但以理書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 但以理ê異象
（7:1-12:13）
—看見四隻大獸
當巴比倫王伯沙撒元年，但以理tī床裡夢見，心內有看tio̍h異象，伊to̍hka7 hitê夢寫落來，koh講起其中ê大意。
7:2 但以理講：我暗時看tio̍h異象，你看，天裡ê四面忽然起風，吹tī大海ê頂面。
7:3 有四隻獸，真大隻，tùi海裡起來，款式各無相仝。
7:4 頭一隻親像獅，有鷹鳥ê翼。我看tio̍h牠ê翼受拔起來，koh tī地chiūⁿ得tio̍h扶起，來hō͘牠ê兩支腳khiā起來，親像人teh khiā，mā hō͘牠有人ê心。
7:5 你看，koh有一隻獸是第二隻，親像熊。牠挺起牠身軀ê一pêng，牠ê嘴內有三支脇骨，kâm tī嘴齒中。In kā牠講：『起來，吞食chē-chē肉。』
7:6 後來，我koh看，你看，koh有一隻獸，款式親像豹，尻脊骿有四個翼親像鳥；chit隻獸有四個頭殼，koh有權柄hō͘牠。
7:7 後來，我tī暗時ê異象中teh看，你看，有第四隻獸，thang驚thang懍，koh不止強猛，牠有大支ê鐵齒，牠吞咬拆碎，所chhun落來ê koh用腳thún踏。牠kah以前hiahê獸lóng無仝款，koh有發十支角。
7:8 我teh看hiahê角，你看，hit中間有另外發一支細支角；以前hiahê角ê中間有三支角，tī細支角ê頭前hâm根拔起來。你看，chit支角有目chiu 親像人ê目chiu ，koh有嘴teh講大話。
7:9 看見古早to̍h存在ê人
我koh看tio̍h hiahê排列ê寶座，有一个tùi古早to̍h有ê坐teh。伊ê衫褲白kah親像雪，伊ê頭毛親像真清氣ê羊毛。伊ê寶座to̍h是火焰，伊ê輪á親像火teh to̍h。
7:10 有火親像溪流發出，流tī伊ê面前；kā伊服事ê人有千千，跟tòe tī伊ê面前ê有萬萬；審判ê tāichì lóng準備便便，冊lóng掀開。
7:11 Hit時，因為hit支角teh講大話ê聲，我to̍h kā它看，看tio̍h hit隻獸受thâi，牠ê身軀受毀壞，hông hiat tī火裡燒。
7:12 講tio̍h其他hiahê獸，in ê權lóng失落，總是，in ê性命iáu留teh，直到tī定tio̍h ê時、定tio̍h ê日期。
7:13 我tī暗時ê異象中teh看，你看，有一个親像人ê款，伊坐天頂ê雲來到tī hitê tùi古早to̍h有ê，in to̍hchhoa7伊到hitê人面前。
7:14 伊to̍h賞賜伊有權柄、榮光、國位，hō͘萬民、萬國，萬腔口ê人lóng kā伊服事。伊ê權柄是永遠ê權柄，bē無去，伊ê國位一定bē廢無去。
7:15 異象ê解說
我—但以理，我ê心神tī我ê內面teh憂悶，心內ê異象hō͘我不安。
7:16 我to̍h去chhōe hiahê khiā tī邊á ê一个，問伊chiahê tāichì ê實在情形。伊to̍h對我講，koh解明hiahê tāichì hō͘我知：
7:17 Hit四隻大獸是四個王，ē tùi地chiūⁿ興起。
7:18 總是，至koân上帝聖ê子民ē得tio̍h國位，久長掌理國權，永遠無soah。
7:19 Hit時，我ài知第四隻獸ê實在情形，牠kah in hiahê獸無仝，不止thang驚，牠ê嘴齒是鐵ê，牠ê爪是銅ê，牠吞咬拆碎，所chhun落來ê koh用腳來thún踏；
7:20 我koh ài知牠頭殼所發十支角ê實在情形，kah hit支另外發ê角，hō͘三支角lak落來tī牠ê頭前，to̍h是有目chiu ，有嘴講大話ê角，牠ê款式比牠ê同類ê khah強猛。
7:21 我看tio̍h chit支角kah聖ê子民交戰，來thâi贏in。
7:22 直到hitê tùi古早to̍h有ê來，kā至koân上帝ê子民判斷，一直到聖徒得tio̍h國位ê日期。
7:23 伊ánne講：「第四隻獸會做地chiūⁿê第四國，她kah所有ê國無仝，koh ē吞咬全地，會thún踏，kā它拆碎。
7:24 講tio̍h hit十支角，to̍h是tùi hitê國內beh興起十個王。後來，另外有一个王興起，kah前hiahê無仝，伊ēhō͘三个王屈服tī伊ê面前。
7:25 伊ē講話來忤逆至koân上帝，mā ē苦毒至koân上帝ê聖ê子民，mā想beh改換節期、律法。In會hông交tī伊ê手，經過一時，koh兩時，koh半時。
7:26 後來，審判官會坐位，in ē搶奪王ê權，kā它毀壞，hō͘伊滅亡到徹底。
7:27 普天下ê國位、權柄kah列國ê威權lóng交hō͘至koân ê聖ê子民。祂ê國是永遠ê國，見若有權ê lóng ē服事順服祂。」
7:28 Chitê tāichì到chia結束。我—但以理心內想了真不安，面mā變色，總是，我kā chitê tāichì khǹg tī心內。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。