路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權) 客語 現代客語 粵語和合本 希臘文(WH-NT) 下載檔案 關於語音聖經
12:1 警戒假好ê人
Hit時,幾nā萬人聚集óa來,致使到互相thún踏。耶穌to̍h對門徒講:「Lín tio̍h提防法利賽派ê人ê酵,to̍h是in ê假好。
12:2 無一項蓋密ê tāichì bē露現,每一項祕密ê tāichì到時mā lóngē hō͘人知影。
12:3 所以,lín tī烏暗中所講ê,ē tī光明中hō͘人聽tio̍h。Lín tī房間內耳孔邊所講ê,ē hō͘人tī厝尾頂公開宣布。」
12:4 Tio̍h敬畏上帝
(太10:28-31)
「我ê朋友,我kā lín講,害死lín ê身軀了後bē tàng koh對lín做啥物ê人,lín m̄免驚in。
12:5 我beh指示lín tio̍h敬畏啥物款人;lín tio̍h敬畏上帝,祂hō͘人死了後koh有權柄kā人hiat落去地獄。是lah,我kā lín講,tio̍h驚Chit位!
12:6 「五隻雀鳥á kám m̄是賣兩角銀?Tī上帝ê面前,連一隻都無bē記得。
12:7 甚至連lín ê頭毛to lóng有算過。m̄免驚,lín比hiahê雀鳥á koh khah貴重。」
12:8 公開承認基督
(太10:32-33;12:32;10:19-20)
「我kā lín講,tī人ê面前承認我ê,人子tī上帝ê天使面前mā ē kā伊承認。
12:9 M̄ koh,tī人ê面前無承認我ê,tī上帝ê天使面前,人子mā無beh kā伊承認。
12:10 「人若講話攻擊人子ê,iáuē得tio̍h赦免;若是褻瀆聖神ê,to̍h bē tàng赦免。
12:11 「人若押lín去到會堂á是統治者kah官員ê面前,lín m̄免煩惱beh án怎辯解á是tio̍h講啥物。
12:12 因為到時聖神ē教lín tio̍h講啥物話。」
12:13 警告貪心ê財主
眾人中間有一个財主kā耶穌講:「老師,請你叫我ê兄弟kah我分家伙。」
12:14 M̄ koh,耶穌kā伊講:「你chitê人,啥人設立我做lín ê審判官á是做分家伙ê公親?」
12:15 耶穌to̍h對群眾講:「Tio̍h謹慎,tio̍h約束kakī ,tio̍h提防各種ê貪心,因為人ê活命價值m̄是在tī伊所積聚ê財產。」
12:16 然後耶穌用譬喻對in講:「有一个好額人,伊ê田園真豐收。
12:17 伊想來想去,講:『我無夠所在thang囤我ê五穀,taⁿ beh án怎?』
12:18 Koh講:『我tio̍h ánne做:我beh kā粟倉拆掉,koh起khah大間,thang kā我ê五穀kah財物lóng囤tòa hia。
12:19 然後mā beh對我ê靈魂講:『靈魂ah,你有積聚真chē財物thang做真chē年ê路用。Taⁿ清閒ā,來lim食,來享受!』
12:20 M̄ koh,上帝kā伊講:『戇人,今暝beh對你討你ê性命,你所積聚ê財產beh留hō͘啥人?』
12:21 Án-ne,為tio̍h kakī 積聚財寶,無hō͘上帝看做好額ê人mā是仝款。」
12:22 M̄免操煩
(太6:25-34,19-21))
耶穌koh對門徒講:「所以,我kā lín講,m̄ thang為tio̍h lín ê性命操煩beh食啥物,á是為tio̍h lín ê身軀操煩beh穿啥物。
12:23 因為性命比食物khah重要,身軀比衫褲khah價值。
12:24 Lín看烏鴉,in雖然無種作,無收成,mā無倉庫,無粟倉,上帝iáu koh teh kā in養飼。Lín kám無比hiahê鳥á khah貴重?
12:25 Lín kám有人想講操煩ē tàng hō͘ kakī ê性命加活一時á久?
12:26 Taⁿ lín既然連chiahni̍h細項tāichì都無法度做,ná tio̍h操煩其他ê tāichì?
12:27 Lín小想看māi lè,百合花án怎teh大欉?In無勞苦,mā無紡織。M̄ koh,我kā lín講,當所羅門siōng榮華富貴ê時,伊所穿ê衫都無比chiahê花ê一蕊khah súi。
12:28 Taⁿ山裡ê草,今á日teh活,明á載to̍h hō͘人hiat落去火爐,上帝iáu koh ánne teh kā in打扮,祂kám bē koh khah kā lín看顧? Lín ná ē chiahni̍h無信心?
12:29 所以,lín m̄ thang kantaⁿ7 teh想beh食啥物,beh lim啥物,mā m̄ thang操煩。
12:30 因為chiahê lóng是chit世間ê未信者所teh求ê,lín ê天父mā知lín需要chiahê物件。
12:31 Lín顛倒tio̍h tāi先追求上帝國度,chiahê物件會順續賞賜hō͘ lín。
12:32 「Lín chiahê細細ê羊群,m̄免驚,因為lín ê天父歡喜kā祂ê國度hō͘ lín。
12:33 Tio̍h賣lín ê財產來賑濟sànchhiah人,tio̍h為lín kakī 準備bē破ê錢袋á,來積聚用bē了ê財寶tī天頂。Tī hia無賊áē來偷the̍h,mā bē有蟲蛀。
12:34 因為lín ê財寶tī tó位,lín ê心mā ē去tī hia。」
12:35 謹慎Thèng候ê奴僕
「Lín ê衫tio̍h穿好勢,lín ê燈tio̍h點ho͘ to̍h。
12:36 Lín tio̍h親像人teh thèng候in ê主人tùi婚宴tńg來。主人到位,一下phah門thang隨時kā伊開。
12:37 主人tńg來,看tio̍h in醒醒,hiahê奴僕真有福氣。我實在kā lín講,主人ēkakī hâ圍su裙,請in坐桌,來kā in侍候。
12:38 Kiám-chhái主人ētī半暝á是天phú光ê時tńg來,看tio̍h in醒醒,hiahê奴僕真有福氣。
12:39 主人若知賊á tang時chūnē來,伊to̍h ētiuⁿ-tî,一定bē hō͘賊á入來伊ê厝,這是lín知影ê tāichì。
12:40 所以,lín mā tio̍h準備便便,因為人子ē tī lín想bē到ê時chūn來臨。」
12:41 彼得講:「主ah,祢chitê譬喻是teh對阮講,á是mā對群眾?」
12:42 主講:「啥人是盡忠koh機巧ê管家?to̍h是主人交帶伊來管理其他ê奴僕,照時分配食物hō͘ in ê hitê人。
12:43 主人tńg來看tio̍h伊有照交帶去做,hitê奴僕真有福氣!
12:44 我實在kā lín講,主人ē派伊來管理伊所有ê財產。
12:45 Hitê奴僕若心內想講我ê主人ēkhah慢chiah tńg來,就phah其他ê奴僕kah女婢,koh lim食kah酒醉。
12:46 主人tī伊想bē到ê時chūn tńg來,會重重kā伊刑罰,hō͘伊kah hiahê無忠實ê人受仝款ê刑罰。
12:47 奴僕知影主人ê意思卻無去準備,á是無照主人ê意思去做,伊一定ēhō͘主人phah kah真thiám。
12:48 M̄ koh,若m̄知主人ê意思,去做應該受phah ê tāichì,伊ē受phah khah少下。Hō͘伊khah chē ê人,ē tùi伊the̍h khah chē;交託伊khah chē ê人,ē kā伊要求khah chē。」
12:49 因為耶穌引起ê分裂
(太10:34-36)
「我來是beh用火tàn tī地chiūⁿ,火若to̍h起來,m̄知gōani̍h'á好lè?
12:50 我有應該受ê洗禮,hitê洗禮iáu未完成以前,我tio̍h艱苦kah啥物程度?
12:51 Lín想講我來是beh hō͘地chiūⁿ和平?我kā lín講,m̄是,顛倒是冤家。
12:52 Tùi taⁿ以後,一家五人ē冤家,三个kah兩 个冤家,兩 个kah三个冤家。
12:53 In lóng ē冤家,父kah kiáⁿ,kiáⁿ kah父,老母kah chabó͘ kiáⁿ,chabó͘ kiáⁿ kah老母,ta-ke kah新婦,新婦kah ta-ke。
12:54 判斷Hitê時期
(太16:2-3)
耶穌koh對群眾講:「Lín看tio̍h雲tùi西pêng起來,lín to̍h講:『Beh落雨ā』,果然to̍h落雨。
12:55 Lín看tio̍h透南風ê時,lín to̍h講:『Beh燒熱ā』,to̍h真正燒熱起來。
12:56 Lín chiahê假好ê人,lín都ē曉判斷天kah地ê景象,ná bē曉判斷chitê時期?」
12:57 Tio̍h kah控告你ê人和解
(太5:25-26)
「Lín ná ē無beh kakī 判斷是非?
12:58 若有人kā你告去見官府,iáu tī路裡ê時,tio̍h設法kah伊和解。若無,伊ē拖你去見審判官,審判官ē kā你交hō͘法警,續落去法警ē kā你關落監。
12:59 我kā你講,最後ê一錢五厘若無還清楚,你絕對bē tàng tùi監裡出來。」
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。