歷代志下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
36:1 約西亞kah約哈斯
(王下23:30-35)
人民kā約西亞ê kiáⁿ約哈斯設立做王,tī耶路撒冷續接伊ê老父。
36:2 約哈斯坐位ê時二十三歲,tī耶路撒冷做王經過三月日。
36:3 埃及王tī耶路撒冷kā伊廢掉,koh罰hit國進貢銀一百他連得kah金一他連得。
36:4 埃及王設立伊ê阿兄E-li-a-kim做偤大kah耶路撒冷ê王,kā伊ê名換做約雅敬。尼哥chhōa伊ê小弟約哈斯來到埃及。
36:5 偤大ê約雅敬王
(王下23:36-24:7)
約雅敬坐位ê時二十五歲,tī耶路撒冷做王共十一年。伊行上主—伊ê上帝所看做pháiⁿ ê tāichì。
36:6 巴比倫王尼布甲尼撒to̍h來kā伊攻擊,用銅鏈kā伊縛起來,beh kā伊押來巴比倫。
36:7 尼布甲尼撒koh kā上主殿內ê器具帶到巴比倫,hē tī巴比倫伊ê廟內。
36:8 約雅敬其他ê tāichì kah伊所行可惡ê tāichì,以及伊ê不正,lóng記tī以色列kah偤大列王ê記錄中。伊ê kiáⁿ約雅斤續接伊做王。
36:9 偤大王約雅斤
(王下24:8-17)
約雅斤坐位ê時八歲,tī耶路撒冷做王三月日koh十工,伊行上主所看做pháiⁿ ê tāichì。
36:10 隔tńg年,尼布甲尼撒差人帶伊kah上主殿內hiahê寶貝ê器具來到巴比倫,to̍h設立伊ê阿叔西底家做偤大kah耶路撒冷ê王。
36:11 偤大王西底家
(王下24:18-20;耶52:1-3)
西底家坐位ê時二十一歲,tī耶路撒冷做王共十一年。
36:12 伊行上主—伊ê上帝所看做pháiⁿ ê tāichì。耶利米先知kā上主所吩咐ê傳hō͘伊,tī上主ê面前,伊猶原無kakī 謙卑。
36:13 耶路撒冷陷落
(王下25:1-21;耶52:3-11)
尼布甲尼撒王bat kah伊kí上帝來chiùchōa,總是,伊背叛,硬伊ê頷頸,固執伊ê心,m̄歸順上主—以色列ê上帝。
36:14 而且hiahê祭司ê頭目kah人民mā犯大罪,學外邦所有可惡ê tāichì,tī耶路撒冷分別做聖ê殿òe lahsap上主。
36:15 上主—in祖先ê上帝託祂hiahê使者,差in去人民hia,是透早to̍h起來差伊,因為祂憐憫祂ê子民kah祂tòa ê所在。
36:16 總是,in恥笑上帝ê使者,藐視祂ê話,khau洗祂ê先知,一直到上主對祂ê子民大受氣,無法度thang醫治。
36:17 所以,上帝chhōa迦勒底人ê王來kā in攻擊,tī in聖所ê厝用刀kā in ê少年人thâi死,無憐憫in少年ê chapo͘丁,á是在室女,á是老kah白頭毛ê。上帝kā in lóng交tī迦勒底人ê王ê手。
36:18 伊koh kā上主ê殿內ê大細器具kah財寶,以及王kah hiahê首領ê財寶,lóng帶來到巴比倫。
36:19 In燒上帝ê厝,拆毀耶路撒冷ê城牆,用火燒hiahê宮殿,毀壞hiahê寶貝ê器具。
36:20 見若脫離刀劍ê,伊kā in帶到巴比倫,hō͘ in做伊kah伊ê kiáⁿ孫ê奴僕,到波斯國興起為止。
36:21 這是應驗上主託耶利米所講ê話:thèng候土地享受它ê安息,因為它拋荒ê時守安息,到滿七十年。
36:22 古列王下令偤大人回國
(拉 1:1-4)
當波斯王古列元年,因為beh應驗上主託耶利米所講ê話,上主就激動波斯王古列ê心,hō͘伊宣布tī 全國,koh寫命令,講:
36:23 「波斯王古列ánne講:天頂ê上帝—上主kā天下ê萬國賞賜hō͘我,koh命令我tī偤大ê耶路撒冷kā祂起殿。Lín中間見若做祂ê子民ê,thang上去,願上主—伊ê上帝kah伊同在。」
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。