啟示錄 11章15節 到 11章19節   背景資料  上一筆  下一筆
Tùi第15節開始,這是第七個天使吹響了號筒。因為天使吹響chit-ê號筒,mā同時結束啟示錄第一部分ê段落。

    Chit-ê段落kah頭前第七個印phah開ê時ê景象無相仝。Tī第七個印phah開ê時,天頂是寂靜無聲長到半小時之久。chit-má吹響第七支號筒ê時,天頂就傳出真大ê聲音。仝款ê是,tī第七個印開啟了後,就koh隨時有新ê異象出現,就是七個天使the̍h七支號筒。Tī-chia,第七支號筒吹響了後,也kah頭前第七個印仝款,除了聽tio̍h大聲響歌頌上帝ê偉大外,續落來又koh是連續不斷出現新異象。

    M̄-koh第七支號筒所phah開ê景象,並無親像第14節b句所提起ê「第三種災難就到à」,kah頭前幾枝號筒出現過ê景象非常無仝款;頭前ê異象是災難接踵不斷而來,m̄-koh tī第七支號筒吹響了後,所呈現ê景象是公開宣告基督成做王,原本坐tī上帝面前ê廿四位長老,chit-má lóng坦覆 (thán-phak)tī上帝面前,同聲歌頌上帝ê偉大。

    第15到19節ê chit段經文,是第七個天使吹響號筒後ê情形,內容包含一首o-ló上帝ê詩歌。

    第15節,chit節說明第七支號筒吹響後所出現ê情景,chia講第七個印phah開了後,隨時就看tio̍h新ê異象,就是天頂傳出真大ê聲音。Chit聲音正式宣告「統治宇宙ê大權已經屬tī咱ê主kah伊所立ê基督了」,這說明基督掌權ê範圍,是包括kui個受造ê宇宙,而且chit pái掌權kā是「世世無窮」,mā就是無有時間限制ê,永無止盡ê。

    第16節,chit-ê「廿四個長老lóng坦覆 (thán-phak)tī土腳」,每pái描寫chit廿四位長老tī歌頌o-ló上帝ê時,lóng是坦覆 (thán-phak)tī土腳ê(參考四:10、五:8、14、十九:4)。

    第17到18節,這是一首短詩,teh頌讚上帝ê偉大。

    第17節,「昔tī-teh、今tī-teh ê上帝」,chit句話表示ê意義就是「一直活teh、存在tio̍h ê上帝」。Chia用「昔tī-teh、今tī-teh ê上帝」,kah第一章4節、8節、第四章8節ê「昔tī-teh、今tī-teh、將來mā永遠tī-teh」用法無仝;chia並無「將來mā永遠tī-teh」,真可能tī啟示錄作者ê觀念中,世界末日已經就beh來到,上帝ê審判teh beh展開,一切lóng會重新開始。所有ê舊秩序lóng會結束,未來是一個全新ê時代,mā是一個新創造ê世代(參考廿一:1—5)。

    「全能ê上帝」,chit句話mā teh說明基督教信仰所見證ê上帝ê特徵之一,上帝乃是全能者(參考創世記十八:14,約伯記四十二:2,馬可福音十:27)。啟示錄作者kúi-nā pái使用「全能ê上帝」chit-ê詞(參考一:8、四:8、十五:3、十六:7、十九:6、廿一:22)。作者約翰講「全能ê上帝」ê時,是用祂hit-ê「大權能」ê權柄,統治宇宙萬物kah人類世界,而chit-ê「大權能」ê權柄是tī人無法度預知ê情況下出現ê。

    第18節,chit節講tio̍h上帝ê審判來到ê情景有下列幾個現象:
    上帝ê「義怒」,表示是上帝公義ê審判。Mā是審判ê時刻到à,所有ê人,即使是「死」去ê人mā tio̍h「受審判」。

    「你ê奴僕」,是teh指上帝ê奴僕,包括有「先知」(指傳達上帝信息者),以及忠實ê「子民」,kah所有「敬畏」上帝ê人,lóng會得tio̍h「獎賞」。Chiah-ê人是不分貧賤富貴ê。

    「毀滅大地ê人會被毀滅」,chiah-ê就是造成人類世界混亂,á是hō͘人khiā起ê環境受tio̍h破壞ê人。

    第19節,「天頂ê聖殿」,這是teh指屬tī上帝子民敬拜ê所在(啟示錄作者一再使用chit-ê名詞,參考三:12、七:15、十五:5)。Mā teh表示人ê心靈kah上帝交流ê所在。另外提起「約櫃」是khǹg tī聖殿中,這mā teh表明,敬拜上帝,就是teh實踐kah上帝所立ê約。M̄-koh敬拜一定tio̍h是用真誠ê心靈。

    Chit節表示審判ê時刻來到,上帝就降臨而且坐tī審判ê寶座上,同時有震撼人心、hō͘人驚惶ê「sìh-nà、雷轟、響聲、地動,kah大冰雹」等出現,chiah-ê lóng teh表示上帝已經來到審判ê寶座前,beh開始進行祂公義ê審判,hō͘所有ê人心生敬畏。

重新查詢 專卷研經 啟示錄系列
錯誤回報,請聯繫