詩篇 73章1節 到 73章28節   背景資料  上一筆  下一筆
Tùi第七十三篇開始是詩篇ê第三集。有聖經學者講chit-ê集總共有十七篇詩歌,其中有十一篇是屬tī大衛宮廷內ê大音樂家亞薩(參考歷代志上十五:16— 19)所寫ê。其餘是大衛á是其他樂師所寫ê。亞薩真可能是樂團ê負責人,詩歌並無一定是伊寫ê,m̄-koh可能由伊負責chhōe人完成chiah-ê作品mā無一定。

如果回想所讀過ê詩篇第一篇,就會真清楚發見該首詩講tio̍h「義人」kah「pháiⁿ人」之間ê差別結果。Chit首詩mā是提起「好、pháiⁿ」之間ê差別。編者kā chit首詩khǹg tī第三卷之首,mā是有意用來比並第一卷ê起頭。不過,詩篇第一篇真清楚講tio̍h,好人會興旺,pháiⁿ人會lian去。Á chit首詩篇卻m̄是án-ne,顛倒,chit首詩歌tùi開始到第17節,lóng明顯ê提起pháiⁿ人(á是講做惡ê人)是一再興旺,m̄-koh,好人卻m̄是án-ne,真類似約伯記ê內容。

第1到3節,是chit首詩篇ê序言,特別是tī第1節,詩人就kā結語用來當chit首詩篇ê起頭,伊beh表示:上帝確實是恩待以色列人民,特別是對hiah-ê「心地清潔ê人」,上帝絕對會看顧。雖然是看見真chē邪惡ê人興旺,m̄-koh伊深知上帝iáu是公義ê。詩人mā承認每pái看見pháiⁿ人興旺,家己就會心懷不平。

第4到14節,chit段詩歌真詳細地描述邪惡者所行所為ê事跡,包括kā「驕傲」當做展寶品仝款,kui身軀充滿「暴力」,心中「充滿詭詐」,siōng典型ê是「自高自大,圖謀欺壓別人」,in siōng 拿手ê方式,就是「操縱人間ê同類」,這變成一股大力量,致使「上帝ê子民mā轉向in,一心相信in所講ê一切」,chit點chiah是致使kui個社會崩潰、亂序ê原因。In siōng歡喜講ê一句話,就是「上帝bē知影;至koân-.ê bē發覺」,in會án-ne講,其實就是in ê心中根本就m̄相信有上帝。In心中就是「貪而無厭」等等。當詩人控訴chiah-ê惡形惡狀ê pháiⁿ人ê後,續落來用第13到14節表示相對tī chit種邪惡者,家己卻反tńg顯得無奈kah軟弱,甚至有一種誤解,認為謹慎自守,並無甚麼意義。

第15到20節,詩人表示tńg來到敬拜上帝ê所在—聖殿,終其尾明白過來,原來上帝是會懲罰ê,m̄是有看kah-ná無看tio̍h,mā bē袖手旁觀。M̄是án-ne。當chiah-ê作惡ê人teh講上帝看bē-tio̍h、bē知影ê時,其實,上帝真清楚in所做所為,正teh進行嚴厲懲罰ê審判。上帝beh hō͘ chiah-ê作惡者所有ê一切lóng消滅,陷入恐怖ê結局,in過去所有ê一切,lóng會親像夢仝款,一覺醒來,就都無。

第21到26節,Tī chit段詩歌中,詩人表示家己ná親像約伯teh告白仝款,對上帝ê認bat錯誤,若無,就是無清楚。chit-má已經知影以前ê「心懷不平」是真愚昧ê。M̄-koh仁慈ê上帝並無因為án-ne就拒絕、m̄-chhap伊,上帝iáu是仁慈地伸出祂ê手,扶持伊、勸勉伊、接待伊,hō͘伊享受上帝ê榮耀。伊深深體會tio̍h,上帝chiah是伊性命ê óa靠。

第27到28節,因為明白上帝ê救恩,詩人表示一定會宣揚上帝chit項慈愛,beh帶領大家來óa靠上帝。

重新查詢 專卷研經 詩篇系列
錯誤回報,請聯繫