羅馬書 11章1節 到 11章12節   背景資料  上一筆  下一筆
Chit章是繼續第九章teh討論有關以色列人民,kah上帝之間ê關係。使徒保羅一再表明家己對猶太同胞得救ê siōng大關懷,甚至講出為tio̍h猶太同胞,「縱然家己hō͘ 上帝詛咒,kah基督隔絕」,伊mā願意接受(參考羅馬書九:3),伊一再懇求上帝,ē-tàng開啟伊猶太同胞ê心門,m̄-koh顯然伊chit種期待並m̄是真如意(參考十:1)。Tī chit章裡,使徒保羅一開始就真清楚表明伊對外邦人ê關注,而且強調上帝對外邦人拯救ê疼。M̄-koh這並無表示伊輕視以色列人民tī上帝眼中重要ê地位。伊只是beh強調一點:上帝愛所有ê人,並且揀選以色列人民來成做祂拯救ê同工。

Tī chit段經文中,使徒保羅一再強調:上帝並無因為以色列人民拒絕上帝ê救恩,就棄絕了in。上帝反tńg想beh盡一切辦法,beh hō͘以色列人民明白,祂是一個有豐富慈愛ê上帝,祂kah以色列人民ê祖先立約,上帝絕對信守chit-ê約。真清楚ê,使徒保羅引用了舊約先知ê觀念,講述上帝是信實ê,祂絕對bē放棄kah祂立約ê子民(參考撒母耳記上十二:22,列王記上十九:18,以賽亞書十:20—22)。

Tùi chia看出使徒保羅Tī chit段經文中為家己tī外邦人中傳福音ê感受。伊表明是因為猶太人拒絕耶穌,所以伊chiah有機會行向外邦。Tī伊看起來,taⁿ伊會得thang tī外邦人中傳福音,乃是因為猶太人拒絕耶穌,chiah致使外邦人因為án-ne得tio̍h福氣。另外一方面,使徒保羅mā透過chit種觀點teh講述一個重要ê信息:上帝是想藉tio̍h外邦人得福音來刺激猶太人ê悔改。Án-ne講起來,外邦人ê得救,mā是猶太人ê一種福氣,因為in thang透過外邦人ê得救,反省家己kah上帝之間ê關係,並進一步koh接納耶穌為in ê救主,án-ne chiah是上帝拯救計畫ê目標。
第1節,使徒保羅作一個簡單ê自我紹介,表明伊家己mā是猶太人,m̄-koh伊深信耶穌就是伊性命ê救主。

第2到4節,「上帝無棄絕伊tùi遠古就揀選ê子民」,chit句話是引用撒母耳記上第十二章22節,mā thang參考詩篇第九十四篇14節。使徒保羅引用chiah-ê經文,主要teh強調上帝絕對bē放棄任何人,因為祂疼所有ê人。續落來使徒保羅引用列王記上第十九章10到18節經文。Chit段經文說明上帝憐憫、慈悲ê疼,hō͘以色列人民tī亡國ê困境中,尚且留落來了殘存ê「餘民」(參考以斯拉記九:8,耶利米書廿三:9、三十一:7,彌迦書二:12、四:7,撒迦利亞書十三:9),chiah-ê人是一陣對上帝絕對忠貞ê人民,因為棄sak上帝、背叛上帝ê人真chē,m̄-koh這一陣人堅持遵守上帝ê教示,所以上帝揀選了chit群人,chit種揀選所表明ê,是上帝對in ê憐憫kah愛(參考羅馬書九:27—29)。使徒保羅Tī chit段經文引用先知文獻中ê chit種看法,主要teh說明tī所有ê猶太人中,必定iáu有一kóa人是上帝所喜樂ê猶太人,ná親像伊家己仝款,因為上帝並無完全棄絕猶太人(參考以賽亞書十:20—22)。

第5到6節,koh一pái說明上帝上帝揀選ê恩典,並m̄是根據人ê行為,á完全是出tī上帝ê疼,而且無價ê疼。

第7節,koh一pái強調真正得tio̍h上帝恩典ê人是少數,因為多數人對上帝選召ê恩典置之不理,á會失去這性命ê機會。

第8到10節,chit段經文分別引用以賽亞書第廿九章10節,以及詩篇六十九篇22到23節。「直到chit-má」,指ê是到使徒保羅時代,猶太人拒絕上帝救恩ê信息照常無改變。使徒保羅表示hiah-ê心已經硬化ê猶太人,會受tio̍h嚴厲ê懲罰。雖然猶太人聽見過上帝拯救ê信息,卻故意裝作m̄-bat聽過,á是m̄-bat, án-ne,上帝mā只好「chhut-chāi」in去,然後tī外邦人中,上帝興起了祂救恩ê記號,hō͘ hiah-ê走chhōe上帝ê拯救ê外邦人比起猶太人koh khah快得tio̍h拯救ê恩典。

第11到12節,這thang當做是一種激kā法,為tio̍h hō͘猶太人知影怎樣tńg來珍惜上帝tī耶穌內面ê救恩。


重新查詢 專卷研經 羅馬書系列
錯誤回報,請聯繫