羅馬書 5章12節 到 5章21節   背景資料  上一筆  下一筆
Chit段經文是第五章ê第二部分,使徒保羅進一步說明前一段經文所討論ê結語。真chē人ài kā chit段話看做是基督教講「原罪」ê基礎經文。其實,基督教信仰並無講「原罪」,卻是講罪。罪hō͘人kah上帝ê關係破壞à。

因為猶太人一直有一個觀念:罪,所代表ê就是「死亡」。因為án-ne,使徒保羅用「亞當」犯罪chit-ê眾人lóng知ê故事來說明:tùi「亞當」開始,人類就生活tī「死亡」中,性命是無希望ê。M̄-koh tī耶穌內面,人卻thang ǹg望性命ê koh活,kah上帝之間重建和好ê關係。

第12到14節,tùi chit段經文thang看tio̍h使徒保羅講亞當是犯罪ê源頭ê時,伊指ê是人犯罪ê動機ná親像亞當仝款,想beh脫離上帝ê疼kah教示。人想tio̍h ê就是家己ài做上帝,這是罪誘惑人棄sak上帝ê主因。每一個人lóng有亞當chit種意念。Á上帝ê疼大大超過人chit種意念,祂差遣耶穌到世間來,hō͘人藉tio̍h耶穌á會得thang kah上帝kā破壞 ê關係重新修好,耶穌chit種救贖恩典,大大超過tùi亞當延續而來ê罪惡。

Koh講,tio̍h注意ê是,當使徒保羅tī chia講「亞當」ê時chūn,是用複數名詞,是teh指人類ê意思。因為án-ne,它所代表ê是整體ê,m̄是單一ê。Mā因為án-ne,聖經teh講罪ê時chūn,它m̄-nā是講個人ê罪,mā同時講人類共同ê罪性kah表現。戰爭就是一個例,是共同體ê犯罪。

「亞當是預表以後beh來ê hit位」,這是一種對照性ê講法;因為亞當帶hō͘全人類ê是毀滅,á耶穌則帶來全人類得tio̍h拯救ê恩典。Chit種講法tī第18節koh一pái出現。所謂「預表」,chit-ê詞原本ê意思是teh指「記號」、「模型」、「像」。Tī chia用「預表」,表示亞當kah基督之間有一個「平行」ê狀態,意思是teh指亞當犯罪帶來人類死亡;基督ê死卻帶來人類koh活ê希望。因為án-ne,掠準講是「預表」,真正意思是「對表」,是一種相對性ê現象。M̄是一頭ê兩端,卻是兩種完全無相仝、無交集ê平行狀態。

第15節,確實,tī犯罪ê亞當kah救贖ê耶穌之間,有極大ê鴻溝,二者根本就無相仝。Chia強調上帝ê疼,tī耶穌ê身上顯示出來ê,是khah贏過亞當犯罪帶來ê死亡。因為,藉tio̍h耶穌,人thang看見koh活ê性命,這koh活就是超越死亡ê威脅。

第16到17節,chit兩節koh一pái說明亞當帶來死亡,chit種死亡ê罪,支配了全人類。M̄-koh卻tī耶穌內面,thang看見上帝koh khah浩大ê救恩,beh透過耶穌hō͘所有人類藉tio̍h祂來得tio̍h性命ê再生─—koh活。

第18到19節,說明亞當帶來ê罪過,繼續tī眾人中間擴大。M̄-koh mā因為耶穌ê救恩,hō͘所有信靠伊救恩ê人,lóng ē-tàng因為án-ne而成做上帝眼中ê義人。

第20到21節,猶太人久長以來有一個觀念:只要遵守摩西律法,就是kah上帝ê關係和好。M̄-koh問題是:人為tio̍h beh維護本來ê律法,卻訂出koh khah chē ê律法,結果因為律法koh khah chē,犯罪ê人mā koh khah chē。原因是人ê罪,hō͘人歡喜去chhōe律法所無規定ê,去做無應該做ê事。M̄-koh當人心中有基督ê疼了後,所想ê,就不會án-ne,卻是會改變想法,無koh是chhōe律法上所欠缺ê,卻是想beh用疼去補足律法上ê漏洞,á是bē合宜ê部分,好hō͘人kah上帝之間ê關係koh khah和諧、接近。這mā就是伊tī chit-ê節最後所講ê「上帝ê恩典koh khah豐富」chit句話ê意思,指出當人藉tio̍h律法想beh「稱義」ê時,卻jú墮落。M̄-koh當人tńg來到上帝tī基督拯救之愛ê內面ê時,就會發見上帝救恩滿溢,而且超過人所ē-tàng想像ê chē。

第21節ê「公義」,是teh指憐憫ê疼。Chit種愛,是對人類世界苦難ê性命發出慈愛ê呼叫、安慰之聲,而且有實際醫、疼惜ê動作(參考馬可福音一:41;馬太福音十四:14;路加福音十:33、十五:20)。使徒保羅非常清楚表示,人是藉tio̍h「主耶穌基督得tio̍h永恆ê性命」,這「永恆ê性命」mā就是約翰福音ê中心信息(參考約翰福音三:15、16、五:24、六:40、47、十七:2-3)。

重新查詢 專卷研經 羅馬書系列
錯誤回報,請聯繫