這mā是一篇歌頌上帝就是以色列民族ê君王ê詩篇。Tùi第九十五篇到九十九篇ê中間，以chit篇siōng-kài特別，因為chit篇詩歌是偏重tī以色列民族kah上帝之間ê關係。Ná親像頭前真chē詩篇所強調ê，chit位萬國之王ê上帝，是一個公義ê君王，祂一定會主持公道。

Tī第3節、第5節、第9節等等，lóng有一句「伊神聖莊嚴」，這清楚kā咱講chit首詩是用頌讚上帝做主題寫ê。Chit首詩ê特色是tī：上帝ê神聖莊嚴，tùi祂ê統治方式表明出來，親像tī第2節，提起上帝ê統治威力超越萬國。

第1到3節，「ki-lō͘-pek」，這是teh指上帝ê天使。Tī上帝ê約櫃，有雕刻ki-lō͘-pek tī蓋kòa頂面，表示上帝kah以色列人民之間有上帝ê天使ki-lō͘-pek看守tio̍h約。以西結書講in固守tio̍h上帝寶座（參考以西結書十一：22），in聽從上帝ê命令做tāi-chì。Chit首詩篇開始，就講上帝做王掌權，大地就會震動，只要是上帝做王，萬國萬民lóng會來歸順，而且會同出頌讚歌聲傳揚祂ê聖名。

第4到5節，chit兩節講出上帝ê特性，就是喜愛公義、好憐憫（參考彌迦書六：8）。Chia用「喜愛公正」、「建立公平」、「伸張公義」、「支持公道」等詞來形容chit位ná親像君王ê上帝。

第6到9節，chit段短短詩歌，用摩西、亞倫，kah撒母耳來說明tùi出埃及進入曠野，一直到進入迦南地了後ê歷史，說明上帝會垂聽in ê祈禱。雖然tī in行過ê路上，是一再犯罪hō͘上帝忿怒、艱苦心，甚至用嚴厲ê方式懲罰以色列人民，m̄-koh chiah-ê懲罰lóng表達上帝是一個赦免ê上帝。若m̄是上帝有憐憫ê疼，以色列人民早就被敵人hō͘消滅。因為án-ne，詩人用chit種詩歌teh帶領以色列人民歌頌上帝。