羅馬書 15章14節 到 15章21節   背景資料  上一筆  下一筆
Tùi第十五章14節開始,直到第十六章結束chit段經文是chit本經冊ê結語。Tī第十五章14到21節ê chit段經文中,使徒保羅提起個人ê tāi-chì,mā提起伊寫chit封信主要ê目的,就是beh hō͘羅馬教會ê兄姊知影:伊並m̄是beh tī羅馬城開拓教會,á是beh hō͘羅馬教會信徒知影:伊沿路行來lóng是teh「傳揚關係基督ê福音」(參考第18節)。

第14到15節,使徒保羅o-ló羅馬教會ê信徒是真有信仰見證ê。雖然有真好ê見證,m̄-koh tī伊看起來mā是有需要提醒ê所在。

第16到17節,是使徒保羅表明家己tī福音事工上ê角色,伊講家己是一個「祭司」,是專門為外邦人而作祭司,主要目的是beh hō͘外邦人也ē-tàng成做上帝所喜樂ê子民。這就kah猶太人認為只有in chiah是上帝所歡喜ê人民之觀點非常無仝款。而且伊講家己就是因為chit項工作á深覺光榮,因為伊參與了上帝拯救世人ê工作。

第18到19節,使徒保羅tī chia真清楚表現出「奴僕」ê角色,強調m̄是因為家己有甚麼能力,卻是耶穌「藉tio̍h」伊ê「言語行為」,koh用「神跡奇事kah上帝之靈ê能力」,án-ne伊chiah ē-tàng到外邦人地區傳福音,而且有收成thang kā它獻tī上帝面前。Chia ê所謂「言語行為」,thang tùi伊四界tī猶太人會堂kah人辯論有關耶穌救恩ê信息(參考使徒行傳十七:2—4、10—12、十八:5),以及伊tī雅典,kah當時羅馬社會ê思想界大師辯論有關耶穌ê死kah koh活之信息(參考使徒行傳十七:16—34)看會出來。使徒保羅因為有聖神充滿,hō͘伊tī傳福音ê旅程中,有kúi-nā-pái施行神跡(參考使徒行傳十三:8—12、十四:8—10、十九:11—12、二十:9—10、廿八:3—6)。伊講家己活動ê範圍,tùi耶路撒冷到chit地區,一直到「Í-lū-lī-kóng」,就是今á日ê「阿niâ巴尼亞」kah「南斯拉夫」ê所在。其實,使徒保羅並未達tio̍h南斯拉夫,伊只到馬其頓而已(參考使徒行傳十六:6—10)。可能伊原本有chit種計畫,只是無想tio̍h,當伊tńg來到耶路撒冷了後,就被掠了起來。

第20節,這是一節真值得注意ê經文,tī chia使徒保羅表示:為tio̍h hō͘ koh khah chē人認bat耶穌,伊只「tī iáu未聽見基督ê所在傳福音,免得我ê工作建立tī別人ê基礎上」,為tio̍h án-ne,伊四界旅行傳福音,伊並無佔領某一個地方,ná親像耶穌仝款周遊加利利湖附近ê城鎮傳上帝國度ê信息。

第21節,chit節是引用以賽亞書第五十二章15節。使徒保羅引用chit節詩歌,主要是teh說明伊傳福音ê目的,beh hō͘外邦人認bat耶穌。Mā tùi chit節詩歌,表明福音帶hō͘世人ê,是對性命有新ê認bat,並且聽tio̍h新ê信息。

重新查詢 專卷研經 羅馬書系列
錯誤回報,請聯繫