詩篇 6章1節 到 6章10節   背景資料  上一筆  下一筆
Tī詩篇裡總共有七篇是屬tī所謂「悔改ê詩歌」,這是其中ê一篇,另外六篇是:第32篇、第38篇、第51篇、第102篇、第130篇、第143篇等。Chit首詩kah第38篇ê詩歌真類似,是一首描述詩人tī病痛中發出ê聲音,並且有一種看法,認為病痛乃是上帝對人ê處罰。Chit種看法普遍存在人ê思想中。

第1節,chit節kah詩篇第三十八篇1節完全仝款。詩人開始就大聲叫講:「上主ah!」原因是詩人感受tio̍h身陷痛苦,是上帝對伊發出大受氣。

第2到4節,tùi chit兩節thang看tio̍h詩人病重,chit種痛苦呈現出來ê狀況,是性命已經接近尾聲,是病到快接近死亡ê時刻,chit時chūn詩人ê精神已經快支撐不住。伊知影,chit時chūn只chhun上帝chiah ē-tàng kā伊tùi死亡ê邊緣中救tńg來。

第4節ê「因為你愛我」,chia ê「愛」,表示守約、信實。表示上帝是信實ê,守約ê。詩人相信chit位信實ê上帝絕對bē放棄伊,一定會救助伊脫離險境。 

第5到7節,chia所講ê「墳墓」、「陰間」,kah死亡是仝一個字。Tī詩人作詩ê時代,iáu未有koh活ê觀念出現,因為án-ne認為一個人siōng大ê不幸就是死亡,尤其認為因為破病來死,乃是上帝對人siōng大ê懲罰。因為án-ne,伊祈求上帝賜hō͘伊足以脫離死亡ê威脅kah陰影。

第7節ê「目睭紅腫,視力衰退」,是kah第6節所講ê每夜啼哭直到枕頭濕透有關。

第8到10節,是祈禱得tio̍h上帝歡喜接納ê回應。這mā teh表示詩人ê病況已經好轉,m̄-koh同時,Tī chit段詩歌中ê第9節所講ê「歡喜接納」,表示無koh計較過去ê過錯。Án-ne看起來,詩人是teh承認家己犯過錯,taⁿ蒙得上帝赦免,chiah hō͘伊ê病情好轉過來。

重新查詢 專卷研經 詩篇系列
錯誤回報,請聯繫