Chit段經文是另外一個新ê異象，作者約翰tī chia beh說明，上帝ê審判bē停止，mā bē輕易了事，祂一定會真清楚進行審判，hō͘任何迫害信耶穌基督ê人lóng會受tio̍h上帝嚴厲ê審判。Koh講，chia出現ê天使，有特別註明伊ê角色是「管理火ê天使」。

    Chit段經文ê資料真可能取材自但以理書來（參考但以理書七：13），形容拯救者「人子」kā tùi天頂乘雲而下。Chit種異象mā被福音書作者採用，收集tī耶穌基督ê言論中（參考馬可福音十三：26、十四：62）。Chit位人子，ná親像一個準備收割ê作穡人仝款，手中the̍h鐮刀上五穀場。這是象徵tio̍h審判ê工作teh beh進行，對tī hiah-ê iáu teh受難中發出haiⁿ-haiⁿ叫之聲ê基督徒來講，to̍h是心中siōng大ê期待。

    第14節，注意chia ê「人子」，kah福音書中提起ê「人子」之希臘文是無仝ê。Tī福音書中所用ê「人子」chìn前有加上定冠詞，表示是特定ê對象。Tī chia所用ê「人子」並無加上定冠詞，因為án-ne，只有ē-tàng當做「有一位人子」。Chit位人子ê「頭殼頂戴tio̍h金冠」，這表示伊充滿榮耀。Chit位人子ê「手裡the̍h利劍劍ê鐮刀」，用來譬喻上帝審判ê時刻來臨。

    第15到16節，「另外有一位天使」，伊「向坐tī雲上」ê hit位「人子」，teh-hoah「收割」時chūn到à，這是因為時刻到à，「地上ê農作物就被收割了」。Koh講，tī收割ê同時mā kā農作物分做兩類，其一就是真實有結果ê，其二是空殼ná親像糠秕ê（參考詩篇一：4，以賽亞書廿七：12，馬太福音三：10、12）。

    第17節，「koh看見另外一個天使tùi天頂ê聖殿出來」，chit位天使mā是仝款「有一把利劍劍ê鐮刀」。Chit位天使是奉上帝ê差遣來進行「收割」（審判）ê工作。

    第18節，chia「有一個管理火ê天使」，伊ê手上並無the̍h鐮刀，卻是向hit-ê tùi天頂聖殿出來ê天使下命令，ài伊the̍h著手上ê「鐮刀割取地上ê葡萄」，因為葡萄「已經熟了」。先知約珥mā bat特別提起收割葡萄了後， tio̍h榨壓葡萄（參考約珥書三：13b），用chit種方式來隱喻審判ê嚴厲，是無thang逃避ê所在kah機會。

    第19節，kā收割出來ê葡萄「扔tī上帝大受氣ê大榨酒池裡被踩踏」。Chit種譬喻對猶太人來講是非常清楚ê，因為收割葡萄了後， tio̍h hiat入去榨壓葡萄ê酒池中，然後用榨出來ê葡萄汁來釀酒。Chit句「上帝大受氣ê大榨酒池」，thang參考以賽亞書第六十三章3到5節。

    第20節，「葡萄tī城外ê榨酒池裡被踩踏」，而且葡萄汁溢出來「淹滅了三百公里」之真闊，koh「深約兩公尺」，chiah-ê lóng tī說明上帝ê審判真徹底。