詩篇 7章1節 到 7章17節   背景資料  上一筆  下一筆
Chit首詩歌tī《希伯來文聖經》有一個標題寫:「大衛因受便雅憫人古實ê攻擊向上帝所唱ê歌。」困難ê所在是chit-ê「便雅憫人古實」是甚麼人?tī chit-ê詩歌裡並無說明。

Chit首詩是屬tī個人ê哀歌,teh祈求上帝替伊伸張公義ê詩歌。有可能是由兩篇以上ê詩歌併成ê,m̄-koh,mā可能是一個作者ê作品。

第1到2節,chia講上帝是人ê「避難所」,意思是上帝乃是人ê óa靠,siōng好ê靠山kah保障。Kā仇敵形容ná親像凶猛ê野獸,mā是詩篇中時常出現ê現象(參考十:9、十七:12、廿二:12—13、16、20—21、三十五:17)。特別對tī teh逃亡ê人來講,任何威脅tio̍h性命安全ê對象,lóng ná親像樹林中ê野獸一般驚人。Tī巴勒斯坦siōng凶猛ê野獸就是「獅」,因為án-ne,詩人用獅來形容威脅伊性命ê氣力。

第3到5節,若是chit首詩歌是大衛寫ê,mā thang看tio̍h伊teh向上帝陳述家己ê無辜,m̄-koh卻受tio̍h迫害。這就kah-ná一個人teh chiù-chōa一般,用來表明家己ê清白。

第6到9節,Tī chit段詩歌中,詩人呼籲公義ê上帝ē-tàng開庭審判chiah-ê作惡ê人。第6節ê「奮起」,意思是teh指「趕緊」ê意思,若無,作惡ê人會危害koh-khah chē ê人。詩人相信公義ê上帝,必定知影甚麼人受到à冤枉、被陷害,上帝一定會獎賞做tāi-chì公正ê人。

第10到13節,chit段詩歌真清楚講出詩人對上帝有絕對ê信心。因為伊認bat ê上帝是公義ê審判者。第11節所謂上帝「日夜懲罰作惡ê人」,表示上帝絕對bē hō͘作惡ê人有喘氣ê機會。M̄-thang認為tī烏暗中作惡,就無人看會tio̍h,mā m̄-thang認為日時頭tī無人跡ê所在作惡就bē有人知影,m̄是,上帝lóng看kah真清楚,因為祂是無所不在ê神。日時暗夜對上帝來講,lóng仝款(參考詩篇一三九:12)。

詩人講上帝已經準備好勢beh懲罰ê工具,包括有「刀」、「劍」、「弓」等致命ê器械,表明上帝隨時會進行審判ê工作。若是iáu不趕緊悔改,就會面臨上帝嚴厲ê懲罰。

第14到17節,chit段詩歌講tio̍h作惡ê人,最後就是hō͘家己所做ê惡hō͘縛tiâu,in挖了陷阱想要害人,結果是害了家己。其實,這mā是上帝懲罰ê一種方式。這ná親像常聽tio̍h ê一句話,講作惡ê人the̍h石頭beh phah人,結果卻是phah-tio̍h家己。

重新查詢 專卷研經 詩篇系列
錯誤回報,請聯繫