詩篇 69章1節 到 69章36節   背景資料  上一筆  下一筆
這是一首哀歌,祈求上主拯救脫離仇敵危害ê詩歌。有kóa詩篇學者認為chit首詩篇kah第廿二篇是「姊妹詩歌」。Tùi第35節ê詩歌就thang看出chit首詩歌ê背景,是猶大亡國了後出現ê。除了詩篇第廿二篇外,Chit篇ē-sái講是tī新約聖經中引述siōng chē ê一篇,計有:

約翰福音第十五章25節(引用第4節)。

約翰福音第二章17節(引用第9節a)。

羅馬書第十五章3節(引用第9節b)。

約翰福音第十九章28到29節(引用第 21節b)。

羅馬書第十一章9到10節(引用第22到23節)。

使徒行傳第一章20節(引用第25節)。

第1到4節,chit段詩歌thang看出詩人面臨ê是性命隨時有危險。詩人用「大水」淹到頷頸、「陷tī泥坑中」、「落tī深水中」、「筋疲力竭」、「目睭花」、敵人比頭毛koh-khah chē、想除滅我ê人jōa-ni̍h-á強大等等等chiah-ê用詞,lóng thang看出詩人確實已經到à siōng危險、差不多無法度喘氣ê危急情況下。

第5到8節,chit段詩歌是詩人teh表達心內ê心境,伊自認tī上帝面前都無隱瞞,是坦誠ê。伊向上帝說明家己所遇tio̍h ê情況,m̄-nā hō͘人辱罵,mā hō͘家己ê親友隔離出來。Chit種狀況kah耶穌所提起ê,為tio̍h伊kah福音ê緣故,可能會tú-tio̍h ê遭遇仝款。

第9到12節,Tī chit段詩歌中,thang看tio̍h chit位受tio̍h委屈ê詩人,真清楚teh表示寧可接受所有ê凌辱,因為伊深深知影,上帝是公義ê審判者,只有上帝siōng清楚發生ê事。第9節提起聖殿,因為án-ne,真可能是發生tī主前586年,聖殿被巴比倫軍隊放火燒毀ê時,詩人真可能是一位利未人,就算想beh護衛聖殿,mā bē-tàng做甚麼,相對ê,換來ê lóng是嘲(sau)笑、侮辱,而伊只有ē-tàng用禁食表示哀傷,穿麻衣表示心內ê哀慟。

第13到21節,chit位詩人真有信心,即使是tī chiah-ni̍h危險ê狀況下,伊iáu是堅信上帝一定會伸手救助伊。因為án-ne,伊祈求上帝不beh hō͘伊被頭前第1到3節所提起ê惡質環境所phah倒。伊祈求上帝用祂永恆ê疼kah應允,救伊脫離chiah-ê危害伊性命ê氣力。

伊深信,上帝知影伊ê遭遇,伊真孤獨,無人同情伊,mā無人想beh幫助伊,甚至tī伊餓了ê時chūn,竟然the̍h毒藥hō͘伊;tī伊siōng乾渴ê時chūn,the̍h酸醋hō͘伊lim,這等於是雪上加霜仝款ê殘酷。Chiah-ê仇敵tī伊身上所做ê事,伊深信上帝lóng看kah非常清楚。

第22到29節,chit段詩歌就是詩人祈求ê詩歌。當詩人teh祈求上帝ê救助同時,mā是teh祈求上帝用chiah-ê惡質手段對待伊ê仇敵,用in仝款ê手路對待in。

第22到23節被使徒保羅引用tī羅馬書第十一章9到10節中,並且kā它說明是「大衛ê詩歌」。M̄-koh是m̄是出tī大衛王ê詩歌,有kóa聖經學者表示無仝ê意見,有ê學者認為kah先知耶利米ê詩歌比較khah接近。

第26節講出詩人ê痛苦是因為tùi上帝來ê懲罰。作者家己認為是一個有罪ê人,因為罪,hō͘伊生活tī災難ê痛苦中。這是因為早期ê人認為tú-tio̍h災難是kah上帝對罪ê懲罰有密切ê關係。Tī chit首詩中,作者mā表示受tio̍h極大ê冤屈,因為伊無偷the̍h得tio̍h不義之財,卻tio̍h承受chit種責任。即使是受tio̍h真chē ê冤屈,作者iáu是表示對上帝有絕對ê信心,相信上帝會拯救伊脫離chit種遭遇侮辱ê處境。

注意第28節,是詩篇第二pái提起關係性命冊ê事,第一pái是tī第五十六篇8節。聖經中提起性命冊ê事記載tī出埃及記第三十二章32、33節;但以理書第十二章1節;瑪拉基書第三章16節;腓立比書第四章3節;啟示錄第三章5節、第十三章8節、第十七章8節,以及第二十章12節、15節等等。耶穌mā bat提醒祂ê門徒,tio̍h因為名記錄tī天頂而歡喜,卻m̄是因為邪靈ê降服而歡喜(參考路加福音十:20)

第30到36節,這是一段感恩ê詩歌。Tùi第32到33節thang看出詩人頭前所提起ê背景,真可能就是以色列人民被掠到巴比倫去做奴隸ê時所唱ê哀歌。Taⁿ in已經得tio̍h釋放,因為án-ne,tī第35到36節提起ê詩句,是kah tńg去故鄉後重建家園ê事有關係。

重新查詢 專卷研經 詩篇系列
錯誤回報,請聯繫