詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
69:1 呼求援助
（大衛ê詩，交hō͘樂官；調用「百合花。」）上帝ah，求祢救我，因為chiahê水teh beh kā我淹死。
69:2 我陷落tī深ê土糜，無有thang khiā腳ê所在；我陷落到深ê水內，大水kā我淹密。
69:3 我因為大聲hoah致到厭倦，我ê嚨喉乾去；我因為thèng候上帝，目chiu soah花去。
69:4 無緣無故怨恨我ê人比我ê頭毛khah chē；lāmsám做我ê對敵beh滅亡我ê人不止強猛。我無去搶，mā tio̍h強迫我還。
69:5 上帝ah，我ê愚戇祢本來to̍h知；我無對祢隱瞞我ê罪過。
69:6 萬軍ê至koân上主ah，求祢m̄ thang hō͘ hiahê 仰望祢ê人為tio̍h我來見笑！以色列ê上帝ah，求祢m̄ thang hō͘ 走chhōe祢ê人為tio̍h我來受凌辱。
69:7 因為我為tio̍h祢ê緣故受chhoh罵，我滿面見笑。
69:8 我ê兄弟kā我看做過路人；我ê同胞kā我看做外國人。
69:9 因為我為tio̍h祢ê殿，心內親像火teh to̍h；而且人對祢ê chhoh罵lóng歸hō͘我。
69:10 我流目屎，用禁食來刻苦我ê心，這顛倒hō͘我受眾人凌辱。
69:11 我用麻布做衫褲，眾人反tńg用我做笑談。
69:12 坐tī城門ê人談論我；酒徒用我做歌曲。
69:13 總是，我得tio̍h接納ê時，對上主—祢祈禱。上帝ah，求祢照祢豐盛ê慈愛，照祢真實ê拯救來應答我！
69:14 求祢救我脫出土糜，hō͘我無沉落去；求祢救我脫離怨恨我ê人，hō͘我脫出深ê水。
69:15 求祢m̄ thang容允大水kā我淹密，m̄ thang容允深淵kā我吞食，m̄ thang容允陷坑kā我蓋密。
69:16 上主ah，求祢應我！因為祢ê慈愛是好；求祢照祢豐盛ê慈悲oa̍t過來看我！
69:17 M̄-thang掩面m̄看祢ê奴僕；因為我tī患難ê中間，求祢趕緊來應我。
69:18 求祢óa來救贖我ê靈魂！求祢tùi我ê對敵來kā我贖回！
69:19 祢lóng知我所受ê chhoh罵、見笑kah凌辱；我ê對敵lóng tī祢ê面前。
69:20 Chhoh罵已經拆裂我ê心，我ê憂悶滿滿。我ǹg望人來可憐，無kah一个人來；ǹg望人來安慰，mā無kah一个人來。
69:21 In the̍h苦膽hō͘我做食物；我嘴乾，in用醋hō͘我lim。
69:22 願in ê宴席tī in ê面前變做羅網，tī in平安ê時變做陷阱。
69:23 願in ê目chiu 烏暗看bē tio̍h；願祢hō͘ in ê腰tiāⁿ-tiāⁿ gī-gī chhoah。
69:24 願祢ê痛恨piàⁿ tī in ê身上，hō͘祢烈烈ê受氣jiok tio̍h in。
69:25 願in tòa ê所在變做拋荒；願in ê布棚無人tòa。
69:26 因為in迫害祢所phah ê人；in加添祢所phah傷ê人ê憂苦。
69:27 願祢kā in罪上加罪，m̄ thang容允in有份tī祢ê義。
69:28 願in tùi活命ê冊受擦消，無記tī義人ê中間。
69:29 總是，我是困苦憂傷ê人；上帝ah，願祢ê救恩kā我安置tī koân ê所在。
69:30 我beh用詩歌oló上帝ê名，mā beh用感謝尊祂做大。
69:31 這是ē hō͘上主歡喜，贏過獻牛，á是獻有角有蹄ê牛káng。
69:32 謙卑ê人看tioh8to̍h歡喜；願走chhōe上帝ê奴僕ê心活起來。
69:33 因為上主聽sànchhiah人ê祈求，無看輕為tio̍h祂受關監ê人。
69:34 願天kah地lóng oló祂！海kah其中所有ê動物mā oló祂。
69:35 因為上帝beh救錫安，起造偤大ê城；inē得tio̍h應允ê地做產業，來tòa tī hia。
69:36 祂ê奴僕ê kiáⁿ孫會承接hitê地，疼祂ê人ētòa tī hit中間。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。