帝求啥物,上帝一定ēhō͘祢。」
11:23 耶穌kā她講:「你ê小弟ē koh活起來。」
11:24 馬大應講:「我知tī末日koh活ê時,伊ēkoh活起來。」
11:25 耶穌kā她講:「我是koh活kah活命。信我ê人雖然死去,iáu koh ē活起來;
11:26 chitmá活leh來信我ê人,永遠bē死。你有ánne信無?」
11:27 馬大應講:「主ah,我信祢是基督,上帝ê Kiáⁿ,是teh beh來世間ê hit位。」
11:28 耶穌流目屎
馬大講chiahê話了後to̍h tńg去,叫伊ê小妹馬利亞來,私下kā她講:「老師來ā,祂teh叫你。」
11:29 馬利亞聽tio̍h就趕緊起來,走去耶穌hia。
11:30 Hit時,耶穌iáu未入去庄頭,iáu tī馬大迎接祂ê所在。
11:31 Hiahê kah馬利亞tī厝內teh安慰她ê偤太人,看tio̍h她趕緊起來出去,就tòe她去,想講她beh去墓裡啼哭。
11:32 馬利亞來到耶穌hia,看tio̍h祂to̍h仆tī祂ê腳前,kā祂講:「主ah,祢若tī chia,我ê小弟to̍h bē死去。」
11:33 耶穌看tio̍h她teh啼哭,kah她做伙來ê偤太人mā teh啼哭,to̍h真慼心,吐一下大氣,
11:34 問in講:「Lín kā伊葬tī啥物所在?」Into̍h kā祂講:「主ah,咱來去看。」
11:35 耶穌流目屎。
11:36 Hiahê偤太人講:「你看,祂hiahni̍h疼chitê人!」
11:37 其中有一kóa人講:「祂bat hō͘ chheⁿmê ·ê koh看見,kám bē tàng hō͘ chitê人mài死?」
11:38 耶穌hō͘拉撒路Koh活
耶穌來到墓裡,心內又koh真悲傷。Hitê墓是石洞,有一塊石頭塞teh。
11:39 耶穌講:「徙開hit塊石頭。死人ê阿姊馬大kā祂講:「主ah,伊已經死四日à,taⁿ一定真臭。」
11:40 耶穌kā她講:「我kám無kā你講,你若信to̍h ē看tio̍h上帝ê榮光?」
11:41 Into̍h kā hit塊石頭徙開。耶穌gia̍h頭ǹg天,講:「天父ah,我感謝祢,因為祢已經有聽我ê祈禱。
11:42 我知祢不時都有teh聽我ê祈禱,獨獨我ánne講,是為tio̍h khiā tī四箍圍ê群眾,beh hō͘ in相信祢有差派我來。」
11:43 耶穌講soah,to̍h大聲hoah:「拉撒路,出來!」
11:44 Hitê死人to̍h出來,腳手用布包teh,面用巾á罩teh。耶穌kā in講:「Kā伊tháu開,hō͘伊行路。」
11:45 害死耶穌ê計謀
(太26:1-5;可14:1-2;路22:1-2)
來teh安慰馬利亞ê偤太人,看tio̍h耶穌所做ê tāichì,真chē人to̍h信祂。
11:46 有一kóa人去chhōe法利賽派ê人,kā in報告耶穌所做ê tāichì。
11:47 就ánne,hiahê祭司長kah法利賽派ê人召集開會,講:「Taⁿ chitê人行hiah chē神跡,咱tio̍h án怎來對付?。
11:48 咱若放祂ánne繼續做落去,群眾會去信祂,羅馬人ē來毀滅咱ê聖殿,koh消滅咱ê民族。」
11:49 其中一个人叫做該亞法,是hit年ê大祭司。伊kā in講:「Lín m̄知半項,
11:50 mā無想看māi lè,寧可hō͘一个人替眾人死,chiah免hō͘全民族滅亡。Án-ne對lín khah有利。」
11:51 伊ánne講m̄是出tī kakī ê意思,是因為hit年伊做大祭司,伊teh預言耶穌ē為tio̍h chitê民族來死;
11:52 m̄ nā為tio̍h chitê民族,mā是beh kā上帝四散ê kiáⁿ兒聚集做一伙。
11:53 Tùi hit日起,hiahê偤太人to̍h計謀behthâi耶穌。
11:54 Pôaⁿ過節teh beh到
因為ánne,耶穌無koh公開tī偤太人ê中間出入。祂to̍h離開hia,去óa近曠野ê所在,到一个叫做以法連ê城,kah門徒tī hia tòa。
11:55 偤太人ê Pôaⁿ過節teh beh到,節期進前,真chē人tùi庄頭上來耶路撒冷,beh守潔淨禮。
11:56 In teh chhōe耶穌,koh khiā tī聖殿內,互相問講:「Lín想án怎?祂一定ē來過節ho͘ⁿh?」
11:57 Chiahê祭司長kah法利賽派ê人有發出命令,若有人知耶穌tī tó位,tio̍h來報告,hō͘ in thang去kā祂掠起來。
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。