詩篇 68章1節 到 68章35節   背景資料  上一筆  下一筆
Chit篇詩篇是所有詩篇中siōng難解ê一篇,因為m̄知tio̍h歸屬toh種詩歌。真可能是因為詩歌中遺漏了bē少詩句,因為詩歌內容包括有出埃及ê背景,mā有祭司扛約櫃吟唱ê詩歌,同時mā有相戰勝利凱旋tńg來ê歡樂情景,卻無連貫。一般來講,會認為chit首詩篇是屬tī感恩ê詩歌。

第1到3節,是chit首詩篇ê序曲。義人kah邪惡ê人tī上帝面前有完全無仝ê態度;義人看見上帝來臨,充滿tio̍h歡喜。相對ê,邪惡ê人看見上帝,馬上就消失phah m̄見去。這有摩西時代ê背景,因為當摩西kā約櫃製造完成,扛tio̍h約櫃前進,以色列人民跟tòe約櫃了後而行,而且進入迦南地,只要有約櫃向前行,以色列人民ê仇敵見了lóng落荒而逃。

第4到10節,雲彩,一直是聖經作者用來表示上帝出現ê一種記號。只要有上帝ê所在,就會看tio̍h社會所遺棄、疏忽ê貧困孤兒、寡婦、孤苦無助者等,受tio̍h上帝ê眷顧。上帝眷顧ê方式,就是hō͘ óa靠祂ê子民ē-tàng得tio̍h好ê收成,bē致使iau餓。

第11到18節,chit段詩歌是相戰凱旋tńg來ê時,用來迎接軍隊、君王ê歡唱詩歌。

第11節真特別,chit節講替上帝傳達命令ê,m̄是先知、祭司,mā m̄是cha-po͘人,卻是婦女。In是社會邊緣人,無地位ê人。其實,聖經中mā出現過kúi-nā-pái是婦女帶頭領民眾歌頌上帝,像摩西ê阿姊美莉安,teh過紅海了後,帶領以色列人民歡唱歌頌上帝(參考出埃及記十五:20—21);當大衛phah敗非利士人ê時,以色列各城鎮ê婦女lóng出來唱歌跳舞歡唱(參考撒母耳記上十八:6—8)。

Tī chit段詩歌中,詩人一再強調,是上帝kā敵人ê君王kah軍隊趕散。這真清楚teh表達一個基本信念:只要有上帝同在,就ē-tàng戰勝敵人。相對ê,無上帝帶領,就算有siōng精銳ê部隊kah武器,mā是枉然(參考詩篇三十三:16—18)。

第19到27節,chit段詩歌teh表達一個中心信息:上帝就是拯救者。無論仇敵是jōa-ni̍h-á強大,lóng無法度贏過上帝ê手所扶持ê子民。

第22節提起仇敵就算bih起來tī「巴珊山」á是「海洋ê深處」,前者表示隱藏ê好地方,後者表示無人看會tio̍h影跡ê所在。M̄-koh無任何地方thang閃過上帝ê手,這kah詩篇第一三九篇7到12節所描述ê詩歌仝款。

Chit段詩歌特別用「拍鈴鼓ê女童」、「siōng小ê便雅憫支族行tī頭前」,表明有上帝同在,siōng弱小ê氣力mā m̄免驚惶。Koh講,mā說明當部隊凱旋tńg來ê時,連細漢gín-á lóng會參與歡迎ê行列。

第28到35節,chit段詩歌說明面對強大ê敵軍壓境ê時,tio̍h怎樣辦?唯一ê方法,就是走chhōe上帝顯示祂無比ê能力來庇護。Hō͘ hiah-ê原本想beh來攻擊上帝子民ê族群,lóng變成歌頌o-ló上帝ê族類。

第30節用「埃及—hit-ê蘆葦草叢中ê野獸」;「列國—hit群公牛kah in ê小牛」,chit種句話lóng tī說明強猛ê敵人軍力,無法度用數字來計算,是人見人驚ê對象,是好戰ê族群。M̄-koh只要上帝出來,in lóng會乖順、聽從。


重新查詢 專卷研經 詩篇系列
錯誤回報,請聯繫