啟示錄 19章1節 到 19章10節   背景資料  上一筆  下一筆
第十九章ê 1到10節是繼續第十七到十八章,teh歌頌上帝對巴比倫帝國進行嚴厲審判ê結果。然後tùi第十九章11節開始,直到第廿二章結束,就是屬tī啟示錄最後ê一個段落。Tī chit-ê最後ê段落中,除了繼續論到巴比倫滅亡ê情景之外,mā講tio̍h tī耶穌基督koh再臨chìn前,hiah-ê反基督ê氣力會koh一pái chhōe機會倒拋,基督徒kah教會會受tio̍h攻擊,m̄-koh續落來了後,就thang看tio̍h新天新地ê出現,mā就是新ê耶路撒冷來臨。

    Tī chit段經文中,共計出現三組呼teh-hoah歌頌上帝ê聲音,第一組tùi第1到4節,呼喊ê聲音是來自天頂ê一大陣人;第二組是第5節,聲音是tùi寶座發出;第三組是第6到8節,聲音mā kah-ná是來自一大陣人,m̄-koh是m̄是kah第1節ê人仝款,並無確定。Chit三組所歌頌ê lóng tùi「哈利路亞」開始,因為án-ne,mā hông稱做「哈利路亞頌」。

    Chit段經文是續接前第十八章所描述上帝懲罰巴比倫帝國了後,天頂就跟tòe發出歡喜頌讚ê歌聲,表明對上帝懲罰巴比倫帝國ê歡喜。

    第1節,chit節ē-sái講是teh回應第十八章20節所提起ê「天ah,tio̍h歡喜」。Chia提起有天頂kah-ná有「一大陣人teh呼喊」,chit群人是第七章9節所提起是「經歷過大災難ê」信徒,á是「為耶穌做證來殉道ê人」(參考啟示錄六:10、十七:6)。M̄-koh mā有可能是teh指「千千萬萬天使」teh歌頌ê聲音(參考啟示錄五:11)。Á是第4節則提起tī chiah-ê大歌聲中,iáu有二十四個長老kah四個活物同聲齊teh唱「哈利路亞」。

    「哈利路亞」chit-ê詞連續出現四pái(參考1、3、4、6節)。這是猶太人用來歌頌上帝ê siōng普遍ê話語,意思就是「Lín tio̍h o-ló上帝ê名」(參考詩篇一三五:1)。「救恩、榮耀、權能lóng是tùi咱ê上帝來ê」,chit句話thang參考馬太福音第六章13節,耶穌基督教導祂ê門徒祈禱ê時用ê結尾句話。Mā thang參考啟示錄第十二章10節,天使用chit種句話teh o-ló上帝ê救恩。

    第2節,大家齊聲歌頌上帝是因為祂審判hit-ê「大淫婦」,而且上帝ê審判是「真實公義」ê。因為伊除了「敗壞世界」之外,伊mā同時殺害「上帝奴僕」(參考啟示錄十六:5—6、十八:20),對tī án-ne惡質ê罪行,上帝ê審判絕對是嚴厲ê。

    第3節,這是第二pái用「哈利路亞」來歌頌上帝。

    「火燒ná大城ê煙不斷」,表示懲罰極重,受罰ê城非常悽慘,差不多是hō͘焚燬殆盡,表示上帝懲罰羅馬帝國mā會是án-ne嚴厲。

    第4節,這是第三pái用「哈利路亞」歌頌上帝公義ê審判。Chit節mā koh一pái提起「二十四位長老kah四個活物」,這mā是本冊最後一pái提起。In ê出現lóng是為tio̍h歌頌o-ló上帝,thang參考第四章到11節、第五章8到14節。

    「阿們」,意思是「心內完全同意」。

    第5節,這是另外一個聲音,有mài-koh tī第1節發出ê聲者。
    「續落來」一詞,表示chit-má發出ê「聲音」kah頭前ê聲音是相關連ê。Chia特別說明聲音是tùi「寶座」發出ê,而chit聲音ê內容,是teh召喚所有「敬畏」上帝ê人lóng來歌頌「o-ló」上帝。

    第6節,這是第三個聲音出現,kah頭前兩種仝款,lóng是一大陣人ê聲音,m̄-koh聲源是m̄是仝款並無確定。作者用三種無仝ê內涵來描述chit pái聲音ê差別,第一個ná親像「一大陣人」發出ê聲音;第二個聲音ná親像「大瀑布」仝款,chit-má則像「雷轟ê聲音」,聖經作者ài用「雷轟」ê聲音表示上帝ê拯救力量臨到(參考以賽亞書廿九:6,約珥書三:16)。

    「全能ê上帝做王」,意思是teh指上帝掌權,m̄是屬tī政治領域,卻是性命ê領域,即使是統治者,in ê性命mā tī上帝手中,上帝是in ê王,是in性命ê主宰。

    第7到8節,除了歌頌上帝ê偉大之外,Tī chit兩節siōng特別ê是提出「羊羔ê婚期到à」,chit種用婚姻ê關係來描述上帝kah祂ê子民之間關係,ná親像「夫妻」一般有bē-tàng分ê親密關係(參考以賽亞書五十四:5—8,以西結書十六:8,何西阿書二:16、19—20)。啟示錄作者約翰tī chia beh表明一個重要信息:上帝絕對bē hō͘祂所意愛ê「bó͘」受難而無顧。

    「潔白光亮ê麻紗衫褲」,chit間代表ê意思就是上帝眾子民ê「義行」,表示in確實是有遵照上帝ê旨意做tāi-chì,無任何邪念。

    第9節,「你beh寫落來」,這是天使hō͘作者約翰ê命令,ài伊寫落來所看tio̍h ê chiah-ê異象。Á tī chit記錄中特別強調ē-tàng受tio̍h邀請參加羊羔婚宴ê是「有福」ê人。因為he是上帝國度ê喜宴,上帝就是婚宴ê主人。先知以賽亞講上帝ê喜宴非常「真貴」(參考以賽亞書廿五:6)。

    第10節,chit節講beh敬拜ê對象,m̄是天使,因為天使mā是人,只因為忠於上帝了後,hō͘ 上帝揀選出來傳達上帝信息ê「奴僕」。天使m̄是神,m̄是萬物kah性命ê創造者,mā是上帝「奴僕」。

    啟示錄作者一直努力teh傳達一個信息:舊約先知所預言ê事,lóng tio̍h tī耶穌基督ê身上彰顯出來。耶穌基督就是舊約眾先知所預言拯救之愛ê總結。

重新查詢 專卷研經 啟示錄系列
錯誤回報,請聯繫