羅馬書 15章22節 到 15章33節   背景資料  上一筆  下一筆
Tī頭前使徒保羅已經真清楚表明,伊並無想beh tī羅馬城開拓教會,因為羅馬城已經有人傳福音,伊深驚會hō͘人誤會。Koh講,tùichit-má chit段經文thang看出,伊寫chit本羅馬書信ê主要目的,就是希望透過chit種書信認bat,hō͘羅馬教會信徒全力支持伊到西班牙去傳福音,án-ne chiah是伊寫此書信ê目的。Kah伊寫其它書信teh處理教會內部發生ê糾紛非常無仝款。因為án-ne,chit段經文ē-sái講是伊清楚表示beh去羅馬城拜訪該教會ê原因。

為甚麼使徒保羅一直希望到羅馬去?伊並m̄是beh去羅馬開拓福音事工,mā m̄是beh tī hia開拓教會,因羅馬已經有教會,主要原因有可能是希望到西班牙去傳福音(第24、28節),beh藉tio̍h羅馬教會信徒ê氣力做支援。使徒保羅ê作法就是建立一間教會後,就以該間教會當做支援中心,繼續開拓另外一間新教會傳福音。

第22到24節,tī第一章13節,使徒保羅並無說明伊為甚麼「有kúi-nā-pái計畫訪問」羅馬教會,卻lóng受tio̍h阻礙ê原因。Á hō͘ chit項阻礙一直無kah早處理ê另外一個原因,是tī第20節已經提起ê,羅馬城已經有教會,就無親像hiah-ê iáu未建立教會ê地區hit種急迫。Mā可能iáu thang án-ne了解:使徒保羅寫羅馬書ê時,真可能是tī哥林多城寫ê。當時使徒保羅tú tī hia待了三個月ê時間,原本有意趕緊去耶路撒冷了後,就去羅馬訪問。M̄-koh當伊離開哥林chē到達以弗所,並且結束tī以弗所ê工作,這是伊ê第二pái旅行傳道。當伊正準備繼續計畫ê旅程ê時,卻因為hit-ê城發生暴動á延誤到哥林多ê時間(參考使徒行傳十九:21—23),hō͘伊繼續停留tī hit-ê城長到兩年以上ê時間。這mā是伊延遲到羅馬去ê原因。因為án-ne,伊希望tī工作有一個段落了後,就去羅馬教會訪問。

第25到26節,chit三節講出使徒羅伊無辦法chit-má就去羅馬城ê原因,是為tio̍h beh kā馬其頓kah亞該亞等地教會所捐出來beh救助耶路撒冷信徒ê錢趕緊送去耶路撒冷。

第27到28節,伊提出一個真重要ê信仰認知:分享。羅馬教會ē-tàng得tio̍h福音信息,是kah耶路撒冷教會有密切關係。因為,耶路撒冷教會分享了福音信息hō͘羅馬kah外邦地區ê教會信徒,chit-má外邦人已經知影耶路撒冷有貧困ê人民子弟,就有責任kah in同齊分享物質上ê需要。因為án-ne,伊希望羅馬教會也ē-tàng募款救助耶路撒冷ê信徒。伊表示下pái去羅馬城ê時,mā會kā福音ê信息分享hō͘羅馬教會ê信徒。

第30到31節,使徒保羅請求羅馬教會為伊ê行程代禱。尤其是關心伊kā前往耶路撒冷ê事。Chia提起「受tio̍h tī猶太hiah-ê m̄信ê人ê危害」,是因為有kóa頂真、保守ê猶太人,in對使徒保羅tī外面邦地區ê工作相當有意見,特別是使徒保羅並無堅持外邦人基督徒一定tio̍h先受割禮(參考使徒行傳廿一:20—22)。其實使徒保羅有一個心願:伊想用chit種救助耶路撒冷教會sàn-chhiah兄姊ê方式,來縮短猶太人基督徒,kah外邦人基督徒之間ê隔閡有關。伊ǹg望猶太人基督徒會感受tio̍h外邦人基督徒tī信仰上ê疼心,á koh khah願意接納外邦人信徒,mā會關懷同在耶穌救恩裡ê兄弟姊妹,並同時肯定伊tī外邦人地區工作ê意義。

第32節,chit句「上帝若允准」,mā說明使徒保羅心中有一個預感,he就是伊會tī耶路撒冷受tio̍h迫害,chit件事應該是kah先知亞迦布ê預言有密切關係(參考使徒行傳廿一:10)。

第33節,有bē少學者認為羅馬書到chia就結束loh。因為chia出現「阿們」(參考羅馬書十一:36),表示此書信ê段落結束。M̄-koh mā有另外一種看法,認為tio̍h án-ne書信真有可能是分做kúi-nā-pái chiah寫完(參考羅馬書十一:36、十六:27)。「賜平安ê上帝」,chit句話koh一pái出現tī哥林多後書第十三章11節c句;腓立比書第四章9節;帖撒羅尼迦前書第五章23節;帖撒羅尼迦後書第三章16節。Chia ê「平安」,並m̄是講一切lóng真順利、無事發生,卻是指tī苦難中,mā bē喪失對上帝ê信心,iáu有堅強ê意志。

重新查詢 專卷研經 羅馬書系列
錯誤回報,請聯繫