詩篇 91章1節 到 91章16節   背景資料  上一筆  下一筆
這是一首有含chiok厚教導ê詩篇。Mā ē-sái講是一篇詩人teh做信仰告白ê詩歌。Chit首詩篇有一個特色,就是用「啟應」ê方式,因為án-ne,mā是一首tī公眾聚會中吟唱ê詩歌,chit點tùi詩歌ê結構thang看出來。親像:第1到2節,是用「我」,然後第3到8節用「你」;第9節ê a句,原文是用「上主是我ê避難所」,b句是「你以至koân-.ê為居所」,tùi第九節ê b句到第13節,lóng是用「你」。第14到16節lóng是用第三人稱來表達。

第1到2節,領唱ê詩人開始吟唱,講上帝是「我」ê「避難所」、「堡壘」,堅定ê信心講上帝是「我」ê óa靠。

第3到8節,這是民眾回應領唱者所發出ê頌讚詩歌。Tī chit段詩歌中,提起上帝ê慈愛會庇護óa靠祂ê人,無論ná親像「致命ê瘟疫」來襲,á是任何災害,無論是tī暗夜á是日時,lóng m̄免驚惶。就算有「千人倒斃」á是「萬人橫屍」tī四周,lóng m̄免驚。因為上帝一定會懲罰作惡ê人。

第9節a句,ná親像頭前所提起ê,是用第一人稱ê我,詩人講「我以上主為避難所」。

第9節b句到13節,只要知影óa靠上帝ê庇護,上帝一定會保護到無微不至。甚至mā會差派天使用手托tòa óa靠上帝者ê腳,詩人甚至講任何óa靠上帝ê人,lóng會得tio̍h上帝賞賜ê氣力,ē-tàng制伏「獅」kah「蛇」,這是兩種對人性命威脅非常大ê動物。

第12節bat被魔鬼引用來試探耶穌(參考馬太福音四:6),m̄-koh被耶穌責備。

第14到16節,chit段是上帝回應óa靠祂ê人。就算tī患難中,上帝mā會kah這óa靠上帝者同在,hō͘ in ê患難變成「榮耀」。

重新查詢 專卷研經 詩篇系列
錯誤回報,請聯繫