創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
34:1 Tí-nah Hông Kiông-kan
Le-ah kā Iâ-kop só͘ seⁿ ê chabó͘ kiáⁿ Tí-nah, chhut-khì beh kìⁿ hit só͘-chāi ê chabó͘ gín'á.
34:2 Hit só͘-chāi ê thâu-lâng Hi-bī lâng Ha-mo͘l ê kiáⁿ Sī-khiàm khòaⁿ tio̍h i, chiū kā i khiú-lâi chò-hóe khùn, kā i lêng-jio̍k.
34:3 I ê sim loân-bō͘ Iâ-kop ê chabó͘ kiáⁿ Tí-nah, ài chit-ê chabó͘ kiáⁿ, chiū ēng hó ōe kā i an-ùi.
34:4 Sī-khiàm kā i ê lāu-pē Ha-mo͘l kóng, " Kiû lí kā góa phèng chit-ê chabó͘ gín'á hō͘ góa chò bó͘. "
34:5 Iâ-kop thiaⁿ tio̍h Sī-khiàm òe lahsap i ê chabó͘ kiáⁿ Tí-nah. Hit sî, i hiahê kiáⁿ kah i ê chengseⁿ tī soaⁿ-.ni̍h, só͘-í, Iâ-kop tiām-tiām bô chhut siaⁿ, thèng-hāu in tńg-.lâi.
34:6 Sī-khiàm ê lāu-pē Ha-mo͘l chhut-lâi kìⁿ Iâ-kop, beh kah i kóng-ōe.
34:7 Iâ-kop hiahê kiáⁿ thiaⁿ tio̍h chit-ê tāichì, chiū tùi soaⁿ-.ni̍h tńg-.lâi, ta̍k-ê lóng m̄-kam-goān, hui-siông siū-khì, in-ūi Sī-khiàm tī I-su-la-el chò-chhut kiàn-siàu ê tāichì kah Iâ-kop ê chabó͘ kiáⁿ chò-hóe khùn; che pún-lâi to̍h sī bô eng-kai chò ê tāichì.
34:8 Ha-mo͘l kah in chham-siông kóng, " Góa ê kiáⁿ Sī-khiàm ê sim him-bō͘ lín ê chabó͘ gín'á, kiû lín kā i hō͘ góa ê kiáⁿ chò bó͘.
34:9 Lín kah goán tāi-ke kiat-chhin, lín thang kā lín ê chabó͘ kiáⁿ hō͘ goán, lín mā thang chhōa goán ê chabó͘ kiáⁿ.
34:10 Lín kah goán chò-hóe tòa. Tē tī lín ê bīn-chêng, lín thang tòa chia khiā, chò senglí, kiàn-tì sán-gia̍p.
34:11 Sī-khiàm tùi chabó͘ gín'á ê lāu-pē kah i ê hiaⁿ-tī kóng, " Goān tī lí ê bīn-chêng tit tio̍h un-tián, lín tùi góa só͘ kiû ê góa lóng beh hō͘ lín.
34:12 Chhut-chāi lín beh tùi góa thó gōa chē phèng-kim kah lé-mi̍h, góa it-tēng chiàu lín só͘ kóng ê hō͘ lín, chí ū ài lín kā chabó͘ gín'á hō͘ góa chò bó͘. "
34:13 Iâ-kop hiahê kiáⁿ, in-ūi Sī-khiàm òe lahsap in ê sió-mōe Tí-nah, chiū ēng kan-chà ê ōe lâi ìn Sī-khiàm kah i ê lāu-pē Ha-mo͘l. In tùi in kóng,
34:14 Kā goán ê sió-mōe hō͘ bô siū kat-lé ê lâng chò bó͘, chit-ê tāichì goán chò bē kàu, in-ūi he sī goán ê kiàn-siàu.
34:15 Lín só͘-ū ê chapo͘ lâng, nā lóng chhin-chhiūⁿ goán sio-siâng siū kat-lé, goán chiah ē-tàng tap-èng lín.
34:16 Goán chiū kā goán ê chabó͘ kiáⁿ hō͘ lín chò bó͘, goán mā chhōa lín ê chabó͘ kiáⁿ; goán chiū kah lín chò-hóe tòa, chiâⁿ-chò-kāng chi̍t-ê jîn-bîn.
34:17 Siat-sú lín m̄-thiaⁿ goán ê ōe lâi siū kat-lé, goán chiū beh tòa goán ê sió-mōe lâi-.khì. "
34:18 Ha-mo͘l kah i ê kiáⁿ Sī-khiàm, hoaⁿ-hí in ê ōe.
34:19 Hitê siàu-liân lâng chò chit-ê tāichì, lóng bô iân-chhiân, in-ūi i ài Iâ-kop ê chabó͘ kiáⁿ, jî-chhiáⁿ i tī in lāu-pē ê ke siōng chun-kùi.
34:20 Ha-mo͘l kah i ê kiáⁿ Sī-khiàm, lâi-kàu in ê siâⁿ ê mn̂g-kháu, kā in ê siâⁿ ê lâng kóng,
34:21 " Chiahê lâng kah lán hô-hó, put-jû chún in tī chit-ê tē tòa, chò senglí; koh-chài kóng, chit-ê tē mā khui-khoah, ē iông-ín tit in. Lán thang chhōa in ê chabó͘ kiáⁿ chò bó͘, mā thang kā lán ê chabó͘ kiáⁿ kè hō͘ in.
34:22 Chóng-.sī, tio̍h ū chi̍t hāng, hiahê chiah beh ín lán kah lán tòa, chiâⁿ-chò-kāng chi̍t-ê jîn-bîn; to̍h-sī lán tiong-kan só͘-ū ê chapo͘ lâng lóng tio̍h siū kat-lé, chhin-chhiūⁿ in siū kat-lé ánne.
34:23 I ê gû, iûⁿ, châi-sán kah it-chhè ê chengseⁿ, kám bô lóng kui tī lán? Chí-ū tio̍h ín-chún in, in chiū beh kah lán tòa. "
34:24 Kiàn-nā tùi siâⁿ mn̂g chhut-.lâi ê lâng lóng chun-thàn Ha-mo͘l kah i ê kiáⁿ Sī-khiàm ê ōe; chiū ánne, kiàn-nā tùi siâⁿ mn̂g chhut-.lâi ê chapo͘ lâng lóng siū kat-lé.
34:25 Kàu tē-saⁿ ji̍t, kûn-chiòng tng teh thàng-thiàⁿ ê sî, Iâ-kop nn̄g-ê kiáⁿ, to̍h-sī Tí-nah ê a-hiaⁿ Si-miān kah Lē-bī, lóng gia̍h to, thàn lâng bô tiuⁿ-tî ê sî lâi-kàu siâⁿ lāi, thâi-sí só͘-ū ê chapo͘ lâng,
34:26 mā ēng to thâi-sí Ha-mo͘l kah i ê kiáⁿ Sī-khiàm, chhōa Tí-nah tùi Sī-khiàm ê chhù-chhut-.lâi, chiū lī-khui hia.
34:27 Iâ-kop hiahê kiáⁿ ūi tio̍h in sió-mōe siū òe lahsap, chiū lâi-kàu siū thâi ê lâng hia, chhiúⁿ-kiap in ê siâⁿ.
34:28 In chhiúⁿ in ê iûⁿ-kûn, gû-kûn kah lî-á, í-ki̍p siâⁿ lāi kah chhân-.ni̍h só͘-ū ê mi̍h-kiāⁿ.
34:29 Koh kā in só͘-ū ê hòe-bu̍t kah chîⁿ-châi, it-chhè ê gín'á kah chabó͘ lâng, í-ki̍p ta̍k tè chhù só͘-ū ê mi̍h-kiāⁿ lóng chhiúⁿ-.khì.
34:30 Iâ-kop kā Si-miān kah Lē-bī kóng, " Lín liân-lūi tio̍h góa, hō͘ góa tī chit só͘-chāi tòa ê jîn-bîn tiong-kan, to̍h-sī tī Ka-nân lâng kah Pe-lí-ji lâng ê tiong-kan ū chhàu-miâ. Jî-chhiáⁿ góa ê lâng-gia̍h chió, in it-tēng ē chū-chi̍p lâi kong-kek góa, phah góa, góa kah choân ke ê lâng lóng ē bia̍t-bông. "
34:31 In kóng, " I kám thang khoán-thāi goán sió-mōe chhin-chhiūⁿ chhiong-ki? "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。