羅馬書 9章1節 到 9章18節   背景資料  上一筆  下一筆
Tùi chit章到十一章使徒保羅lóng tī談論有關猶太人ê問題,tī伊ê看法裡,拒絕承認耶穌為救主ê猶太人,就是hō͘上帝所棄sak ê。這問題m̄-nā發生tī猶太人拒絕耶穌,甚至mā發生tī hiah-ê已經承認耶穌為救主ê猶太人身上,in主張tio̍h先以摩西律法所規定ê割禮做基礎,來要求其他非猶太人mā遵守,並且強調講如果無守割禮就無法度得救。因為後者chit種論調已經矮化了耶穌ê救恩。

使徒保羅tī羅馬書中有兩個主要ê論點:一是每一個人lóng生活tī罪ê掌控下,無一個人tī上帝面前ē-tàng靠tio̍h遵行摩西律法á得救,無論是猶太人á是外邦人lóng仝款。二是上帝顯明祂ê大愛,透過耶穌ê救贖,hō͘所有信耶穌ê人會得thang因為án-ne soah重新建立kah上帝和好ê關係,這是透過耶穌得tio̍h ê,無論猶太人á是外邦人lóng仝款,無任何人是特別ê。這就是羅馬書第九到十一章中所談論ê問題。因為以往猶太人是kā摩西律法看做是得救ê準則,離開摩西律法就kah得救無望。M̄-koh,使徒保羅beh kā in講,siōng重要ê是tī耶穌內面,m̄是tī摩西律法中。

Tùi chit段經文thang看tio̍h有人對使徒保羅所講ê話感覺相當不滿,特別是猶太人,因為伊bat講過:「Án-ne 講起來,做猶太人有甚麼優點?受割禮有甚麼利益?(全民版)」(羅馬書三:1)以講到tī血統上作為亞伯拉罕ê kiáⁿ孫,並無表示有甚麼特別(參考羅馬書四:1),chit種觀點lóng hō͘猶太人感覺深受傷害。因此,有bē少猶太人認為使徒保羅根本就是teh侮辱猶太人,有辱猶太人ê榮耀。因此,使徒保羅用chit段話beh向猶太人表達一個基本心意:期待tio̍h家己ê同胞猶太人,ē-tàng相信耶穌,因為耶穌就是in期待已久、是hit位beh來ê彌賽亞。若是ē-tàng hō͘猶太人相信耶穌,就算因此á hō͘伊受tio̍h上帝ê憤怒、詛咒,伊lóng願意接受。

第1到3節,使徒保羅並無否認猶太人是上帝選民,尤其是因為kah上帝之間有立約ê關係,因為án-ne,in是特別照顧ê民族,ná親像先知阿摩司所講ê「tī全世界hiah-ni̍h chē國家內面,我揀選tio̍h lín」(參考阿摩司書三:2)仝款。不過,因為猶太人拒絕耶穌成做in ê救主,因為án-ne,使徒保羅苦勸伊ê同胞,希望in ē-tàng接受耶穌,伊甚至講如果為tio̍h chit-ê tāi-chì,「縱然我家己hō͘ 上帝詛咒,kah基督隔絕,我mā願意」chit種熱情kah苦心,thang看出伊迫切ê心情。

第4到5節,tī chit兩節經文中,使徒保羅提出猶太人幾點特別ê所在:
(a)In是上帝ê「選民」(參考申命記七:6,以賽亞書四十九:7,約翰福音十五:16)。

(b)「有kiáⁿ ê名份」(參考耶利米書三十一:9,何西阿書十一:1)。

(c)「分享上帝ê榮耀」(參考以賽亞書三十五:2),指ê是上帝奇妙ê作為,祂ê子民mā享受這奇妙作為ê光輝,就是hō͘人讚嘆。

(d)kah上帝有「約」,chit-ê約thang tùi亞伯拉罕kah上帝立ê「約」來看(參考創世記十五:17—21、十七:1—8);上帝透過摩西kah全體以色列人所立ê「約」(參考出埃及記十九:5—6、申命記廿九:10—15);約書亞chhōa以色列人民kah上帝立約(參考約書亞記廿四:14—18;耶利米書三十一:31—34)。

(e)上帝賜hō͘ in「律法」(參考出埃及記二十:1-17)。表明生活有頂真ê規律。

(f)有敬拜上帝ê知識,參考利未記中規定敬拜ê禮儀,表明人對上帝ê敬崇。

(g)應允拯救ê恩典(參考以賽亞書九:6—7、五十五:3、耶利米書廿三:5—6、以西結書三十四:23—24、使徒行傳十三:23)。

(h)猶太人kah耶穌lóng是「仝一個族ê」,意思是teh指上帝beh藉tio̍h猶太人來拯救所有ê世人,mā表示上帝特別意愛猶太人chiah會án-ne。

這mā說明使徒保羅並m̄是看輕猶太人,卻是重視身為猶太人ê身分kah榮耀。

第6到9節,tùi chit段經文thang想像會tio̍h,使徒保羅ê án-ne講法,必定hō͘猶太人感覺相當震撼,因為伊講「以色列人並無lóng是上帝ê選民」,這kah in久長以來ê認知有cheng差。原因是猶太一直是tùi血緣ê層面看in kah上帝之間ê關係,m̄-koh使徒保羅是tùi上帝揀選ê角度來看。伊引用創世記第廿一章12節「你會tùi以撒得tio̍h我所應允ê後代」chit句話。因為án-ne,第7節ê講法是tùi信仰ê層面看亞伯拉罕ê kiáⁿ孫,á tī chia特別指明以撒就是上帝所揀選ê。Á以實瑪利雖然mā是亞伯拉罕ê kiáⁿ,卻m̄是上帝所揀選ê對象。

Án-ne問題就出來à;上帝beh揀選甚麼人?這是上帝ê主權,m̄是猶太人ē-tàng影響上帝ê決定。就親像上帝無揀選以實瑪利,m̄-koh揀選了以撒,chiah有今á日ê雅各kiáⁿ孫猶太人仝款。Á這揀選m̄是根據人ê條件,完全是上帝ê「恩典」,意思是teh指原本m̄是人ê條件ē-tàng配得上,卻是因為上帝ê厚愛,hō͘人lóng無條件得tio̍h。因為án-ne,揀選,這是上帝hō͘人ê特殊恩典。換句話講,上帝「應允」hō͘祂所揀選ê人有甚麼恩典,這是上帝ê主權,m̄是根據人ê任何條件所達成。續落來伊引用創世記第十八章10節,天使對亞伯拉罕所講ê應允。chit-ê應允teh表明,性命ê主,是上帝;人看做無可能ê事,tī上帝就是可能,因為tī上帝手中,無做bē到ê事(參考創世記十八:14)。仝款ê,使徒保羅引用chit種經文,就是beh hō͘猶太人知影,只要是上帝ê應允,任何人lóng有性命得tio̍h拯救ê ǹg望。

第10到13節,使徒保羅Tī chit段經文中koh再進一步引用創世記第廿五章22到23節,雅各kah以掃出世ê事,m̄-koh上帝卻揀選小弟雅各,á m̄是大kiáⁿ以掃。Chiah-ê lóng teh表明:上帝ê揀選m̄是根據人ê條件來論。因為án-ne,猶太人無法度因為án-ne認為上帝bē揀選外邦人,án-ne chiah是使徒保羅ê中心思想。

第14到18節,「上帝beh憐憫甚麼人,就憐憫甚麼人」chit句話連續出現兩pái;續落來koh講祂「beh hō͘甚麼人固執就hō͘甚麼人固執」,使徒保羅chit種講法已經真清楚teh表達一個基本認bat kah觀念:揀選ê主權是tī上帝。上帝beh揀選甚麼人,lóng m̄是人thang決定ê。這mā表示上帝ê決定tāi-chì,並m̄是根據人ê任何條件。換句話講,猶太人並無比任何其他族群koh khah有資格。

Tī使徒保羅ê觀點裡,有兩點是無法度改變ê事實,一是上帝對以色列人有應允,因為án-ne,上帝絕對bē廢棄祂所應允過ê諾言。二是使徒保羅khah強調ê,上帝ê chiah-ê應允已經tī耶穌內面完成à。使徒保羅以上帝揀選雅各為例說明,上帝ê揀選kah人ê行為好bái無關係,卻是上帝beh透過所揀選ê人來幫助koh khah chē ê人認bat祂tī耶穌內面ê救恩,這救恩正thang說明上帝憐憫ê疼。Ná親像咱所知影ê,雅各並m̄是個誠實ê人,卻是上帝beh透過雅各來彰顯祂ê疼。上帝bat揀選巴比倫成做祂ê奴僕來懲罰以色列人民。仝款ê,上帝mā揀選波斯帝國帶領以色列人民重回家鄉重建家園kah聖殿,chiah-ê lóng tī說明一件事:上帝ê揀選是為tio̍h beh顯明祂ê慈愛,kah人ê條件無關。


重新查詢 專卷研經 羅馬書系列
錯誤回報,請聯繫