羅馬書 11章25節 到 11章36節   背景資料  上一筆  下一筆
Tī chit段經文中,使徒保羅繼續講tio̍h有關猶太人應該知影耶穌拯救福音信息奧秘ê問題。伊khah強調一個點:因為以色列人民拒絕福音,結果hō͘福音有機會往外邦傳揚出去。會有chit種變化,是因為福音ê主權是tī上帝手中。

第25到26節,tī第26節ê chit句「全部ê以色列人終必得救」,teh代表下列幾個層面ê意思:
一是teh指所有雅各ê kiáⁿ孫,mā就是血統上所認定ê以色列人民。

二是teh指所講ê「餘民」ê意思,就是iáu有「七千」個忠實tī上帝ê教導,無背叛上帝ê以色列人民(參考列王記上十九:18)。

三是teh指包括外邦人在內ê總數,mā就是世間萬民ê意思。因為án-ne,chia ê「全部ê以色列人」,mā thang講是teh指所有信耶穌ê人。

其實,tùi使徒保羅ê觀點來了解,伊tī chia所講ê「全部ê以色列人」,應該是teh指第三個意思,是包括所有相信耶穌基督ê人lóng會得救,á無猶太人kah外邦人ê分別。

Koh講,「拯救者beh tùi錫安出來」,chit句話thang參考以賽亞書第五十九章20節。使徒保羅一再強調福音是tùi猶太人開始,然後koh再擴展到外邦地區去(參考羅馬書一:16)。Mā是teh指tùi耶路撒冷傳到外邦城市(參考路加福音廿四:47)。

第27節,chit節是引用耶利米書第三十一章34節。先知耶利米講上帝beh kah以色列人民訂立新ê約,而且chit-ê約kah舊ê約無仝;新ê約會寫tī以色列人民ê「心版上」,無koh是外表ê肉體上(參考耶利米書九:26)。寫tī心版上ê約,會永遠留存,記念kah上帝之間永bē改變ê關係。

第28到29節,chit兩節講出使徒保羅一再堅持ê看法:雖然猶太人拒絕耶穌,m̄-koh上帝iáu是teh等待in 回心轉意tńg來,並無完全割開、切斷,chit點tú好是上帝ê恩典。

第30到32節,chit段經文非常有意思,講tio̍h以前因為猶太人拒絕順服上帝ê救恩,結果hō͘外邦人得tio̍h救恩;chit-má外邦人ê蒙恩,是為tio̍h beh hō͘猶太人mā因為án-ne得tio̍h上帝ê慈愛kah救恩。使徒保羅chit種講法,真清楚ê是beh kā大家講,猶太人kah外邦人lóng是上帝所拯救ê對象,上帝用順服祂ê人,來幫助hiah-ê不順服ê人有一工也ē-tàng歸順tī祂ê名,因為上帝無願意有人墮落。

第33到36節,chit段經文是一段o-ló ê詩歌,ē-sái講是第九到十一章ê總結,m̄-koh mā ē-sái講是第一到十一章ê總結。使徒保羅用chit段詩歌來歌頌上帝豐富無比ê恩典,遠khah贏過人所ē-tàng想像會tio̍h ê。使徒保羅強調講:上帝ê疼透過耶穌顯示tī眾人面前,因為án-ne,看見耶穌,等於看見上帝ê救恩。耶穌ê救恩並m̄是隱藏ê,卻是顯露tī眾人面前。M̄-koh上帝ê chit種救恩,m̄是一般人ē-tàng了解,這to̍h是祂對人類愛ê奧秘。因為上帝是連無kah祂立約ê子民(外邦人)mā tio̍h拯救,而且同等對待。Chit種ê疼,已經超越人ê言語、字彙所ē-tàng表達出來ê。

第34節,chit節是引用以賽亞書第四十章13節。Tī哥林多前書第二章16節,使徒保羅koh一pái引用。意思是講beh用人ê知識認bat上帝,he是非常愚戇ê想法。特別是上帝tī耶穌內面ê救恩,he是siōng大ê奧秘,非常難理解。第35節ê詩句講出基督教信仰ê基本觀念:咱所有ê一切才華能力,lóng是tùi上帝來ê賞賜。Á m̄是咱先hō͘上帝甚麼,chiah hō͘上帝願意用救恩來回報咱。第36節講「萬物lóng出tī伊」,這ē-sái講是基督教信仰siōng基本ê認bat—宇宙萬物,lóng是tùi上帝來ê創造。

重新查詢 專卷研經 羅馬書系列
錯誤回報,請聯繫