羅馬書 12章1節 到 12章8節   背景資料  上一筆  下一筆
使徒保羅ê書信有一個共同特色,就是teh談完信仰ê問題了後,lóng會勸勉收phoe ê眾信徒,tī日常生活上,tio̍h好好á活出信仰ê見證。第十二章開始到,直到第十五章13節止,這四章lóng是講tio̍h有關基督徒ê社會kah倫理生活。

Chit段經文使徒保羅講出兩個基本重點:成做基督徒,一定tio̍h teh過頂真而且kah屬世ê社會有無仝ê生活。Koh講,每一個人lóng有上帝賞賜ê chiah ē-tàng,應該好好á用chiah-ê才華、能力做見證,傳揚上帝拯救ê信息。

第1節,使徒保羅用猶太人所熟悉ê獻祭禮儀來講基督徒應該有ê信仰態度:就是kā家己當做獻祭ê祭品。Á基督徒ê生活就是「活祭」,kah獻tī祭壇上ê牲祭無仝;牲祭是已經刣死ê動物,獻tī祭壇上。「活祭」tú好kah這顛倒,這祭是用耶穌koh活做基礎,為tio̍h是beh hō͘人成做一個新造ê人,是活ê、是聖潔ê,是為上帝á活ê性命,這是thang看會tio̍h而且是活活ê見證。

第2節,「beh hō͘上帝改造lín,更新lín ê心思意念」,這ē-sái講是使徒保羅思想ê中心。Tī伊ê書信中就bat講:「無論甚麼人,若kah 基督結聯,就是新創造ê 人;舊ê tāi-chì 已經過去,taⁿ lóng 變做新ê。(全民版)」(哥林多後書五:17)「Lín ê 心思意念mā tio̍h 換新,tio̍h 成做新ê 人,就是照上帝用真理所產生ê 公義kah 聖潔來創造ê 新人。(全民版)」(以弗所書四:23—24)伊指出一個真正信耶穌ê人,會有新ê性命觀,生活ê態度是積極ê,而且無私ê。

第3節,伊kā羅馬教會ê信徒講一定tio̍h謙卑,原因是羅馬城是kui個帝國ê中心,ē-tàng tī hit-ê城khiā起ê人大部分是屬tī社會上層階級者,難免有一份自視比別人iáu koh khah koân,m̄-koh使徒保羅勸勉in無法度án-ne。因為所有身上ê恩賜lóng是上帝賞賜ê。「恩賜」,是teh指原本m̄是家己擁有ê,是上帝賞賜ê。

第4到5節,tī chit段經文中,tī使徒保羅ê書信中,伊一再強調基督徒團契(á是kā它稱做教會),應該ná親像一個家庭。伊寫hō͘哥林多教會ê書信中,就用身軀ê各種肢體來表示,無任何一個肢體ē-tàng對其他ê肢體講,家己重要,別ê肢體不重要。因為所有ê肢體lóng是連結tī耶穌ê身軀上(參考哥林多前書十三:12—31)。伊寫hō͘以弗所教會ê書信中,mā提起chit種講法(參考以弗所書四:2—7、11—12)。chit-má使徒保羅Tī chit段經文中mā是chit種方式來表達,伊強調每一個基督信徒lóng有上帝hō͘ in ê恩賜,chiah-ê恩賜lóng是beh用來見證上帝拯救ê疼。伊講「每一個肢體有它無仝ê功用」,chit句話真清楚teh說明所有ê人tńg來到上帝救恩chìn前,lóng仝款ê。換句話講,tī基督ê信仰團契中,所有ê人,無貧賤富貴之分,mā無社會地位之別。「咱tī基督內面成做一體」,使徒保羅用chit句話用來說明信仰團契ê中心,是tī耶穌身上。因為耶穌chiah是性命ê救主。因為án-ne,一個真正屬tī耶穌ê信仰團契,bē kā某一個人抬高、凸顯出來。

第6到8節,chit三節ē-sái講是chit段經文ê中心思想:每一個人ê恩賜無仝,應該善用這無仝ê恩賜,tī每一個無仝ê工作領域裡見證福音。Tī chia,使徒保羅列出了無仝恩賜ê例,包括有:傳講信息ê、有服務、教導、勸勉、施與、慷慨、領袖、憐憫人ê等等。


重新查詢 專卷研經 羅馬書系列
錯誤回報,請聯繫