路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權) 客語 現代客語 粵語和合本 希臘文(WH-NT) 下載檔案 關於語音聖經
15:1 失落羊ê譬喻
(太18:12-14)
有一pái,真chē抽稅ê kah罪人來耶穌hia beh聽祂講道理。
15:2 法利賽派ê人kah經學教師nga̍uh-nga̍uh念,講:「Chitê人接納罪人koh kah in做伙食飯!」
15:3 耶穌to̍h用一个譬喻對in講:
15:4 「Lín中間若啥人有一百隻羊,phah-m̄見一隻,伊kám bē暫且放九十九隻tī山裡,去chhōe phah-m̄見ê hit隻,一直到chhōe tio̍h為止?
15:5 Chhōe tio̍h了後to̍h歡喜,kā hit隻羊揹 tòa肩胛頭,
15:6 tńg到厝to̍h叫厝邊ê朋友來,kā in講:「來kah我tàu歡喜,因為我chhōe tio̍h phah-m̄見ê hit隻羊。』
15:7 我kā lín講,tī天頂mā親像ánne,ē為tio̍h罪人中間有一个人悔改來歡喜,比為tio̍h有九十九個m̄免悔改ê義人koh khah歡喜。」
15:8 失落錢ê譬喻
「Á是有一个婦人人有十個銀á,若phah-m̄見一个,她kám bē點燈,拚掃厝內,phah拚chhōe到chhōe ·tio̍h?
15:9 她一下chhōe ·tio̍h,to̍h叫朋友kah厝邊來,kā in講:『來kah我tàu歡喜,因為我phah-m̄見ê銀á已經chhōe ·tio̍h。』
15:10 我kā lín講,親像ánne,上帝ê天使mā ē為tio̍h罪人中間有一个人悔改來歡喜。」
15:11 失落Kiáⁿ ê譬喻
耶穌koh講:「有一个人有兩 个kiáⁿ。
15:12 Hitê細漢kiáⁿ kā老父講:『阿爸,請kā我應該得ê財產分hō͘我。』老父就分家伙hō͘兩 个kiáⁿ。
15:13 隔無幾日,hitê細漢kiáⁿ kā所得tio̍h ê財產全部換做現金,to̍h出外去真遠ê所在。伊tī hia放蕩亂開錢。
15:14 伊kā所有ê錢開了了ê時,hit所在tú tio̍h大飢荒,伊chiah覺悟欠缺ê艱苦。
15:15 伊to̍h去hō͘ hit所在ê一个人倩,hitê人差伊去山裡ê園飼豬。
15:16 伊iau kah想beh the̍h豬teh食ê豆粕來止iau,mā lóng無人beh hō͘伊食。
15:17 後來,伊覺醒講:『我ê老父有hiah chē長工,米糧食kah有chhun,m̄ koh,我tī chia iaukah teh beh死去。
15:18 我beh tńg來去chhōe我ê老父,kā伊講:『阿爸,我有得罪天,mā有得罪你。
15:19 Taⁿ我無資格koh做你ê kiáⁿ。請hō͘我做你ê長工to̍h好。』
15:20 伊to̍h出發tńg去chhōe伊ê老父。離in老父iáu koh真遠ê時,老父to̍h看tio̍h伊,感覺真m̄甘,走óa去kā伊攬teh,直直kā伊chim。
15:21 Kiáⁿ kā老父講:『阿爸,我有得罪天,mā有得罪你,taⁿ我無資格koh做你ê kiáⁿ。』。
15:22 M̄ koh,老父對hiahê奴僕講:『緊hiaⁿh siōng好ê衫來kā伊穿,kā伊掛手指,koh kā伊穿鞋;
15:23 續牽hit隻肥ê牛á-kiáⁿ來thâi,來辦桌歡喜慶祝。
15:24 因為我chitê kiáⁿ死去有koh活,phah-m̄見有koh chhōe ·tio̍h。』Into̍h做伙歡喜慶祝。
15:25 「Hit時,大kiáⁿ tùi園裡tńg來beh到厝ê時,聽tio̍h奏樂kah跳舞ê聲。
15:26 伊叫一个奴僕來,問伊看是teh做啥物tāichì。
15:27 Hitê奴僕kā伊講:『Lín小弟tńg來à,lín老父因為伊平安無事tńg來,所以,thâi hit隻肥ê牛á-kiáⁿ。』
15:28 大kiáⁿ真受氣,m̄入去;老父出來kā伊苦勸。
15:29 伊應老父講:『你看,我服事你hiah chē年,lóng m̄ bat違背你ê命令,你mā m̄ bat hō͘我一隻羊á-kiáⁿ,thang kah我ê朋友做伙歡喜lim食。
15:30 總是,你chitê kiáⁿ,交陪娼妓,kā你分hō͘伊ê財產全部開了了。伊一下tńg來,你to̍h為tio̍h伊thâi肥ê牛á-kiáⁿ。』
15:31 老父kā伊講:『我ê kiáⁿ,你tiāⁿ-tiāⁿ kah我做伙,我所有ê財產lóng是你ê。
15:32 M̄ koh,你ê小弟死有koh活,phah-m̄見有koh chhōe ·tio̍h,咱應該tio̍h來歡喜慶祝。』」
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。