詩篇 77章1節 到 77章20節   背景資料  上一筆  下一筆
這是一篇屬tī哀歌ê詩篇,而且是屬tī團體同齊吟唱ê哀歌。第16到19節ê詩歌中,有一半kah詩篇第十八篇8到18節內容仝款,mā thang tùi哈巴谷書第三章10到12節看tio̍h類似ê詩歌。

第1到10節,chit段詩歌詩人表示伊對上帝ê祈求從來m̄-bat停止過,日夜lóng teh祈求,m̄-koh lóng無法度得tio̍h安慰,因為等bē-tio̍h上帝ê回應。Á詩人卻有真堅定ê信心一直teh等待上帝回應。

Tùi第7節開始到第10節,詩人提出連串ê「kám講」,表示伊一直teh問上帝是m̄是已經「切割」了kah他國家、民族之間ê關係了?thang看出詩人寫chit首哀歌,並m̄是為家己,卻是為tio̍h kui個民族á是國家ê災難而寫ê。詩人mā回想過去ê歷史經歷,kui個民族ê生存就是tī上帝奇妙ê恩典下行過來ê。因為án-ne,hō͘人認為真可能是tī亡國tī巴比倫了後寫做ê詩歌。雖然是有chiah-ni̍h大ê苦難,iáu是對上帝有堅定ê信心。Ná親像當年行tī曠野ê日子,雖是真艱困,m̄-koh卻是生存之道。

第11到14節,「我ài會記得你偉大ê作為」,chit句詩歌作chit段詩歌ê主題,詩人表示回想過去ê歷史經歷,知影上帝有美好ê旨意,kah奇妙ê作為,確信無任何神明thang kah上帝比並,這ná親像摩西teh o-ló詩歌中所講ê仝款(參考出埃及記十五:11)。

第15節ê「雅各kah約瑟」chit種用詞,舊約聖經中只出現tī chit所在。約瑟是用法蓮、瑪拿西chit兩支派ê老父,而chit兩支派是北國以色列ê代表,因為án-ne,用「雅各kah約瑟」mā是teh表示以色列kui個民族ê意思。

第16到20節,詩人提起kui個宇宙lóng聽從上帝ê命令做tāi-chì,包括深淵、天空、密雲、大雨、雷轟、sìh-nà、大地、海洋等等,表示上帝是創造者,mā是teh指揮者、管理者。當人認bat chiah-ê了後,就應該知影順服上帝ê帶領,chiah是性命得tio̍h拯救ê途徑,ná親像當年上帝藉tio̍h摩西kah亞倫ê手,帶領祂ê子民離開埃及仝款。


重新查詢 專卷研經 詩篇系列
錯誤回報,請聯繫