創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
29:1 Iâ-kop Lâi-kàu La̍h-ban ê Chhù
Iâ-kop chhut-hoat, lâi-kàu tang-hong ê lâng ê tē.
29:2 I khòaⁿ tio̍h chhân-.ni̍h ū chi̍t kháu chéⁿ, ū saⁿ tīn iûⁿ tó tī chéⁿ piⁿ, in-ūi lâng lóng sī ēng hit kháu chéⁿ ê chúi hō͘ iûⁿ-kûn lim chúi; chéⁿ-chhùi ēng tōa chio̍h khàm-.leh.
29:3 Pêng-sî iûⁿ-kûn chū-chi̍p tī hia ê sî, lâng chiū kā chio̍h-thâu sóa-lī chéⁿ-chhùi, hō͘ iûⁿ lim chúi liáu-āu, chiah koh kā chio̍h-thâu sóa kàu goân ūi.
29:4 Iâ-kop tùi in kóng, " Hiaⁿ-tī, lín tùi tó-ūi lâi? " In kóng, " Goán tùi Khal-lân lâi. "
29:5 Iâ-kop mn̄g in kóng, " Na-kho͘l ê sun La̍h-ban, lín kám bat i? "
29:6 In kóng, " Goán bat i. " Koh tùi in kóng, " I kám pêng-an? " Ìn kóng, " Pêng-an. Lí khòaⁿ, i ê chabó͘ kiáⁿ La̍h-khel chhōa iûⁿ-kûn teh lâi. "
29:7 Iâ-kop kóng, " Ji̍t iáu koân, chengseⁿ chū-chi̍p ê sî iáu-bōe kàu, tio̍h hō͘ iûⁿ lim chúi, koh hō͘ in khì chia̍h chháu. "
29:8 In kóng, " Goán bē tàng. Tio̍h thèng-hāu chin chē tīn lóng chū-chi̍p óa-.lâi, lâng kā chio̍h sóa lī-khui chéⁿ-chhùi, chiah thang hō͘ iûⁿ lim chúi. "
29:9 Iâ-kop teh kah in kóng-ōe ê sî, La̍h-khel chhōa in lāu-pē ê iûⁿ óa-.lâi, in-ūi iûⁿ sī i teh kò͘.
29:10 Iâ-kop khòaⁿ tio̍h bó-kū La̍h-ban ê chabó͘ kiáⁿ La̍h-khel kah bó-kū La̍h-ban ê iûⁿ-kûn, chiū chìn-chêng kā chio̍h sóa-lī chéⁿ-chhùi, hō͘ in bó-kū La̍h-ban ê iûⁿ-kûn lim chúi.
29:11 Iâ-kop kā La̍h-khel chim-chhùi, chhut siaⁿ khàu.
29:12 Iâ-kop koh kā La̍h-khel kóng i sī in lāu-pē ê gōe-seng, sī Li-bé-kah ê kiáⁿ. La̍h-khel chiū cháu-khì kā in lāu-pē kóng.
29:13 La̍h-ban thiaⁿ tio̍h gōe-seng Iâ-kop ê siau-sit, chiū cháu-khì kā i gêng-chiap, kā i lám, kah i chim-chhùi, chhōa i kàu in tau. Iâ-kop kā it-chhè ê tāichì lóng tùi La̍h-ban kóng.
29:14 La̍h-ban kā Iâ-kop kóng, " Lí si̍t-chāi sī góa ê kut-jio̍k. " Iâ-kop chiū kah i tòa chi̍t goe̍h-ji̍t.
29:15 Iâ-kop Ūi La̍h-khel kah Le-ah Lâi Ho̍k-sāi La̍h-ban
La̍h-ban kā Iâ-kop kóng, " Lí sûi-jiân sī góa ê chhin-chiâⁿ, kám thang pe̍h-pe̍h chò góa ê kang? Chhiáⁿ kā góa kóng, lí ài siáⁿ-mi̍h kang chîⁿ? "
29:16 La̍h-ban ū nn̄g-ê chabó͘ kiáⁿ, tōa ê miâ kiò-chò Le-ah, sè ê miâ kiò-chò La̍h-khel.
29:17 Le-ah ba̍k-chiu khah su, La̍h-khel seⁿ-chò hó khòaⁿ.
29:18 Iâ-kop ài La̍h-khel, chiū kóng, " Góa goān-ì ūi tio̍h lí ê sè-hàn chabó͘ kiáⁿ La̍h-khel, kā lí chò-kang chhit nî. "
29:19 La̍h-ban kóng, " Kā i kè hō͘ lí, khah hó hō͘ pa̍t lâng. Lí kah góa tòa! "
29:20 Iâ-kop chiū ūi tio̍h La̍h-khel kā i chò-kang chhit nî. In-ūi chhim-chhim ài i, Iâ-kop kā chhit nî khòaⁿ-chò kúi-ji̍t-á.
29:21 Iâ-kop tùi La̍h-ban kóng, " Ji̍t-kî í-keng móa, kiû lí kā góa ê bó͘ hō͘ góa, góa thang kah i tâng-pâng. "
29:22 La̍h-ban chū-chi̍p hit só͘-chāi ê kûn-chiòng, pān iàn-se̍k chhiáⁿ in.
29:23 Kàu ji̍t àm, La̍h-ban kā i ê chabó͘ kiáⁿ Le-ah, sàng lâi hō͘ Iâ-kop; Iâ-kop chiū kah i tâng-pâng.
29:24 La̍h-ban kā i ê lú-pī Jil-pah hō͘ i ê chabó͘ kiáⁿ Le-ah chò lú-pī.
29:25 Kàu thiⁿ-kng, Iâ-kop chi̍t-ē khòaⁿ tio̍h sī Le-ah, chiū tùi La̍h-ban kóng, " Lí tùi góa chò ê sī siáⁿ-mi̍h? Góa kā lí chò-kang, kám m̄-sī ūi tio̍h La̍h-khel? Lí ná ē phiàn góa? "
29:26 La̍h-ban kóng, " Bōe kè tōa ê chìn-chêng seng kè sè-.ê, tī goán chia bô lâng ánne chò.
29:27 Lí kah Le-ah ê kiat-hun tio̍h móa chhit ji̍t, jiân-āu goán chiū ē kā La̍h-khel mā kè hō͘ lí, lí tio̍h ūi La̍h-khel koh kā góa chò-kang chhit nî. "
29:28 Iâ-kop chiū chiàu ánne chò. Kah Le-ah ê hun-kî móa chhit ji̍t, La̍h-ban chiū kā i ê chabó͘ kiáⁿ La̍h-khel hō͘ i chò bó͘.
29:29 La̍h-ban kā i ê lú-pī Bil-ha̍h hō͘ i ê chabó͘ kiáⁿ La̍h-khel chò lú-pī.
29:30 Iâ-kop mā kah La̍h-khel tâng-pâng, koh thiàⁿ La̍h-khel iâⁿ-kòe Le-ah. I chiū koh kā La̍h-ban chò-kang chhit nî.
29:31 Iâ-kop ê Kiáⁿ-jî
Siōng-chú khòaⁿ Le-ah bô tit tio̍h Iâ-kop ê thiàⁿ, chiū hō͘ i hoâi-īn; to̍k-to̍k La̍h-khel bô.
29:32 Le-ah hoâi-īn seⁿ kiáⁿ, chiū kā i hō-miâ kiò-chò Lū-biān, in-ūi i kóng, " Siōng-chú khòaⁿ tio̍h góa ê khó͘-chêng; taⁿ góa ê tiōng-hu ē thiàⁿ góa. "
29:33 I koh hoâi-īn seⁿ kiáⁿ, kóng, " Siōng-chú thiaⁿ tio̍h góa bô tit lâng thiàⁿ, só͘-í, koh hō͘ góa chit-ê kiáⁿ. " I chiū kā i hō-miâ kiò-chò Si-miān.
29:34 I koh hoâi-īn seⁿ kiáⁿ, kóng, " Góa kā tiōng-hu seⁿ saⁿ-ê kiáⁿ, i beh kah góa kiat-liân. " Chiū kā i hō-miâ kiò-chò Lē-bī.
29:35 I koh hoâi-īn seⁿ kiáⁿ, kóng, " Chit-má góa beh oló Siōng-chú. " Só͘-í, i kā i ê miâ kiò-chò Iô-tah. Jiân-āu i chiū thêng-chí, bô koh seⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。