羅馬書 8章1節 到 8章17節   背景資料  上一筆  下一筆
Chit章是teh說明一個信耶穌ê人,怎樣得tio̍h永恆ê性命。Tī chit章,使徒保羅主要teh說明一個真正以耶穌為伊性命中心ê人,無任何力量ē-tàng kā伊kah上帝之間ê關係切斷,原因只有一點:因為有耶穌。使徒保羅tī chit章中,伊用「屬tī聖神」kah「屬tī本性」chit種詞句來做區隔「信」耶穌kah「m̄信」耶穌之間ê差別。Tī chit章,使徒保羅繼續teh說明一個活tī耶穌內面ê人,kah活tī律法之下ê人之間ê差別。

Chit段經文使徒保羅提出一個重要ê觀念:當人無法度自拔ê時chūn,上帝ê聖神卻是人óa靠ê氣力來源。聖經是上帝做工ê氣力,mā是上帝顯示hō͘人邁向永生之道ê氣力。使徒保羅強調:聖神是hō͘咱kah耶穌結連做伙ê氣力。相對ê,人ê本性則是beh hō͘人tùi kah耶穌結連ê環節上脫離。因為án-ne,伊認為聖神kah人ê本性是相對ê,甚至是對敵ê。伊特別提起信耶穌為性命之主ê人,會有真大ê福氣,就是上帝ê聖神會kah chit種人同在,hō͘伊擁有新ê性命。Á聖神,是上帝改造人心ê氣力。

Koh講,使徒保羅用老父kah子女之間ê關係,來形容基督徒ná親像上帝ê Kiáⁿ仝款。Chit種觀念其實是tùi以色列民族tī信仰上ê認知延伸來ê。以色列人民一直自認為是上帝ê Kiáⁿ,上帝就是in ê老父(參考出埃及記四:22)

第1節,使徒保羅一開始就斬釘截鐵地講活tī耶穌內面ê人,bē被定罪。因為tī耶穌內面ê人,已經向罪宣告死亡,是kah耶穌同齊同釘十字架à。耶穌ê十字架siōng大功勞,就是hō͘人tùi罪ê奴隸中得tio̍h tháu放。

第2到4節,使徒保羅強調,一個人ē-tàng kah耶穌聯合做伙,並m̄是人家己有chit種能力,卻是因為「聖神ê法則」所帶來ê結果。聖神能 kā人tùi罪惡中「tháu放」出來,hō͘人kah耶穌連結做伙。伊講摩西律法所無法度成就ê事,上帝親自差遣伊ê kiáⁿ耶穌來成就chit件事,就是hō͘人tùi罪ê中間脫離出來。

第5到8節,使徒保羅koh khah清楚表明聖神kah人ê本性之間siōng大ê差別,乃是聖神hō͘人得tio̍h性命,á人ê本性則chhōa人進入死亡(第6節)。第8節講「順服本性ê人無法度得tio̍h上帝ê歡喜」,意思ná親像第十四章17到18 節講ê:「上帝ê主權無在tī lim食,á在tī聖神所賜ê公正、和平、喜樂。Án-ne事奉基督ê人必定得tio̍h上帝ê歡喜kah人ê o-ló。」chia ê「公正、和平、喜樂」,mā是聖經ê中心信息,信耶穌ê人會tī生活上顯示出chit種力量,á chit種力量m̄是tùi律法學習tio̍h ê,卻是來自聖神ê引chhōa。

第9到10節,這短短三節中,使徒保羅提起信耶穌為性命之主ê人,會有真大ê福氣,就是上帝ê聖神會kah chit種人同在,hō͘伊擁有新ê性命。Tī猶太人看起來,一個人ê性命如果無「上帝ê靈」同在,chit-ê人ê性命就算是「死」ê,因為hō͘人成做「有性命ê人」,就是因為「上帝ê靈」pûn入去人ê內面(參考創世記二:7)。因為án-ne,做一個人「死」ê時chūn,就是表示chit-ê人ê性命已經無了上帝ê靈tī伊ê身軀內面。第10節ê「上帝ê靈beh hō͘ lín活」,chit句話thang參考羅馬書第八章2節,使徒保羅講這是因為人順服「聖神ê法則」ê緣故。當人順服「聖神法則」ê時,就是新ê性命開始,等於是「新造ê人」(參考哥林多後書五:17)。

第11節,使徒保羅真清楚teh表達一個基本信念:kah耶穌相連結ê人,就會kah耶穌同齊死,mā同齊koh活(參考羅馬書六:8),chit點ē-sái講是伊寫羅馬書ê基本思想結構,mā ē-sái講是使徒保羅kui個思想ê主軸。

第12到13節,chia所講ê「負債」,而且強調m̄是「欠本性ê債」,因為「本性」是teh指肉體。Án-ne,使徒保羅tī chia ê意思是teh指:若tī耶穌內面,人ê性命(心靈)tùi原本是罪ê奴隸中被贖回,chit-má是屬tī上帝ê à。因為án-ne,人只有óa靠聖神ê氣力,chiah ē-tàng抵擋罪ê誘惑。

第14到16節,使徒保羅Tī chit段經文中,上帝所賜ê靈,是beh hō͘人「有上帝kiáⁿ ê名份」,án-ne,一個信耶穌ê人,就ná親像hō͘ 上帝用高價贖回來ê仝款,贖回ê方式是耶穌死tī十字架,hō͘信ê人有新ê身分,tùi過去做罪ê子女,換做領有「新ê身分」ê人。這「新ê身分」就是tī上帝ê靈ê引chhōa之下得tio̍h ê。

第17節,chit節ē-sái講是kui本羅馬書ê中心思想之一。Chia提起一個領有新ê身分之kiáⁿ,mā就是基督徒,就是一個kah耶穌完全連結ê性命。因為án-ne,m̄-nā kah耶穌同受苦難,mā tio̍h分享基督koh活ê喜樂kah福氣(參考羅馬書六:8)。

重新查詢 專卷研經 羅馬書系列
錯誤回報,請聯繫