出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
13:1 頭胎ê Lóng Tio̍h奉獻
上主吩咐摩西講：
13:2 「以色列中，無論人á是chengseⁿ，見若頭chiūⁿ ê大kiáⁿ，lóng tio̍h分別做聖，歸tī我，因為本來to̍h是我ê。」
13:3 無酵節
摩西kā人民講：「Lín tio̍h記念chit日，to̍h是lín tùi埃及地，tùi做奴隸ê家出來，因為上主用大權能ê手chhōa lín tùi hia出來。有酵ê餅lóng m̄ thang食。
13:4 Chit日是lín出來ê日，是tī亞筆月中間。
13:5 後來，上主chhōa lín入去迦南、赫、亞摩利、希未、耶布斯hiahê族ê地，to̍h是對你ê祖先chiùchōa應允hō͘你ê，hitê流奶kah蜜ê地，hit時你tio̍h tī chit月間守chitê禮。
13:6 你tio̍h食無酵餅七日，到第七日to̍h是上主ê節。
13:7 Chit七日tio̍h食無酵餅，tī你ê四箍圍，m̄ thang看tio̍h你有下酵ê餅，mā m̄ thang看tio̍h你有酵母。
13:8 當hit日，你tio̍h kā你ê kiáⁿ講：『這是因為上主，tī我出埃及ê時，所kā我行ê tāichì。
13:9 這beh kā你做記號tī你ê手，做記念tī你ê頭額，hō͘上主ê律法tiāⁿ-tiāⁿ tī你ê嘴，因為上主bat用大權能ê手chhōa你出埃及。
13:10 所以，ta̍k年到chitê期，你tio̍h守chitê例。』」
13:11 大kiáⁿ
「將來上主ē照祂對你kah你ê祖先所chiùchōa ê，chhōa你入去迦南人ê地，kā chitê地賞賜hō͘你，
13:12 hit時，你tio̍h kā所有頭胎ê chapo͘ kiáⁿ kah所有頭水公ê chengseⁿ，歸hō͘上主，chiahê lóng屬上主。
13:13 見若頭水生ê驢á，tio̍h用羊á替贖；若無beh替贖，to̍h tio̍h 摃斷牠ê頷頸。見若你頭chiūⁿ ê chapo͘ kiáⁿ lóng tio̍h替贖。
13:14 日後，你ê kiáⁿ若問你講：『這是啥物緣故？』你tio̍h對伊講：『上主用大權能ê手，chhōa阮tùi埃及，tùi做奴隸ê家出來。
13:15 Hit時，法老固執m̄准阮離開，上主to̍h kā埃及地所有頭胎ê，無論是人ê大kiáⁿ á是chengseⁿ ê頭水ê lóng害死。因為ánne，我kā頭水ê公ê獻hō͘上主做祭，獨獨我ê大kiáⁿ lóng用替贖。
13:16 這beh做記號tī你ê手，做記念縖tī你ê頭額，因為上主用大權能ê手，chhōa阮tùi埃及出來。』」
13:17 雲柱kah火柱
法老准人民離開ê時，腓利士地ê路雖然khah近，總是，上帝無chhōa in tùi hia去，因為上帝講：「恐驚人民tú tio̍h交戰，to̍h ē後悔，倒tńg去埃及。」
13:18 所以，上帝chhōa人民彎tùi紅海曠野hit條路去。以色列人lóng排隊伍，tùi埃及地出去。
13:19 摩西帶約瑟ê骨頭kah伊去，因為約瑟bat迫切kah以色列人chiùchōa，對in講：「上帝一定ē照顧lín，lín tio̍h帶我ê骨頭tùi chia做伙去。」
13:20 In tùi疏割出發，紮營tī近曠野ê E-thám。
13:21 上主行tī in ê頭前，日時tī雲柱中chhōa in ê路，暗時tī火柱中光照in，hō͘ in暝日lóng ē tàng行。
13:22 日時ê雲柱，暗時ê火柱，lóng無離開人民ê頭前。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。