利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
17:1 Hoeh ê Sîn-sèng
Siōng-chú hoan-hù Mô͘-se kóng,
17:2 " Lí tio̍h hoan-hù A-lông kah i hiahê kiáⁿ kah I-su-la-el ê kûn-chiòng kóng, Siōng-chú só͘ bēng-lēng ê to̍h-sī ánne kóng:
17:3 Kiàn-nā sio̍k I-su-la-el ê chú-bîn ê lâng, thâi gû-káng, á-.sī mî-iûⁿ-á, á-.sī soaⁿ-iûⁿ, bô-lūn tī iâⁿ lāi á-.sī tī iâⁿ gōa thâi,
17:4 nā bô tāi-seng khan kàu hōe-bō͘ mn̂g-kháu, lâi Siōng-chú ê hōe-bō͘ chêng, hiàn hō͘ Siōng-chú chò lé-mi̍h, lâu hoeh ê chōe beh kui tī hit-ê lâng, i ū lâu hoeh, hit-ê lâng ē tùi i ê jîn-bîn tiong chián-tû.
17:5 Che sī ūi tio̍h I-su-la-el lâng kā in tī chhân-iá só͘ hiàn ê chè, tòa kàu hōe-bō͘ mn̂g-kháu, Siōng-chú ê bīn-chêng, kau hō͘ chè-si, hiàn hō͘ Siōng-chú chò siā-un ê chè.
17:6 Chè-si tio̍h kā hoeh hiù tī hōe-bō͘ mn̂g-kháu Siōng-chú ê tôaⁿ téng, kā iû sio chò phang-phang ê bī, hiàn hō͘ Siōng-chú.
17:7 In m̄ thang koh hiàn chè tī in kiâⁿ siâ-îm só͘ chun-thàn ê kúi-koài; che beh chò in ta̍k sè-tāi éng-oán ê lē.
17:8 " Lí tio̍h tùi in kóng: Kiàn-nā sio̍k I-su-la-el ê chú-bîn ê lâng, á-.sī kià-kha tī in tiong-kan ê chhut-gōa lâng, hiàn sio-chè á-.sī chè-mi̍h;
17:9 nā bô tòa kàu hōe-bō͘ mn̂g-kháu, hiàn hō͘ Siōng-chú, hit-ê lâng tio̍h tùi i ê jîn-bîn tiong siū chián-tû.
17:10 " Kiàn-nā sio̍k I-su-la-el ê chú-bîn ê lâng, á-.sī kià-kha tī in tiong-kan ê chhut-gōa lâng, nā chia̍h siáⁿ-mi̍h hoeh, Góa beh tùi hit-ê chia̍h hoeh ê lâng pìⁿ-bīn, kā i tùi jîn-bîn tiong chián-tû.
17:11 In-ūi bah ê oa̍h-miā chāi tī hoeh, Góa kā i siúⁿ-sù hō͘ lín, thang tī tôaⁿ téng ūi lín ê oa̍h-miā sio̍k-chōe, in-ūi hoeh lāi ū oa̍h-miā, só͘-í ē sio̍k-chōe.
17:12 Só͘-í, Góa tùi I-su-la-el lâng kóng: Lín lóng m̄ thang chia̍h hoeh; kià-kha tī lín tiong-kan ê chhut-gōa lâng, mā m̄ thang chia̍h hoeh.
17:13 " Kiàn-nā I-su-la-el lâng, á-.sī kià-kha tī in tiong-kan ê chhut-gōa lâng, nā phah-la̍h tit tio̍h ē chia̍h-tit ê khîm-siù, tio̍h chhì i ê hoeh chhut-.lâi, ēng thô͘ khàm khí-.lâi.
17:14 Koan-hē it-chhè ū jio̍k-sin ê oa̍h-miā, i ê hoeh to̍h-sī i ê oa̍h-miā, só͘-í, Góa tùi I-su-la-el lâng kóng, bô-lūn siáⁿ-mi̍h jio̍k-sin ê hoeh lín lóng m̄ thang chia̍h, in-ūi só͘-ū jio̍k-sin ê oa̍h-miā to̍h-sī i ê hoeh. Kiàn-nā chia̍h hoeh ê lâng it-tēng tio̍h kā i chián-tû.
17:15 " Kiàn-nā chia̍h kakī sí ê mi̍h á-.sī hō͘ iá-siù thiah-li̍h ê, bô-lūn sī pún-tē-lâng á-.sī chhut-gōa lâng, it-tēng bô chheng-khì-kàu ê-hng, lóng tio̍h sé i ê saⁿ, ēng chúi sé seng-khu, kàu ê-hng chiah chheng-khì.
17:16 Chóng-.sī, i nā bô sé saⁿ, bô sé seng-khu, chiū tio̍h tam-tng i kakī ê chōe-kò.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。