出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
37:1 造約櫃
(出25：10-22)
比撒列用皂莢柴做櫃，長兩肘半，闊肘半，koân肘半。
37:2 內外用純金包起來，四箍圍做金線齒，
37:3 tī它ê四腳kā它鑄四個金環，chit pêng兩環，hit-pêng兩環。
37:4 用皂莢柴做兩支槓，用金包起來。
37:5 kā槓穿tī櫃邊ê環內，thang扛櫃。
37:6 用純金做施恩所，長兩肘半，闊肘半。
37:7 用金做兩 个ki-lō͘-peng，用chhia ê方法來做，tī施恩所ê雙頭，
37:8 chit頭一个ki-lō͘-peng，hit頭一个ki-lō͘-peng，兩 个ki-lō͘-peng tī施恩所ê雙頭kah它連做一塊。
37:9 兩 个ki-lō͘-peng koân-koân thí開翼，用in ê翼遮（cha̍h）施恩所，in ê面相對；ki-lō͘-peng ê面àⁿ施恩所。
37:10 造供桌
(出25：23-30)
伊用皂莢柴做桌á，長兩肘，闊一肘，koân肘半，
37:11 用純金包起來，四箍圍kā它做金線齒。
37:12 桌á ê四箍圍各做一巴掌闊ê橫樑，橫樑頂ê四箍圍做金線齒。
37:13 Kā它鑄四個金環，安置tī它ê四腳ê四個角。
37:14 安環ê所在óa近橫樑，thang穿槓來扛桌。
37:15 用皂莢柴做兩支槓，用金包起來，thang扛桌。
37:16 Mā做桌頂ê器具，它ê盤、碗、瓶、杯thang來灌奠，lóng用純金來做。
37:17 造燈台
(出25：31-40)
伊用純金做燈台，燈台ê座kah中柱，它ê杯，它ê枝，它ê花，lóng用phah ê方法，做kui座。
37:18 它ê邊á分出六支，燈台ê chit pêng有三支，燈台ê hit-pêng有三支；
37:19 chit pêng每支有三个杯，款式親像杏花，有枝koh有花；hit-pêng每支mā有三个杯，款式親像杏花，有枝koh有花。Tùi燈台分出ê六支lóng是ánne。
37:20 燈台柱有四個杯，款式親像杏花，有它ê枝kah它ê花。
37:21 兩支ê下面有一枝kah它相連，koh另外兩支ê下面有一枝kah它相連，koh另外兩支ê下面有一枝kah它相連；燈台所出ê六支lóng是ánne。
37:22 Hiahê枝kah hiahê花lóng kah它連做一个，lóng用純金，照phah ê方法來做。
37:23 Mā kā它做七个燈盞，以及它ê剪kah它ê盤，lóng用純金做ê。
37:24 做燈台kah所有ê器具，用純金一他連得。
37:25 造香壇
(出30：1-5)
伊用皂莢柴做香壇，長一肘，闊一肘，款式四角形，高兩肘，它hiahê角kah壇lóng連做一塊。
37:26 壇kah它ê頂面，kah它ê四箍圍，kah它hiahê角，lóng用純金包起來，mā tī它ê四箍圍做金線齒。
37:27 Koh kā它做兩 个金環，安置tī齒線ê下面，做tī壇ê雙pêng兩支橫桿ê頂面，chiahê環是做穿槓ê路用，thang扛壇。
37:28 用皂莢柴做槓，用金包起來。
37:29 製造油kah香
(出30：21-38)
Koh照做芳味ê方法，做thang抹ê聖油kah上等芳料ê香。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。