羅馬書 15章1節 到 15章6節   背景資料  上一筆  下一筆
羅馬書tùi第十四章開始,直到第十五章13節,lóng是講tio̍h tī信仰團契中,大家應該彼此互相關懷、扶持ê責任,尤其是對tī hiah-ê tī信心上比較軟弱ê兄姊,koh khah應該用寬闊ê心胸對待。伊特別強調tio̍h以耶穌做榜樣來學習,án-ne,就ē-tàng hō͘信仰團契koh khah有見證,á siōng好ê見證方式,就是彼此相疼,án-ne chiah ē-tàng hō͘外邦人因為án-ne認bat上帝拯救ê疼。

做一個基督徒應該為別人ê需要設想,á m̄是單想家己ê需求kah滿足,這是使徒保羅對信徒ê勸勉。特別是tī共同ê信仰團契裡,chit種觀念koh khah應該堅持。第十五章一開始,伊koh講:「信心堅強ê人應該幫助信心軟弱ê人,分擔in ê重擔,á不求滿足家己。」chit句「信心堅強ê人」,tú好kah第十四章1節ê「信心軟弱ê人」成對照句。Tī第十四章使徒保羅解釋了「信心軟弱」者ê特徵。Tī chit章則向「信心堅強ê人」講in應該有ê信仰行動。

Tī chit段經文中,使徒保羅一再強調每一個人lóng應該為其他ê信徒設想,á m̄是只想tio̍h家己ê利益。

第1節,chit節kah第十四章1節成相對話句。真清楚thang看出使徒保羅kā家己列tī「信心堅強」者ê一方。伊認為信心堅強ê人,有義務kah責任幫助軟弱ê人。換句話講,信心是用來分享,á m̄是用來誇耀家己ê能力。「信心堅定ê人」應該有ê態度是mài kah「信心軟弱ê人」爭辯。Á是beh接納in所持有ê無仝見解。伊進一步強調講,tio̍h「幫助」「信心軟弱ê人」。Tī加拉太書第六章2節,使徒保羅強調tī教會中,tio̍h學習ê功課,就是「tio̍h彼此分擔重擔」。

第2到3節,ē-sái講是第十四章ê總結。使徒保羅認為建造信仰團契ê基本原則,就是學習耶穌ê榜樣,伊連性命lóng奉獻出來à,因為án-ne,學習「彼此分擔苦難、分享喜樂」就成做一個信仰基督團契ê指標。第3節ê b句是引用詩篇第六十九篇9節b句ê詩歌,表明基督徒tio̍h學會曉忍耐,而且甘心承受這世間ê苦難,ná親像耶穌mā是án-ne。

第4到6節所講ê「聖經」,指ê是舊約聖經來講。Siōng好ê信仰,就是tùi耶穌ê身起來學習,á m̄是建構tī人ê基礎上,án-ne,大家就ē-tàng同心歌頌上帝tī耶穌內面ê救恩。

重新查詢 專卷研經 羅馬書系列
錯誤回報,請聯繫