詩篇 98章1節 到 98章9節   背景資料  上一筆  下一筆
Chit篇mā是屬tī o-ló上帝ná親像君王ê詩,tī祂ê治理之下ê人民,lóng會向chit位偉大ê君王唱出歌頌ê詩歌。Chit篇詩歌ê踏話頭kah第九十六篇仝款,而且結尾mā是仝款。Koh tī最後一段(第九十六篇11到13節,對照第九十八篇7到9節)lóng有仝款ê主題,teh呼籲所有受造ê大海、大地,以及其中ê生物lóng tio̍h歌頌上帝。

第1到3節,tùi chit段詩歌中,thang看出chit首詩比較khah接近tùi受掠ê巴比倫tńg來國之作品,因為tī第3節提起上帝「謹守向以色列人所做ê應允」,然續後落來tī第3節ê c句講「全地ê人lóng看tio̍h咱上帝ê救恩」,chit種句話清楚說明是以色列人民tī患難中得tio̍h解脫後,對上帝慈愛ê回應。

上帝「行了奇偉ê事」,chit種句話通常lóng是teh指上帝伸出救援ê手,帶領以色列人民行出埃及,而且kā紅海ê水分開,hō͘以色列人民平安地行過去,卻同時埋葬了埃及大軍tī紅海中。續落來講上帝以「大能kah神聖ê氣力得tio̍h勝利」,chit句話kah以色列人民去相戰有關係。詩人beh表達一個基本觀念:若是無上帝同在出戰,就無辦法得tio̍h勝利。因為是上帝為以色列人民相戰。Á上帝會出手相戰,是為tio̍h beh拯救被欺壓者脫離欺壓者ê手。上帝會án-ne做,是為tio̍h beh實踐祂ê諾言,因為祂是「信實」ê上帝,有「無變ê疼」。

第4到6節,「豎琴」、「號筒」、「號角」等樂器,lóng是以色列人民常有,而且是隨身帶ê樂器。豎琴,這是顧羊人手上ê彈弓,是一支藤條搭配tio̍h皮製ê細繩,thang用來攻擊野獸,mā用來攻擊來欺壓ê對手,ná親像大衛phah巨人歌利亞仝款。M̄-koh chit種弓,mā thang用來當豎琴ê樂器彈奏吟唱詩歌。號筒kah號角lóng是用羊角á是牛角製作而成ê吹號樂器。這說明in m̄-nā kan-taⁿ是用口吟唱,mā用chiah-ê隨身帶ê樂器伴奏歌頌上帝。

第7到9節,第7節是對稱句型。「江河拍掌」,是teh指水湧打擊ê聲音。Á「群山」同齊「歡唱」,這是teh指風吹tio̍h樹葉所發出來ê聲音。這真清楚表示山、海lóng tio̍h齊聲歌頌上帝。原因是上帝是統治者,祂用「公義統治世界」,mā用「信實對待萬民」。所有ê人lóng歡喜統治者用這兩項來治理國家。


重新查詢 專卷研經 詩篇系列
錯誤回報,請聯繫