詩篇 78章1節 到 78章37節   背景資料  上一筆  下一筆
這是一首典型ê「史詩」。詩人kā中心點khǹg tī出埃及ê kui個歷史經驗,特別tī曠野背叛上帝ê方面,寫了真chē。Tùi chit篇史詩thang看tio̍h詩人ê用心,是beh伊ê同胞m̄-thang koh再重蹈覆轍,免得犯以前祖先bē記得上帝ê教示而帶來災難。應該tùi歷史ê經歷中醒悟過來,記tiâu上帝拯救ê大恩,若無,會因為背叛上帝帶來koh khah大ê災難。

第1到8節,chit段詩歌ê踏話頭就真清楚,表示beh「phah開歷史ê奧秘」,為tio̍h是beh希望hō͘後代kiáⁿ孫ē-tàng明白tī in ê歷史中所發生ê事,chiah-ê歷史lóng是詩人「所聽見所知影」,而且祖先bat講過非常重要ê一件事,就是詩人提起祖先會違背上帝ê命令、旨意,是因為kā上帝ê誡命hō͘ bē記得。詩人強調無想beh向眾kiáⁿ孫隱瞞chit件事,是為tio̍h beh做為大家ê警戒,免得重蹈祖先失敗ê覆轍。詩人mā希望透過chit篇詩歌,hō͘ 眾kiáⁿ孫知影,上主有「權能kah一切奇妙ê作為」。

第9到20節,tī第12節ê「瑣安ê田野」,這是teh指出埃及ê時代ê埃及首府,設tī尼羅河三角洲東北部ê所在。Chit段詩歌真重要ê所在,teh提醒人民歷史上發生過ê事件,就是北國以色列siōng大支派ê以法蓮,in因為對上帝ê信心不足,tú-tio̍h敵人攻擊就懍neh、驚惶,逃走。In ê祖先bat歷過上帝怎樣chhōa in離開埃及,而且行過紅海,如何在曠野中守護看顧in,m̄-nā日夜lóng teh陪伴 in,連tī炕旱ê曠野地,m̄-nā hō͘ in ē-tàng有泉水止渴,mā hō͘ in thang拾嗎哪。M̄-koh in iáu是懷疑除了嗎哪之外,上帝iáu ē-tàng hō͘ in甚麼食物,chit件事真清楚記載tī民數記第十一章,in懷疑上帝是m̄是ē-tàng hō͘ in「預備肉食」,結果上帝hō͘ in ê大大超過in所需要ê,m̄-koh mā因為in貪婪,而引發瘟疫猖獗,死亡慘重。

第21到31節,chit段經文就是teh描述民數記第十一章ê背景。Tī曠野漂流期間,in一再埋怨上帝hō͘ in tú-tio̍h無水嘴乾ê痛苦,mā hō͘ in tú-tio̍h無糧食ê iau餓困境。M̄-koh上帝tùi石磐出泉水hō͘ in止渴,然後tùi天頂降落嗎哪hō͘ in bē致使iau餓。In從來無看過chit種tùi天頂降落ê嗎哪,因為án-ne kā它稱做「天頂ê糧食」(第24節)。Chit種糧食mā就是第25節所講ê「天使ê食物」,就是teh指嗎哪。以色列人民相信嗎哪就是天頂ê天使teh食用ê。

Chit段詩歌除了講述tùi天頂降落來ê嗎哪外,mā特別提起in向上帝埋怨無肉thang食ê事,就án-ne上帝差遣鵪鶉飛來in營區,hō͘ in lóng ē-tàng食飽,而且iáu食不完。M̄-koh偏偏有人就是貪食不厭,結果引發了恐怖ê瘟疫,第31節講chit pái ê慘劇,致使死去真chē「壯士」,lóng是「以色列siōng優秀ê青年」,確實是件真悲慘ê事。

第32到37節,chit段詩歌看起來真親像福音書記載當時猶太人領袖,一再看見神跡,卻iáu是m̄相信耶穌就是上帝差遣到世間來ê救主仝款。以色列人民tī曠野確實是一再經歷到上帝所行ê神跡奇事,m̄-koh in是一再經歷到,卻瞬間koh bē記得上帝奇妙ê作為,繼續犯罪,因為án-ne,上帝出手懲罰in ê時,in就Tī痛苦中表示悔改、懺悔。M̄-koh轉眼間就koh bē記得。這真親像先知以賽亞傳出上帝ê話所講ê,以色列人民是「用唇舌尊敬」上帝,m̄-koh「in ê心卻遠離」上帝(參考以賽亞書廿九:13),並m̄是真心實意在敬拜上帝、聽從上帝ê旨意,對kah上帝所立ê約,一再毀約,這是上帝siōng-kài艱苦心ê事。

重新查詢 專卷研經 詩篇系列
錯誤回報,請聯繫