啟示錄 14章6節 到 14章13節   背景資料  上一筆  下一筆
Chit段經文出現三個天使ê異象,這帶hō͘ tú-teh受難中ê信徒真大ê安慰,並且清楚指出迫害者ê國度會真緊to̍h倒塌,而棄sak上帝ê人mā會受tio̍h嚴厲ê審判kah懲罰。相對ê,所有受tio̍h迫害ê信徒會得tio̍h上帝賞賜ê恩典,有份tī天頂喜樂ê行列。

    第6節,「一個天使tī空中teh飛」,chit位會飛ê天使beh向全世界傳出「永恆ê福音」,這是teh指tio̍h上帝ê信息。因為「永恆」是屬tī上帝,人類lóng是目nih-á有限ê(參考以賽亞書四十:6—8)。作者用chit種方式teh說明:羅馬帝國統治者雖然看起來真強猛、有力量,m̄-koh基督徒m̄免驚,hiah-ê lóng是目nih-á ê,真緊to̍h會成做過去,因為伊ê掌權bē是永恆ê。

Á「永恆ê福音」,表示上帝對人類拯救ê疼永遠無改變,一直存在tio̍h。而且非常重要ê,chit-ê「福音」是對所有ê人傳出ê好消息。作者用「各國家、各部落、各民族,kah講各種語言ê人」來形容全世界(參考五:9、七:9),mā就是所有ê「四方」ê意思(參考詩篇六十六:8)。

    第7節,這會飛ê天使傳出ê信息,講上帝就是「創造天、地、海,kah一切泉源ê主」,chit句話表明ê意義就是:羅馬皇帝並m̄是創造者,伊kah一般人lóng仝款,不過是受造者而已。

    第8節,「第二個天使」mā tòe傳出信息,伊連續傳出兩pái「倒塌了」ê信息。Chia作者用「大巴比倫」隱喻tio̍h羅馬帝國必定會「倒塌」。它倒塌ê主要原因,是lim了「淫蕩ê烈酒」。「淫蕩」一詞,Tī聖經通常是用來表明對上帝ê無忠實,四界鑄造、雕刻神明崇拜ê行為。Á「烈酒」是teh代表上帝嚴厲ê懲罰(參考詩篇七十五:8,以賽亞書五十一:17,耶利米書廿五:15—16)。

    第9到11節,這是「第三個天使」傳出ê聲音。Chia提起上帝kā怎樣懲罰chiah-ê lim了「烈酒」ê人。Chit-ê第三位天使傳出ê信息指出:任何拜chit-ê怪獸ê人會ná親像lim了烈酒仝款,受tio̍h上帝嚴厲ê懲罰。而且上帝ê懲罰m̄-nā bē減輕á是消失,ná親像無經過「沖淡」ê烈酒仝款。上帝ê懲罰有「燄火kah硫磺ê酷刑」,ná親像創世記第十九章上帝毀滅所多瑪城kah蛾摩拉城ê情景仝款,而且koh khah嚴重,因為hit-ê懲罰是親像「永遠無停ê煙」一直冒,án-ne chiah是siōng恐怖ê事(參考啟示錄十九:3、二十:10)。

    第12節,相對tī第9節hiah-ê拜怪獸ê人,就是hiah-ê確實「服從上帝命令、忠於耶穌ê上帝子民」,作者koh一pái呼籲in一定會有「耐心」。意思就是m̄-thang受tio̍h hiah-ê邪惡者ê誘惑,á是因為受tio̍h迫害就想beh逃避而妥協,一定會堅持到最後。

    第13節,「為主來死ê人實在有福氣!」chit句話thang參考馬太福音第五章11到12節,以及帖撒羅尼迦前書第四章13到14節。Lóng teh表明為福音而受難者,lóng會因上帝ê救恩ē-tàng「結束勞苦而享安息」。Chia ê「勞苦」,指ê是身軀因為工作到無法度歇睏,甚至工作到死去。另外一方面,就是teh指tī心靈上tú-tio̍h侮辱而受苦。作者tī chia講chiah-ê lóng會跟tòe性命ê結束而釋放。M̄-koh卻因為in ê信仰堅持bē改變,而hō͘ in結出信仰ê果子。Chit-ê果子會「跟tòe in」tī上帝ê救恩裡,享受永遠ê「安息」。

重新查詢 專卷研經 啟示錄系列
錯誤回報,請聯繫