啟示錄 5章1節 到 5章14節   背景資料  上一筆  下一筆
Chit章記載ê主要內容是延續第四章所看見ê異象。Tī第四章tī結尾ê所在,作者約翰提出一個重要ê認bat,就是坐tī寶座上ê hit位全能者上帝,是宇宙萬物性命ê主宰,祂是萬物性命ê創造者,所有ê性命lóng是tùi祂而來。chit-má chit第五章是teh說明chit位創造宇宙萬物ê主宰,乃是救贖者,而且祂ê救贖是透過ná親像被宰殺ê羊羔之方式,呈現出來。Chit種看法kah先知以賽亞ê詩歌中傳達出來ê仝款(參考以賽亞書第五十三章)。

    Chit章mā引用了真chē舊約先知文獻ê資料,包括有以賽亞書、以西結書、但以理書等,而chiah-ê經冊lóng kah啟示文學ê作品有密切關係。Tī chit章講有「七個印」,然後tùi第六到八章lóng tī說明chit「七個印」所封tiâu ê內容。

    第1節,「坐tī寶座上ê hit位」,照第四章到4節ê記載,chit位就是全能創造ê主上帝。伊ê「正手the̍h冊卷」,chit-ê冊卷是密封tio̍h,而且用「七個印封tio̍h」,chit-ê「七」mā teh代表「神聖」,表示chit本冊卷m̄是一般人隨意ē-tàng phah開,即使phah開mā無法度讀,表示he是一個「封閉」ê冊卷(參考以賽亞書廿九:11—12,但以理書十二:4)。

    第2到3節,chia講有一個「大力ê天使」出現,伊「高聲宣佈」看「甚麼人配phah開chiah-ê印、展開chit-ê冊卷」?Chit-ê冊卷並m̄是一般ē-tàng phah開,因為有「七個印」封tiâu,表示這是上帝親自封tiâu ê冊卷,除非有上帝ê幫助,若無,chit種冊卷無人ē-tàng phah開。Chia mā特別強調講「無論天頂、地下,á是地下腳」,意思是teh指包括kui個宇宙在內,lóng「無一個ē-tàng展開冊卷」,mā因為án-ne無任何人ē-tàng「閱讀」。意思是除了上帝親自出手,á是祂特許ê對象chiah有辦法看。

    第4節,為tio̍h án-ne緣故,作者約翰「放聲大哭」,除了chia所講ê「無人配展開á是閱讀chit-ê冊卷」外,另外一個原因是kah無法度執行上帝ê旨意有關。因為tī第四章1節上帝透過異象指示約翰,beh hō͘伊明白以後會發生ê事。因為án-ne,如果無法度phah開chit-ê「七個印」封tiâu ê冊卷,就無法度明白冊卷中ê意思,當然mā就無法度執行冊卷裡所記載伊應該ài做ê事。

    第5節,chit時tī「長老中ê一個」出來安慰約翰,ài伊「m̄-thang哭」。並且hō͘約翰知影「tùi猶大支族出來ê獅—大衛ê後代已經得勝」,表明上帝會差遣一位拯救者來臨,伊mā是一個「得勝者」,ē-tàng解開chit「七個印」所封tiâu ê冊卷。

    第6節,chit節提起tī「寶座中,有羊羔khiā-teh」,而且這「羊羔親像被宰殺過ê」,chit句話thang參考以賽亞書第五十三章7到10節。宰殺羊羔是以色列民族過Pôaⁿ過節,á是其它重要慶典、節期ê時一定tio̍h準備ê牲祭。Á宰殺過ê「羊羔」一直是以色列民族認為ē-tàng獻hō͘上帝siōng好ê牲祭。

    Chit節kah第5節所提起ê「ná tùi猶大支族出來ê獅」之句話真明顯對照;原本眾人所期待ê拯救者,乃是一位擁有極大權柄、能力ê君王á是領導者。M̄-koh tī chia,卻變成「像被宰殺過ê羊羔」仝款ê軟弱,hō͘人當做牲祭一般排teh獻祭ê祭壇頂。「獅」,是凶悍、強壯,真會攻擊ê猛獸,而羊羔卻是獻祭ê犧牲禮。世人lóng是歡喜使用勇猛ê野獸來代表堅強、雄壯,m̄-koh上帝卻用人看做siōng軟弱ê「羊羔」之方式,來表明祂ê慈愛(參考哥林多前書一:25)。

    Chit-ê羊羔有「七個角、七個目睭」;chia ê「角」,是teh代表「權柄」、「君王」、「能力」(參考申命記三十三:17,撒母耳記上二:10,列王記上廿二:11)。Á「七」teh表示完美、神聖,因為án-ne,「七個角」,表示這是一個完全ê君王,伊是大有能力ê領袖,mā是擁有極大權柄ê統治者。「七個目睭」,表示完全透視、一清二楚,一點mā不含糊ê意思。

    Chit位拯救者被「差派到世間各地去」,表示伊並m̄是專屬某一個族群,á是某一個地區。因為上帝愛所有ê人(參考約翰福音三:16),並m̄是只愛某一個部分人而已(參考提摩太前書二:4—6)。

    第7到8節,ná「羊羔上前」tùi坐tī寶座上hit位ê正手中「Kā冊卷接過來」了後,ná四個活物kah二十四位長老隨時「仆tī羊羔面前」。而且每一個長老手中lóng the̍h「豎琴」,kah「貯滿tio̍h香ê金爐」,而「chit-ê香就是眾信徒ê祈禱」。注意chia ê「香」字,原希臘文是「聖徒」ê意思,指hiah-ê堅守信仰到最後lóng bē改變ê人。當信徒在世間被迫害、鄙視(siùⁿ)ê時,tī天頂koh活ê長老手中,卻lóng成做非常珍貴ê「香」祭,呈現tī上帝ê面前。In kā chiah-ê受tio̍h迫害ê記事,用「祈禱」ê方式向上帝說明,kā一切lóng呈現tī上帝面前。

    第9到10節,這是一首歌頌犧牲ê羊羔之愛ê詩歌,是一首「新歌」。
    「新歌」mā是用來表示一個全新ê時代已經開始(參考啟示錄廿一:5),因為án-ne,tio̍h用「新歌」來回應上帝ê「新創造」。

    「獨獨你配」,chit句是teh回應第2到3節ê「甚麼人配」、「無一個」。Tī chia則提起有資格「配接受hit冊卷」ê,就是hit-ê被殺害ê「羊羔」,只有伊chiah有資格,因為伊bat「犧牲流血」,獻上性命作為贖罪ê代價。

    「各部落、各語言、各民族、各國家」,意思就是teh指tùi世界各地kā屬tī chit-ê羊羔ê子民贖回。Chit種講法ná親像舊約先知所預言ê hit位teh beh來臨ê彌賽亞(拯救者)ê角色,伊ê工作就是beh「Kā人贖回來,歸hō͘上帝」。Hō͘ in lóng成做「祭司」,帶領人敬拜「事奉」上帝,hō͘全世界lóng順服tī上帝ê旨意之下。

    第11到12節,這是另外一個詩班,chit-ê詩班包括四個活物kah廿四位長老。Chit首詩歌仝款mā是teh強調「被宰殺ê羊羔」,chiah是真正ē-tàng phah開冊卷ê。

    Chia ê「千千萬萬天使ê聲音」,表示數字chē到數算不盡。Tùi chia mā thang看出,天頂除了有二十四位長老之外,iáu有數算不清ê天使。作者用chit種修辭來表示天頂ê壯觀、偉大,大到hō͘人無法度數算。

    Chit-ê「被宰殺ê羊羔」會領受七種榮耀,而chiah-ê榮耀ê用詞,lóng是大衛王當年帶領全體以色列人民歌頌上帝所唱詩歌ê內容(參考歷代志上廿九:11—13)。Chit七種歌頌ê詞句包括有「全能、豐富、智慧、力量、尊貴、榮耀,kah頌讚」等,這lóng是teh指完美、至koân ê境界ê意思。

    第13到14節,這是另外一首詩歌,kah第四章11節是類似ê頌詞。Chit首詩歌是「天頂、地上,kah地下腳ê生物,海裡ê生物,宇宙中ê萬有」等,lóng完全結合做伙歌頌上帝ê偉大。

   「Lóng歸tī坐tī寶座上hit位kah羊羔」,chit句詩歌是chit三首詩歌ê siōng重要信息 。

重新查詢 專卷研經 啟示錄系列
錯誤回報,請聯繫