約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
4:1 I-é-su kah Sa-má-lī-a ê Hū-jîn-Lâng
Hoa-lí-sái phài ê lâng thiaⁿ tio̍h I-é-su pí Iô-há-neh chio tio̍h khah chē bûn-tô͘, mā kā khah chē lâng sé-lé.
4:2 Kî-si̍t I-é-su kakī bô kā lâng sé-lé, sī I ê bûn-tô͘ kā lâng sé-lé.
4:3 I-é-su thiaⁿ tio̍h chit-ê tāichì chiū lī-khui Iô-tá-iah, koh tńg-khì Ga-lí-la-iah séng.
4:4 I tio̍h keng-kòe Sa-má-lī-a.
4:5 I-é-su lâi-kàu Sa-má-lī-a chi̍t-ê kiò-chò Su-khal ê siâⁿ, chit-ê siâⁿ óa-kīn Iâ-kop hō͘ i ê kiáⁿ Iô-sé-huh ê hit tè tē; tī hia ū Iâ-kop ê chúi-chéⁿ.
4:6 I-é-su kiâⁿ lō͘ kiâⁿ kah chin-siān, chiū chē tī chéⁿ piⁿ; hit sî chha-put-to sī tiong-tàu.
4:7 Ū chi̍t-ê Sa-má-lī-a ê hū-jîn-lâng lâi chhiūⁿ chúi, I-é-su kā i kóng, " Chúi pun Góa lim chi̍t ē. "
4:8 Hit sî, I ê bûn-tô͘ í-keng ji̍p-khì siâⁿ lāi bé chia̍h-mi̍h.
4:9 Sa-má-lī-a ê hū-jîn-lâng kā I kóng, " Lí sī Iô-tá-iah lâng, ná ē tùi góa — Sa-má-lī-a ê hū-jîn-lâng thó chúi lim? " Hit tong-sî, Iô-tá-iah lâng kah Sa-má-lī-a lâng bô óng-lâi.
4:10 I-é-su ìn kóng, " Lí nā chai Siōng-tè hō͘ lâng ê un-sù, koh chai tùi lí kóng ' Chúi pun Góa lim chi̍t ē'ê sī siáⁿ lâng, lí it-tēng ē kā I kiû, I ē kā oa̍h-chúi hō͘ lí. "
4:11 Hū-jîn lâng kóng, " Sin-seⁿ, Lí bô chhiūⁿ chúi ê khì-kū, chéⁿ koh chhim, Lí beh tùi tó-ūi tit tio̍h oa̍h-chúi?
4:12 Goán ê chó͘-sian Iâ-kop lâu chit-kháu chéⁿ hō͘ goán, i kakī kah kiáⁿ-sun í-ki̍p chengseⁿ, lóng lim chit-kháu chéⁿ ê chúi. Lí kám ē pí Iâ-kop khah úi-tāi? "
4:13 I-é-su ìn kóng, " Lim chit-kháu chéⁿ-chúi ê lâng lóng ē koh chhùi-ta,
4:14 To̍k-to̍k lim góa só͘ beh hō͘ i lim ê chúi ê lâng, éng-oán bē koh chhùi-ta. In-ūi góa só͘ beh hō͘ i lim ê chúi, tī i ê lāi-bīn ē chiâⁿ-chò chúi-chôaⁿ, it-ti̍t chhèng khí-.lâi, hō͘ i tit tio̍h éng-oán ê oa̍h-miā. "
4:15 Hū-jîn lâng kóng, " Sin-seⁿ, chhiáⁿ hō͘ góa chit-ê chúi, góa chiah bē koh chhùi-ta, mā bián koh lâi chiah hn̄g chhiūⁿ chúi. "
4:16 I-é-su kā i kóng, " Khì kiò lín ang lâi chia. "
4:17 Hū-jîn lâng ìn kóng, " Góa bô ang. " I-é-su kā i kóng, " Lí kóng bô ang, bô m̄ tio̍h.
4:18 Lí bat ū gō͘-ê ang, taⁿ kah lí tông-ki ê m̄-sī lí ê ang; lí ánne kóng bô m̄ tio̍h. "
4:19 Hū-jîn lâng kā I kóng, " Sin-seⁿ, góa khòaⁿ Lí sī sian-ti.
4:20 Goán chó͘-sian tī chit-ê soaⁿ kèng-pài, m̄ koh, lín kóng Ê-lú-sa-lèm chiah sī kèng-pài ê só͘-chāi. "
4:21 I-é-su kā i kóng, " Hū-jîn lâng, tio̍h sìn góa, sî beh kàu à. Hit sî, lín bē tī chit-ê soaⁿ, mā bē tī Ê-lú-sa-lèm kèng-pài Thiⁿ-pē.
4:22 Lín m̄-chai lín teh kèng-pài siáⁿ-mi̍h, goán chai goán teh kèng-pài siáⁿ-mi̍h, in-ūi chín-kiù sī tùi Iô-tá-iah lâng chhut-.lâi ê.
4:23 M̄ koh, sî teh beh kàu, hiān-kim to̍h-sī. Chin-chiàⁿ kèng-pài ê lâng, ē ēng sim-sîn kah chin-sêng lâi kèng-pài Thiⁿ-pē, in-ūi Thiⁿ-pē ài chit khoán lâng kèng-pài I.
4:24 Siōng-tè sī sîn, kèng-pài I ê lâng tio̍h ēng sim-sîn kah chin-sêng lâi kèng-pài. "
4:25 Hū-jîn lâng kā I kóng, " Góa chai Ki-tok teh beh lâi-lîm. I nā kàu, ē kā it-chhè ê tāichì kā goán kóng. "
4:26 I-é-su kā i kóng, " Chit-má teh kah lí kóng-ōe ê to̍h-sī. "
4:27 Hit sî, I-é-su ê bûn-tô͘ tńg-.lâi, in khòaⁿ tio̍h I-é-su kah hū-jîn-lâng teh kóng ōe, kám-kak kî-koài, to̍k-to̍k bô lâng mn̄g hū-jîn-lâng kóng, " Lí beh chhòng siáⁿ-mi̍h? " Á-sī mn̄g I-é-su kóng, " Lí ná ē kah hū-jîn-lâng kóng-ōe? "
4:28 Hū-jîn lâng chiū kā chúi-pân pàng hē-.leh, ji̍p-khì siâⁿ lāi kā lâng kóng,
4:29 " Lín lâi khòaⁿ, chit-ê lâng kā góa kòe-.khì ê tāichì lóng kā góa kóng. Chit-ê lâng kám to̍h sī Ki-tok? "
4:30 In chiū chhut siâⁿ beh khì khòaⁿ I-é-su.
4:31 Hit sî, bûn-tô͘ kā I-é-su kóng, " Lāu-su, lâi chia̍h. "
4:32 M̄ koh, I-é-su ìn kóng, " Góa ū lín só͘ m̄-chai ê chia̍h-mi̍h thang chia̍h. "
4:33 Bûn-tô͘ chiū mn̄g-lâi mn̄g-khì, kóng, " Kám ū lâng hō͘ I chia̍h-mi̍h? "
4:34 I-é-su kā in kóng, " Chun-chiàu chhe-phài góa lâi ê hit ūi ê chí-ì, koh oân-sêng I ê kang-chok, to̍h-sī góa ê chia̍h-mi̍h.
4:35 Lín kám bô ánne kóng, ' Koh sì goe̍h-ji̍t chiū ū thang siu-sêng ā'? Góa kā lín kóng, lín khòaⁿ sì-bīn ê chhân-hn̂g, ngó͘-kok í-keng se̍k, thang siu-sêng ā.
4:36 Siu-sêng ê lâng í-keng teh niá kang-chîⁿ, koh ūi tio̍h éng-oán ê oa̍h-miā teh chek-chū ngó͘-kok, hō͘ iā chéng ê lâng kah siu-koah ê lâng chò-hóe hoaⁿ-hí.
4:37 In-ūi sio̍k-gí kóng, ' Chi̍t-ê iā chéng, lēng-gōa chi̍t-ê siu-sêng', si̍t-chāi kóng liáu chin tio̍h.
4:38 Lín bô lô-khó͘ keng-choh ê chhân-hn̂g, góa chhe lín khì siu-sêng; lín hióng-siū pa̍t lâng lô-khó͘ keng-choh ê sêng-kó. "
4:39 Hitê siâⁿ ū chin chē Sa-má-lī-a lâng sìn I-é-su, in-ūi hit-ê hū-jîn-lâng kiàn-chèng kóng, " Chit-ê lâng kā góa kòe-.khì ê tāichì lóng kā góa kóng. "
4:40 Só͘-í, Sa-má-lī-a lâng lâi kìⁿ I-é-su, kiû I kah in tòa, I chiū tī hia tòa nn̄g ji̍t.
4:41 In-ūi thiaⁿ tio̍h I-é-su ê tō-lí, lâi sìn ê lâng koh khah chē.
4:42 Hiahê lâng kā hū-jîn-lâng kóng, " Goán taⁿ m̄-sī tùi lí ê ōe lâi sìn, sī in-ūi goán chhin-sin thiaⁿ tio̍h I-é-su ê tō-lí, goán chai I chin-chiàⁿ sī sè-kan ê Kiù-chú. "
4:43 I-é-su I-hó Koaⁿ-oân ê Kiáⁿ
( Mt 8: 5-13; Lk 7: 1-10)
Nn̄g-ji̍t āu, I-é-su lī-khui hia khì Ga-lí-la-iah séng.
4:44 In-ūi I-é-su kakī bat kóng, " Sian-ti tī kakī ê kò͘-hiong bē siū chun-tiōng. "
4:45 I-é-su lâi-kàu Ga-lí-la-iah séng ê sî, Ga-lí-la-iah lâng kā I hoan-gêng, in-ūi chiahê lâng khì Ê-lú-sa-lèm kòe Pôaⁿ-kòe-cheh ê sî, mā ū khòaⁿ tio̍h I tī cheh-kî tiong it-chhè só͘ chò ê tāichì.
4:46 I-é-su koh lâi-kàu Ga-lí-la-iah séng ê Ka-ná, to̍h-sī I kā chúi piàn-chò chiú ê só͘-chāi, tī hia ū chi̍t-ê Ka-peh-ná-um koaⁿ-oân ê kiáⁿ phòa-pēⁿ.
4:47 I thiaⁿ-kìⁿ I-é-su tùi Iô-tá-iah séng lâi-kàu Ga-lí-la-iah séng, chiū khì kiû I lo̍h-khì Ka-peh-ná-um i-tī i ê kiáⁿ, in-ūi i ê kiáⁿ teh beh sí à.
4:48 I-é-su kā i kóng, " Lín nā bô khòaⁿ tio̍h sîn-jiah kî-sū, it-tēng m̄-sìn. "
4:49 Hitê koaⁿ-oân ìn kóng, " Sin-seⁿ, thàn góa ê sè-kiáⁿ iáu-bōe sí, kín lâi-.khì. "
4:50 I-é-su kā i kóng, " Lí tńg-.khì, lí ê kiáⁿ bē sí. " Hitê lâng siong-sìn I-é-su kā i kóng ê ōe, chiū tńg-.khì.
4:51 I tī lō͘ tiong tú tio̍h i ê lô͘-po̍k, lô͘-po̍k kā i kóng i ê kiáⁿ oa̍h khí-lâi à.
4:52 I chiū mn̄g in i ê kiáⁿ sī tang-sî chiah hó khí-.lâi, in ìn kóng, " Cha-hng ē-po͘ chi̍t tiám, jia̍t chiū thè. "
4:53 Lāu-pē chai-iáⁿ hit sî tútú sī I-é-su kóng, " Lí ê kiáⁿ bē sí. "ê sî. I kakī kah choân ke ê lâng chiū lóng sìn I-é-su.
4:54 Che sī I-é-su tùi Iô-tá-iah séng lâi-kàu Ga-lí-la-iah séng í-āu, só͘ kiâⁿ ê tē-jī pái sîn-jiah.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。