歷代志上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
17:1 拿單hō͘大衛ê信息
(撒下7:1-17)
大衛tòa tī伊ê宮內,大衛對拿單先知講:「你看,我tòa tī柏香柴ê宮內,總是,上主ê約櫃tī帳房內。」
17:2 拿單kā大衛講:「見若tī你心內所想ê,thang照ánne行,因為上主kah你同在。」
17:3 Hit暝,上主ê話臨到拿單講:
17:4 「你去kā我ê奴僕—大衛講:上主ánne講:『你m̄ thang起厝hō͘我tòa,
17:5 因為tùi我chhōa以色列起來ê日到今á日,我m̄ bat tòa tī厝內,是tùi chitê布棚到hitê布棚,tùi chitê帳房到hitê帳房。
17:6 見若我kah以色列人所到ê所在,tī我所吩咐照顧我ê人民ê以色列ê士師中,我kám bat對in一个人講:『你ná ē無kā我起柏香柴ê厝?』
17:7 「Taⁿ你tio̍h去kā我ê奴僕—大衛講:萬軍ê上主ánne講:『我bat tī羊椆,tùi teh顧羊來召你,做我ê子民—以色列人ê君王。
17:8 見若你所bat去ê所在,我tiāⁿ-tiāⁿ kah你同在,tī你ê面前剿滅你所有ê對敵;我beh hō͘你大出名,親像地chiūⁿchiahê偉人ê名聲。
17:9 而且我ē kā我ê子民—以色列人定tio̍h一个所在,來栽培in,hō͘ in tòa kakī ê所在,無koh遷徙;兇惡ê人mā無親像起頭ánne kā in陷害,
17:10 mā無親像我命令士師治理我ê子民—以色列人ê時。我ē hō͘你ê對敵lóng屈服。我koh kā你講,上主ē kā你建立一个家。
17:11 到你ê日子滿足,tńg去你ê祖先hia,我ē hō͘你ê kiáⁿ孫續接你ê位,我mā ē堅固伊ê國位。
17:12 伊ē kā我起厝,我ē堅固伊ê座位到永遠。
17:13 我ē做伊ê天父,伊ē做我ê kiáⁿ;我無beh hō͘我ê慈愛離開伊,親像我早前hō͘它離開hitê你前一个王。
17:14 我mā ē永遠堅固伊tī我ê家,tī我ê國;伊ê座位mā ē堅固到永遠。』」
17:15 拿單就照chiahê話,chiahê默示,去kā大衛講。
17:16 大衛感恩ê祈禱
(撒下7:18-29)
大衛王to̍h入去,坐tī上主ê面前,講:「上主—上帝ah,我是啥人,我是啥物款ê家,祢chiah chhōa我到chitê地步?
17:17 上帝ah,祢看chitê iáu掠做是小khóa,因為祢koh講tio̍h祢ê奴僕ê家到tī久長。上主—上帝ah,祢款待我親像尊貴ê人ê地位。
17:18 大衛iáu有啥物話thang對祢講到祢ê奴僕所得tio̍h ê尊貴?因為祢真了解祢ê奴僕。
17:19 上主ah,因為祢ê奴僕ê緣故,koh照祢ê心意,祢有行chitê大事,koh顯出chiahê大事。
17:20 上主ah,照阮ê耳孔所聽tio̍h ê,無一个親像祢,祢以外無別个真神。
17:21 地chiūⁿ有tó一國親像祢ê子民—以色列人,to̍h是上主早前去救贖in來做kakī ê人民,hō͘祢tùi極大koh thang驚ê tāichì得tio̍h名,因為趕逐列國離開祢ê子民,to̍h是祢所救贖出埃及hiahê人民ê面前。
17:22 因為祢hō͘祢ê子民—以色列人做祢ê子民,一直到永遠;上主ah,祢mā做in ê上帝。
17:23 上主ah,taⁿ祢所講tio̍h祢ê奴僕kah伊ê家ê話,願它堅固到永遠,求祢照祢所講來行。
17:24 願祢ê名永遠堅固,受尊做大,講:『萬軍ê上主是以色列ê上帝,是做以色列ê上帝。』祢ê奴僕—大衛ê家ē tī祢ê面前堅固。
17:25 我ê上帝ah,因為祢有啟示hō͘祢ê奴僕知,祢ē kā伊建立一个家,所以,祢ê奴僕好膽tī祢ê面前祈禱。
17:26 上主ah,只有祢是上帝,祢用chitê福氣應允祢ê奴僕。
17:27 Taⁿ祢歡喜賜福hō͘祢ê奴僕ê家,hō͘伊永遠tī祢ê面前。上主ah,因為祢已經賜福,我一定永遠得tio̍h福氣。」
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。