羅馬書 3章21節 到 3章31節   背景資料  上一筆  下一筆
Chit段經文使徒保羅詮釋「kah上帝和好」ê意思。基本上,聖經ê教導是:人因為犯罪,致使kah上帝ê關係破壞à。taⁿ,上帝hō͘人有機會thang藉tio̍h耶穌á kah上帝有和好ê契機。使徒保羅終其一生就是beh hō͘大家知影,tńg來到耶穌內面,就等於tńg來到上帝ê恩典中。

Chit段經文開始進一步說明,tī耶穌來到世間,而且為世人獻上性命做贖罪祭了後,一切lóng改變à。M̄-nā世人thang藉tio̍h耶穌tī十字架頂ê死,會得thang kah上帝和好,而且耶穌ê救贖恩典,是分享hō͘世間所有ê人,並無對猶太人á是外邦人ê分別。因為上帝是愛世間所有ê人,á m̄是只有愛猶太人。

第21節,使徒保羅先說明上帝「chit-má」親自向人啟示kah祂和好ê正確途徑,並m̄是因為律法,chit點tú好kah「過去」摩西kah先知ê教導大無相仝。
第22到25節,chit段經文中非常清楚強調兩個基本要點:一是每一個人lóng是罪人,罪hō͘人kah上帝ê關係破壞了,而且hō͘上帝ê榮耀失去光彩。M̄-koh,taⁿ上帝beh親自修復chit種關係,就是第二點:透過耶穌來改善、修復chit種原本已經分裂ê關係。

第24節是非常重要ê一節,chia講上帝藉tio̍h耶穌kā拯救ê恩典白白賜hō͘人,chit種恩典是無任何代價ê,是無價ê,m̄是人用任何代價ē-tàng來換,á是取代á得來ê。使徒保羅tùi chia beh表明一個基本ê信仰認bat:人無法度用任何方法來取代上帝tī耶穌內面ê救恩。即使是累積真chē行善ê功勞mā無法度換來得tio̍h,chit點對真chē人來講和-ná真困難,m̄-koh,使徒保羅就是beh表明,如果人ē-tàng用行善來換上帝tī耶穌內面ê救恩,chit種救恩就m̄是所講ê「白白賜恩典」。

第25到26節是chit章經文ê中心思想。使徒保羅講耶穌乃是人性命ê「贖回祭」。這是tùi摩西律法提煉出來ê論點,因為摩西律法規定人犯罪了後,tio̍h用獻祭ê方式來贖回家己ê罪(參考利未記第十六章)。使徒保羅講耶穌就是代替人ê罪á獻身ê「祭」。換句話講,耶穌tī十字架頂ê死,就是贖回了人ê罪。Chia講耶穌ê犧牲是teh「顯明上帝ê公義」,注意「公義」chit-ê詞,指ê是上帝ê疼,這是憐憫ê疼、疼惜ê疼。另外一方面,「公義」,mā是teh指上帝正確ê審判,無冤枉、偏袒、歪曲等。意思是teh指人犯罪,hō͘ 上帝審判,審判ê結果lóng是正確ê。M̄-koh上帝有愛,願意藉tio̍h耶穌ê死,hō͘人原本應該被定罪ê懲罰,藉tio̍h耶穌當做「贖罪祭」á赦免、憐憫人,對人「無罪」tháu放。

第27到31節,tī chit段經文中,thang清楚看tio̍h使徒保羅思想ê中心:所有ê人lóng是罪人。既然是有罪ê人,就無甚麼好誇口ê。即使遵行律法,mā無法度hō͘人kah上帝之間有合宜ê性命關係,因為人是真軟弱ê,ná親像路加福音第十章25到37節所記載「好撒馬利亞人」ê故事中所講,hit位教律法ê經學教師,即使非常明白律法ê意義,mā是無法度確實遵行律法所規定對厝邊ê疼。

Koh講,非猶太人ê人,並無摩西律法thang循,並無表示上帝無疼in,上帝並無只是猶太人ê上帝,卻是所有人ê上帝。上帝愛所有ê世人(參考約翰福音三:16),因為án-ne chiah有耶穌降生tī世界上,為tio̍h是beh hō͘所有ê人lóng因為伊得tio̍h上帝ê救恩。不過使徒保羅強調伊án-ne講,並m̄是輕視摩西律法,顛倒地,伊講án-ne是koh khah強化摩西律法ê重要性,ná親像耶穌講伊來到世間ê目的,並m̄是be̍h廢除摩西律法kah先知教示,á是beh成全(參考馬太福音五:17—18),原因是kā猶太久長以來ê誤解hō͘導正過來。使徒保羅ê努力就是tī chia,ài當時ê人kā重點khǹg tī摩西律法kah得救親密結合ê chit-ê結phah開。Hō͘人tńg來到上帝ê kiáⁿ耶穌身上,信耶穌,就是kah上帝重新和好ê關鍵。Á m̄是遵守律法ê要求。

使徒保羅án-ne講法,並m̄是teh否認律法ê重要性,卻是講人想beh óa靠遵行律法得tio̍h拯救,根本是行無通ê事。Ná親像伊tī第20節所講ê,律法ê效用,是hō͘人知影家己有罪,á m̄是透過律法kah上帝重建和好ê關係。伊強調kah上帝重新建立和好關係,是「只藉tio̍h信」。就是信耶穌,chit點mā thang講是使徒保羅所有思想ê中心,mā是基督教信仰siōng中心ê基礎。

重新查詢 專卷研經 羅馬書系列
錯誤回報,請聯繫