羅馬書 6章15節 到 6章23節   背景資料  上一筆  下一筆
第六章ê中心思想,是結構tī第14節所講ê,信耶穌ê人會tùi án-ne無koh生活「tī律法之下,卻是tī上帝恩典下」,chit句話說明性命ê轉變,特別是tī kui個性命óa靠ê基礎上,有完全顛倒ê支柱。

律法,是人訂來維護生活規範ê,á恩典是上帝ê拯救,會hō͘人有心存感恩ê態度來做行為準則,對人產生出來ê結果是完全無仝款ê。M̄-koh thang理解使徒保羅會án-ne用chiah-ni̍h長ê篇幅一再論述,是因為有人回應使徒保羅講,認為只要信耶穌,一切就lóng無關係à。使徒保羅khah強調真正信耶穌ê人,是會用感恩ê心來改變性命態度。Koh講,伊強調耶穌就是上帝拯救ê恩典,並m̄是用人ê氣力á是任何代價thang換來得tio̍h。Mā就是上帝恩典並m̄是商場上ê物件,只有以謙卑、感恩ê心領受,chiah會對人ê性命產生意義。

Tī chit段經文內底,有兩個真大ê特色,其一是差不多每節lóng是「相對句」ê型態;親像:
(1)第15節:無tī律法之下vs.tī上帝恩典之下。
(2)第16節:做罪ê奴僕,結果就是死vs.順服上帝,就ē-tàng成做義人。
(3)第17節:lín bat vs.chit-má lín。
(4)第18節:tùi罪中被tháu放vs.成做義ê奴僕。
(5)第19節:以前放縱、為非作pháiⁿ、做罪ê奴僕vs.chit-má beh奉獻家己、做義ê奴僕、成做聖潔ê器皿。
(6)第20到22節:以前做罪ê奴僕vs.chit-má作上帝ê奴僕。
(7)第23節:罪ê代價是死亡vs.在主耶穌基督內面得永恆性命。

第個特色,是用「奴僕」chit-ê詞chē kah九pái,而且lóng是用對照句ê方式出現,就是tùi「罪ê奴僕」到「上帝ê奴僕」,使徒保羅用chit種詞teh表明一個人性命ê轉變,而且完全ê轉變。這mā是基督教信仰所講ê,一個人性命ê改變,tùi pháiⁿ轉換到好;tùi惡變成善;tùi死亡到得tio̍h新性命;tùi失落到得tio̍h(參考路加福音十五:7、10、24、32)。明白chit-ê信息了後,對基督教信仰就是有透徹ê瞭解à。

重新查詢 專卷研經 羅馬書系列
錯誤回報,請聯繫