啟示錄 13章1節 到 13章18節   背景資料  上一筆  下一筆
第十三kah十四chit兩章,作者就用「怪獸」連續出現ê方式,來描述chiah-ê邪惡勢力怎樣chhōe機會beh攻擊忠實tī上帝ê子民。Chit兩章mā是繼續第十二章17節所講ê,戾龍會繼續不斷來攻擊。因為án-ne,chit兩章ê「怪獸」就是頭前所講ê「戾龍」。

    啟示錄作者ê時代,面臨羅馬皇帝多米田殘酷迫害基督徒ê環境下,是用chit種方式描述羅馬皇帝ná親像「怪獸」一般teh威脅並管轄in,一個接一個出現,帶hō͘基督徒驚惶kah不安。甚至會hō͘基督徒感覺上帝kah-ná已經bē記得祂ê子民ê苦難,á是邪惡ê勢力已經掌權了ê款。Mā因為chit-ê緣故,作者一再提醒並鼓舞當時ê基督徒,一定會有「耐心kah信心」(參考啟示錄十三:10),因為上帝審判ê日子teh beh來臨。

    第1節,「我看見一隻獸tùi海裡起來」,chia並無說明這是甚麼獸。M̄-koh tùi chit隻獸擁有「十個角kah七個頭」,kah第十二章3節出現ê hit隻戾龍仝款,mā是有「七個頭kah十隻角」。無仝ê所在是chit隻怪獸tī「每一個角上lóng戴tio̍h王冠」,而戾龍則每一個頭殼頂lóng戴tio̍h王冠。其實「頭」kah「角」lóng仝款ê意思,teh代表領導、統治者,有權力ê人。

    Chia特別強調「每一個頭殼頂寫tio̍h侮辱上帝ê名號」,意思是chit七個頭ê頂面lóng有一個名號是自稱做某某神,表示in lóng kah上帝仝款偉大,chit種態度就是teh褻瀆上帝,m̄ kā上帝khǹg tī眼中。如果「七個頭」teh表示羅馬皇帝,án-ne,tī啟示錄作者ê時代,tú好歷經了奧古斯都皇帝了後ê七位羅馬皇帝:包括有(1)提庇留(Tiberius,14~37 AD)、(2)加里古拉(Caligula,37~41 AD)、(3)格老丟(Claudius,41~54 AD)、(4)尼祿(Nero,54~68 AD)、(5)威斯巴先(Vespasian,68~79 AD)、(6)提多(Titus,79~81 AD)、(7)多米田(Domitian,81~96 AD)。

    第2節,作者描述chit隻tùi海裡起來ê怪獸身上,有豹、熊、獅等凶猛野獸ê特徵。作者用chit種方式teh表達這是隻非常奇怪、無人性而且凶猛ê野獸。因為chit隻像戾龍ê怪獸,連嬰á、孩童lóng會生吞落去(參考十二:4)。

    第3到4節,chit節真清楚講出chit隻怪獸「kah-ná受過致命重傷」,因它bat tùi天頂被擊敗摔到地起來。M̄-koh牠卻有復原ê能力,而且復原ê非常好。為甚麼會án-ne?作者並無解釋。Chit兩節teh隱喻:真chē人歡喜跟tòe殘暴者行。Á是講:一個統治者非常殘暴,卻iáu是會得tio̍h真chē人跟tòe,甚至kā它當做是「拯救者」、「神明」一般ê看待。Chiah-ê有權勢者tī siōng顛峰ê時,其跟隨者lóng是會發生歌頌ê聲音,認為天下腳無人ē-tàng kah之相媲美。M̄-koh聖經作者則一再提醒,無論是在世間á是宇宙之間,lóng chhōe bē-tio̍h thang kah上帝相比ê對象(參考出埃及記十五:11,詩篇三十五:10、一一三:5)。

    第5到7節,chit段經文描述chit隻怪獸ê特徵,它有「一張誇大褻瀆ê嘴巴」,表示牠看bē起上帝,一「開嘴污辱上帝ê名」,mā污辱上帝ê「居所」。所謂「居所」,thang理解是teh指上帝子民(基督徒)聚會ê所在,mā就是「教會」。甚至連「所有tòa tī天頂ê」mā lóng被褻瀆,這表示怪獸ê行踏已經是到à無法無天ê狀態。Chia「tòa tī天頂ê」,是teh指圍tī寶座邊ê天頂使者。這真清楚表示凡是上帝ê選民lóng tī chit隻怪獸「攻擊」ê範圍之內,無一個特例thang佳哉免得被波及。

    「四十二個月」,mā就是三年半ê時間,表示chit隻獸chhun落來ê時間無chē了(參考啟示錄十二:12)。

    第8節,會kā chit隻怪獸當做是神明敬奉ê,就是hiah-ê名已經無tī「性命冊」上ê人民,chiah-ê人乃是棄sak上帝、棄sak上帝ê人。聖經ê作者強調只有tī性命冊上有名ê人,chiah ē-tàng進入上帝ê榮耀內底(參考腓立比書四:3—4,啟示錄二十:15、廿一:26—27)。

「羊羔」,thang參考第十二章11節。這是teh指拯救ê記號。

    第9節,「有耳áê,lóng tio̍h聽!」表示人應該tio̍h注意聽天頂ê信息,並m̄是來自地上統治者ê命令。

    第10節,chit節ê前半句,啟示錄作者引用了耶利米書第十五章2節,下半句則引用馬太福音第廿六章52節耶穌所講ê話。前半句主要teh說明:tī chit迫害中間,mā ē-tàng看出上帝ê旨意,因為án-ne,m̄免驚惶kah逃避,tio̍h勇敢地接受,心甘情願地為信仰承受無法度避免ê迫害。後半句則是teh指出chiah-ê迫害人ê,結局會受tio̍h仝款ê對待(報應)。

    「上帝ê子民lóng需要有耐心kah信心」,chit句是引用馬太福音第十章22節,耶穌基督講為tio̍h伊而堅持到底者,必定會得tio̍h拯救。

    第11節,chit節講另外一隻tùi地裡出來ê獸有「兩個角」,而且「像羊ê角」,意思是看起來真親像羊羔(參考十二:11),其實是一隻koh khah恐怖ê怪獸。因為牠會偽裝來迷惑信徒。Chit種情形tī每一個動盪ê時代lóng會發生。

    第12節,chit隻tùi地起來ê怪獸,「採行頭一隻獸ê一切大權」,意思是chit隻獸是teh執行前一隻獸所訂ê一切迫害計畫,就是前隻tùi海裡起來ê怪獸ê幫兇。Chit隻獸做siōng惡質ê事,就是「強迫大地kah所有tòatī土腳ê」,lóng tio̍h「去拜」ná頭一隻獸。其實,無論是地裡á是海裡出來ê chit種怪獸,lóng是「像戾龍」仝款。

    第13到14節,chit兩節lóng說明chit隻怪獸大有能力,會「行大奇蹟」,chit款tāi-chì siōng容易迷惑人心。它既有能力「hō͘火tùi天降tī土腳」,「迷惑了所有tòatī土腳ê人」,因它有chit種能力,因為án-ne koh khah容易迷惑當時ê人,認為它就是神,iáu吩咐「世間ê人」為chit-ê怪獸造「一座像」,供世人崇拜。

    第15節,chit-ê第二隻獸看起來就kah-ná擁有ná親像上帝ê能力仝款,「thang kā活氣pûn入去hit頭一隻獸ê像裡去」(參考創世記二:7),而且「殺害所有不拜獸像ê人」,這表示tī一片迫害ê環境中,iáu是有人堅持對上帝ê忠實,除了上帝以外,絕對m̄承認有其他ê上帝。

    Tùi chia看tio̍h chit-ê第二隻怪獸顯現神跡,是為tio̍h beh人民去拜ná第一隻怪獸。結果兩隻怪獸互相連結做伙,力量koh khah大,迫害人民ê壓力mā增強。

    第16節,chit-má chit隻怪獸則命令所有ê人,無論是自由á是奴隸ê,lóng tio̍h做記號,表示所有ê人lóng一定tio̍h服從牠。Chit種記號有ê tī「正手」,有ê tī「額頭」。「正手」,表示「權柄」ê意思。一個人tī「正手」被印上記號,表示伊ê權柄已經無koh屬tī伊家己,卻是屬tī記號上ê主人。「額頭」ê記號,這是古代奴隸通常hông印記ê所在,清楚而且容易辨識。

    第17節,「無chit-ê印記,就無法度做買賣」,chit句話已經真清楚統治者用chit種方式,逼其統治下ê人民一定tio̍h順從。這會hō͘基督徒感受tio̍h生存ê危機,因為無經濟活動kah商場買賣,就無生活ê機會。若是迫害到chit種情況,想beh無受侮辱,恐驚就無有jōa-chē生存空間à。 
   
    第18節,「chia需要有智慧」,聖經談「智慧」,意思是teh指認bat上帝ê意思。因為án-ne,認bat上帝ê人,就會明白甚麼人是虛假ê神。Chit隻怪獸ê代號,就是一個數字,而此數字就是「六百六十六」。有真chē聖經學者解釋chit-ê數字tú好就是尼祿皇帝名ê代號。因為古代ê人會用拼音字母當做數字來表示,親像「A」teh代表「1」chit-ê數字。M̄-koh mā有學者認為「六六六」有另外一個意思,是teh指「七」ê一個缺角,表示無完整。它象徵tio̍h即使有án-ne大有能力ê統治者,mā不過是一般人而已,並m̄是創造萬物ê上帝。M̄-koh「六六六」chit-ê數字真確ê意義是甚麼?實在真oh明白。

重新查詢 專卷研經 啟示錄系列
錯誤回報,請聯繫